150 рублёў за букет дырэктарцы і грошы на новыя ўнітазы: гамяльчанка расказала пра паборы ў школе

У адной са школаў Гомеля бацькі вучняў 5–9 класаў сутыкнуліся з доўгім спісам таго, што прапануюць набыць або аплаціць для школы.

Чытайце таксама: Што зменіцца ў школах Брэстчыны ў новым навучальным годзе? Дададуць ШІ і новыя факультатывы

Пра гэта ў сацсетках распавяла гамяльчанка. «Штодзень» звярнуў увагу на сітуацыю.

Як распавядае жанчына, на агульнашкольным бацькоўскім сходзе гаворка ішла пра «ўнёскі» на кампутарны клас, новыя стэнды пра генацыд і дзяржаўныя сімвалы, дах, хлебарэзкі, а таксама новыя ўнітазы ва ўсіх прыбіральнях.

Пры гэтым частку патрэб, паводле апісання сітуацыі, бацькам прапануюць закрываць не толькі грашыма, але і ўласным часам.

Ад мыйных сродкаў да букета дырэктарцы

Асобны спіс склаўся ўжо на ўзроўні аднаго класа. Ад бацькоў чакаюць кожную чвэрць:

• два літры мыйных сродкаў — для посуду і падлогі;
• чатыры рулоны туалетнай паперы;
• пачак папяровых ручнікоў;
• пачак аднаразовых пальчатак;
• пару шматразовых пальчатак;
• два пластыкавыя вядры ад класа;
• шэсць ануч з мікрафібры.

Акрамя гэтага, бацькам прапанавалі сабраць 150 рублёў на букет дырэктарцы да школьнай лінейкі.

У апісанні сітуацыі таксама гучала прэтэнзія да бацькоў, дзеці якіх вучацца ў школе не паводле тэрытарыяльнага прынцыпу: маўляў, калі сям’я выбрала менавіта гэтую школу, яна павінна быць гатовая дапамагаць ёй матэрыяльна.

Бацькоў просяць купляць і тэхніку

Паводле словаў гамяльчанкі, гэта не адзіная школа, дзе ўзнікаюць падобныя патрабаванні.

У адной са школаў горада бацькам прапаноўвалі набыць у клас тэлевізар і прынтар. Допіс пра гэта пазней выдалілі, аднак сітуацыя паспела выклікаць шмат каментароў.

Самі беларусы ўжо іранізавалі, што замест прынтара школе можна адразу набыць плотар для шырокафарматнага друку — раптам спатрэбяцца яшчэ і плакаты. Іншыя жартуючы ўдакладнялі: «А якой дыяганалі тэлевізар?»

Пытанне ў такіх гісторыях выклікае не толькі сума, якую просяць з бацькоў. Спіс патрэб выглядае так, што ў яго трапляюць рэчы, якія непасрэдна звязаныя з утрыманнем школы і арганізацыяй вучэбнага працэсу, за які адказваюць гарадскія ўлады, у прыватнасці аддзелы па адукацыі.

Пра школьныя паборы бацькі ўжо скардзіліся

Гэта не першая гісторыя пра так званыя «добраахвотныя» зборы ў беларускіх школах. Раней BGmedia расказвала гісторыю пра маці, якая адмовілася здаваць па 20–50 рублёў пасля таго, як у бацькоўскім чаце ёй нагадалі пра нявыплачаныя грошы.

Тады ў каментарах бацькі спрачаліся пра тое, ці павінны сем’і аплачваць рамонты і іншыя школьныя патрэбы. Адна з жанчын пісала: «У маім разліковым лістку няма радка “на сад, школу, дзень настаўніка”».

Іншая маці расказвала, што кіраўніцтва школы прапанавала бацькам набыць лінолеум у клас, прычым нават сама настаўніца, паводле яе слоў, была здзіўленая такім патрабаванням.

Што кажуць афіцыйныя правілы

Тэма школьных пабораў ужо не раз становілася прадметам заяваў чыноўнікаў. У 2022 годзе Міністэрства адукацыі забараніла бацькоўскім камітэтам самастойна збіраць грошы ў школах. Паводле пастановы Міністэрства адукацыі ад 29 жніўня 2022 года №290, задача бацькоўскага камітэта — у тым ліку ўмацоўваць сувязь сям’і і школы, удзельнічаць у выхаванні дзяцей і праводзіць тлумачальную працу, а не арганізоўваць збор сродкаў.

Пры гэтым пазіцыя ўлады адносна самой ідэі бацькоўскай дапамогі не заўсёды была такой адназначнай. Аляксандр Лукашэнка ў 2023 годзе заяўляў, што ад практыкі збору грошай з бацькоў «адыходзіць не варта», але рабіць гэта трэба разумна.

У такім выпадку ўзнікае сітуацыя, калі фармальна гаворка ідзе пра добраахвотную дапамогу, а на практыцы бацькі сутыкаюцца з «прымусова-дабраахвотнымі» спісамі пакупак, неабходных для школы.

Чытайце таксама: Дзяцей з ваенна-патрыятычнага клуба ў Смаргонскім раёне прыцягнулі да ўборкі ў сельгасе