На адной з вуліц у Пінску вырубілі дрэвы: гэта выклікала спрэчкі ў гараджанаў

У Пінску на вуліцы 60 гадоў Кастрычніка вырубілі дрэвы. На гэта звярнула ўвагу жыхарка горада, якая падзялілася відэа з вуліцы ў TikTok. Сітуацыя выклікала неадназначную рэакцыю сярод саміх жыхароў.

Чытайце таксама: У цэнтры Слуцка без тлумачэнняў пачалі спілоўваць дрэвы

«На вуліцы вырубілі ўсе дрэвы. Не засталося нічога», — распавядае аўтарка роліка. Зыходзячы з ранейшых фотаздымкаў, на вуліцы раслі таполі. Як кажуць самі мясцовыя жыхары ў каментарах пад відэа, яны месціліся там больш за палову стагоддзя — 50 год. Афіцыйная прычына вырубкі дрэваў невядомая. Але ў саміх пінчанаў існуюць розныя меркаванні на гэты конт.

@inna_lenk какая причина? #пинск#беларусь#pinsk#пинапарк#pinapark ♬ оригинальный звук — Inna_Lenk

Што пінчане распавялі ў каментарах

У каментарах пад ролікам жанчыны пінчане выказалі розныя версіі, чаму вуліцу пазбавілі дрэваў. На думку адных людзей, праблема была ў тым, што таполі закрывалі выгляд для кіроўцаў аўтамабіляў: а гэта, у сваю чаргу, стварала небяспеку на дарозе.

• «Там раслі вельмі старыя таполі. Пасля моцных вятроў там уся дарога ў галінках. А калі ўпадзе дрэва, ды на дарогу? Яны аджылі сваё, потым пасадзяць маладыя».
• «Жыву якраз у доме на гэтай развязцы. Спадарства, гэтыя дрэвы вельмі закрываюць агляд для аўтамабіляў. ДТЗ і падбітыя пешаходы ўвайшлі ўжо ў норму. Усё дзеля бяспекі. Дадам, што зараз скажуць пра ПДР, але развязка даволі складаная па мерках горада і гэтая адзін са спосабаў прадухіліць надзвычайныя здарэнні».

Іншыя жыхары распавялі пра тое, што замест вырубленых дрэваў гарадскія службы створаць пешаходную зону, а замест старых таполяў пасадзяць маладыя дрэвы:

• «Пешаходныя зоны будуць і маладыя дрэвы высадзяць».
• «Іх вырубілі, бо будуць рабіць дарогі», — напісаў ў каментарах акаўнт выдання «Пінскі веснік».

Не абмінулі некаторыя пінчане і тэму пра алергію, якія таполі могуць выклікаць у асобных людзей падчас цвіцення ўвесну. Аднак з гэтымі выказваннямі паспрачаліся іншыя жыхары горада:

• «Там раслі таполі, ад іх у сезон столькі пуху, алергікі пакутуюць»? — піша адна жыхарка. І на гэта знайшоўся адказ: «Гэта мужчынскія таполі, пуху ад іх не было».

Чытайце таксама: У Магілёве высякаюць здаровыя дрэвы: што кажуць людзі?

У чым насамрэч праблема

Як высвятліла BGmedia, аўтарка каментара пра бяспеку таполяў мела рацыю: сапраўдныя алергічныя рэакцыі выклікае не сам пух, а пылок, які трапляе ў паветра падчас вяснавога цвіцення (яго вылучаюць «мужчынскія» дрэвы). Што тычыцца белага пуху з «жаночых» асобін, то ён сам па сабе гіпаалергенны. Яго віна толькі ў тым, што ён працуе як «губка»: збірае на сябе пыл і пылок іншых раслін, выклікаючы ў людзей механічны дыскамфорт.

Што да вырубкі, таполі гуляюць ключавую ролю ў гарадской экасістэме:

• Чысцяць паветра: адно дрэва паглынае да 30 кг пылу за сезон.
• Ратуюць ад спёкі: ствараюць густы цень і актыўна ахалоджваюць вуліцы праз выпарэнне вільгаці.
• Падтрымліваюць прыроду: служаць домам для птушак і карысных насякомых.

Масавая вырубка без важкіх прычын можа прывесці да павышэння тэмпературы на вуліцы і збяднення біяразнастайнасці. Аднак наколькі крытычным быў стан дрэў менавіта на вуліцы 60 гадоў Кастрычніка і ці сапраўды яны пагражалі бяспецы дарожнага руху — дакладнай афіцыйнай інфармацыі няма, акрамя кароткага каментара «Пінскага весніка» пад відэа, дзе распавялі пра запланаваны рамонт на дарогах.

Чытайце таксама: Спілоўваць дрэвы — новы трэнд у краіне? Што пра яго думаюць самі беларусы