«Хто пісаў гэтую афішу?»: Аб’ява пра канцэрт у Барысаўскім раёне стала прадметам насмешак у TikTok

У TikTok набірае прагляды відэа, у якім аўтар паказаў афішу канцэрта, што павінен быў адбыцца ў вёсцы Лаўніца Барысаўскага раёна. Аднак увагу карыстальнікаў прыцягнула не сама культурная падзея, а вялікая колькасць памылак у беларускамоўным тэксце.

Чытайце таксама: Беларуская мова ў дзіцячых садках Брэста: колькі дзяцей выхоўваюцца па-беларуску?

На плакаце можна заўважыць няправільна напісаныя словы і прапушчаныя літары. Аўтар роліка нават пазначыў памылкі чырвонымі выпраўленнямі. Вось, як ён пракаментаваў сітуацыю: «Цікава, дзе аддзел культуры Барысаўскага райвыканкама знайшоў такога каштоўнага супрацоўніка?»

З афішы вынікае, што жыхароў і гасцей вёскі запрашалі на канцэрт «Свята надыходзіць, з песнямі заўжды», які быў запланаваны на 31 мая каля хаты сям’і Елісеевых. Мерапрыемства арганізоўвалі супрацоўнікі мясцовага сельскага клуба.

@svytoslav937♬ оригинальный звук — svytoslav

Што пішуць беларусы

У каментарах карыстальнікі па-рознаму ацанілі сітуацыю. Частка лічыць, што прычынай магло стаць аўтаматычнае выпраўленне тэксту.

• «Справа ў тым, што інтэрнэт не ведае беларускай мовы і часта сам выпраўляе словы. Падобна, тут так і атрымалася. Проста ніхто не праверыў».

Іншыя адзначаюць, што падобныя выпадкі сустракаюцца рэгулярна.

• «Я вельмі часта сустракаю пунктуацыйныя і арфаграфічныя памылкі ў аб’явах».

Некаторыя заклікалі не вінаваціць толькі аднаго чалавека.

• «Не чапляйцеся да чалавека! Можа, ён заканчваў тэхнічную або іншую спецыяльнасць, не звязаную з мовай. А потым па знаёмстве трапіў на гэтую вакансію».

Адзін з карыстальнікаў звярнуў увагу, што падобныя матэрыялы звычайна праходзяць праз некалькі этапаў узгаднення.

• «Тут тонкасць у тым, што такая, як і любая іншая, афіша — гэта праца не аднаго чалавека».

Не абышлося і без жартаў.

• «Сядай, два!»

Іншыя звязалі праблему з агульным становішчам беларускай мовы.

• «Гэта палітыка Лукашэнкі, праз яе беларусы не ведаюць беларускай».

Шматлікія беларусы вельмі ўважліва ставяцца да выкарыстання роднай мовы ў афіцыйных паведамленнях, як вынікае з абмеркавання ў каментарах. Асабліва гэта датычыцца ўстаноў культуры, адукацыі і дзяржаўных арганізацый, дзе ад тэкстаў чакаюць пісьменнасці.

Чытайце таксама: Прапагандыст узгадаў забарону беларускай мовы. Але толькі з боку палякаў