На Кобрыншчыне адбыўся фестываль аўтэнтычнага фальклору

Фэст адбыўся ў другі раз пры падтрымцы нямецкага фонда «Памяць, адказнасць і будучыня» у межах праекта «Вёска, якая не павінна згінуць».

Удзел у мерапрыемстве прынялі каля 100 чалавек. Усе яны змясціліся на падворку аднаго з дамоў вёскі Залессе. Для мясцовых жыхароў спявалі і танчылі ансамблі з Маларытчыны, Кобрыншчыны і Бярозаўшчыны, а таксама фальклорны калектыў «Жэмэрва» з Бельска-Падляскага (Польшча). Цікавасць да фальклорнага свята выказалі і маладыя вандроўнікі з Нямеччыны, якія прыехалі пазнаёміцца з краінай і скарысталіся магчымасцю наведаць такое каларытнае мерапрыемства.

На фестывалі таксама працавалі выставы творчасці народных майстроў. Шырока вядомы Мікалай Тарасюк прадставіў свае кампазіцыі з драўляных фігурак. Майстар ахвотна распавядаў пра сябе і сваю творчасць, тлумачыў, які сэнс ён укладвае ў свае працы.

Дэманстравала рэдкі для Беларусі від творчасці — жывапіс па шкле — народны майстар з Пружан Марыя Кулецкая.

Наступным пунктам на культурным шляху наведвальнікаў фэсту стала выстава-кірмаш разьбяра па дрэве Вячаслава Дароцька з Кобрыншчыны. Яго драўляныя лыжкі і фігуркі ласёў асабліва прываблівалі замежных гасцей, якія адразу ж і набылі сабе сувеніры.

На сцянах хаты арганізатары зладзілі выставу жывапісу польскіх і беларускіх мастакоў «Ваколіцы і людзі вёскі Залессе».

Пасля агляду экспазіцый і знаёмства з удзельнікамі фэсту фальклорныя калектывы зладзілі карагод вакол вёскі. У нацыянальным убранні яны крочылі па вёсцы і спявалі песні. Згодна са старадаўняй традыцыяй карагод вітаў танцам кожнага мясцовага жыхара, які выходзіў з хаты паглядзець, хто там ідзе.

Скончыўся фестываль канцэртам, дзе прагучалі абрадавыя і народныя песні розных мясцовасцей Брэстчыны, а таксама польскага Падляшша.