Брэсцкія дзяржСМІ без альтэрнатывы: афіцыйныя навіны замест грамадскіх праблем

Пасля закрыцця нешматлікіх незалежных СМІ інфармацыйнае поле ў Берасці моцна змянілася. У горадзе засталіся працаваць дзяржаўныя медыя і тыя, што пагадзіліся падыгрываць дыктатарскаму рэжыму Лукашэнкі. Яны працягваюць пісаць пра мясцовыя падзеі, але робяць гэта з акцэнтам на афіцыйных навінах, без належнай увагі да грамадска-палітычных праблемаў у горадзе ці рэгіёне.

Мы паглядзелі, пра што і як пісалі асноўныя брэсцкія выданні за апошні тыдзень – «Вечерний Брест», «Заря», «Брестский вестник», «Виртуальный Брест», «Online Brest» – і зрабілі невялікі кантэнт-аналіз публікацый.

Афіцыйныя мерапрыемствы на прадпрыемствах і інтэрв’ю з чыноўнікамі па сёння застаюцца самай частай тэмай матэрыялаў абраных медыя, асабліва для абласной газеты «Заря». Выданне з’яўляецца лідарам па публікацыях размоваў з афіцыйнымі асобамі за тыдзень, апублікаваўшы 4 тэксты на гэтую тэматыку.

Читайте также: Барановичская районка «Наш край» упрекает жительницу райцентра за жалобу на медицину

Гучнай тэмай за тыдзень быў збор ураджая ў Беларусі, у прыватнасці ў Брэсцкай вобласці. Амаль усе медыя, абраныя да агляду, закранулі гэтую тэму, а некаторыя напісалі пра яе некалькі разоў («Брестский вестник» за адзін тыдзень адзначыўся ў гэтым накірунку ажно чатыры разы, без істотнай розніцы ў тэкстах).

Брэсцкія выданні пішуць пра рэкордныя вынікі па зборы зерня ў вобласці і краіне. Тэксты паўсюль гучаць аднолькава аптымістычна: «На 29 жніўня Брэсцкая вобласць упершыню ў гісторыі намалаціла 1,5 млн т. збожжа без уліку кукурузы і рапсу. Дадатак да выніку 2024 года ўжо 187 тыс. т. », распавядаюць медыя, цытуючы БЕЛТА. Ніякіх каментароў пра магчымыя праблемы ў сельскай гаспадарцы выдання не прадставілі, каб даць чытачам больш поўную карціну сітуацыі.

Яшчэ адна частая тэма брэсцкіх медыя – падрыхтоўка да школьнага навучальнага года. У тэкстах апісваецца сацыяльна-арганізацыйная праца дзяржаўных інстытутаў: рамонт аб’ектаў, забеспячэнне школьнікаў неабходнымі таварамі, актыўны ўдзел дзяржавы ў развіцці адукацыі.

«Заря» апублікавала матэрыял пра тое, як партыя «Белая Русь» «падтрымала дабрачынную акцыю», забяспечыўшы школьнымі таварамі шматдзетную сям’ю берасцейцаў. Цікава, што ў артыкуле прыведзены адзіны прыклад дапамогі сям’і, дзе абодва бацькі працаўладкаваныя на дзяржаўных прадпрыемствах. Пры гэтым у тэксце не паведамляецца пра дапамогу сем’ям, дзе бацькі не маюць сталай працы. Агулам фінансавыя цяжкасці бацькоў пры зборы дзяцей у школу былі праігнараваныя.

Читайте также: Черви в шоколаде, «железка» в мороженом: какие еще «сюрпризы» беларусы находят в еде

Пра праблему на беларуска-польскай мяжы таксама актыўна пісалі. СМІ адзначылі, што наяўнасць аўтобусаў на чарзе ў Церэспаль зменшылася, а колькасць легкавых аўтамабіляў павялічылася. Сярод галоўных праблемаў на памежным пераходзе вылучылі паводзіны ільготнікаў, якія злоўжывалі сваім станам, каб хутчэй прайсці памежны кантроль. Таксама назвалі павольную працу польскага боку ў афармленні транспарта. Брэсцкія дзяржаўныя медыя не закранулі праблемы, якія зыходзяць з беларускага боку і запавольваюць працэс праходжання мяжы, спаслаўшыся толькі на афіцыйныя дадзеныя Памежнага камітэта Беларусі.

Культурныя мерапрыемствы ў Брэсце за апошні тыдзень асвятляліся ўсімі абранымі медыя. Часцей за ўсё пісалі пра рэканструкцыю падзеяў Першай Светавай вайны каля комплекса Брэсцкай крэпасці. Крыху менш пісалі пра канкрэтныя фестывалі (напр. “Грыбны фестываль”), мастацкія выставы, якія адбываюцца ў горадзе і рэгіёнах. Асобную ўвагу “Заря” звярнула на прырост турыстаў у Брэсце, у тым ліку на наведванне Брэсцкай крэпасці. Журналісты ўзяла інтэрв’ю ў турыстаў, у тым ліку з Расеі, апублікаваўшы іх уражанні і думкі. У тэксце былі ўключаны нават тыя каментары, дзе ішла гаворка пра “общее Отечество от Владивостока до Бреста”, і народнае адзінства беларусаў і расейцаў. Аўтары артыкула ў цэлым зрабілі гэты матэрыял як пазітыўны, чым нейтральны. Гэта, у сваю чаргу, падкрэслівае прарасейскую скіраванасць медыя.

Читайте также: «Помогаем им “подняться на ноги”»: силовики гордятся тем, что принуждают «тунеядцев» к общественным работам

Грамадскім праблемам у брэсцкіх медыя за апошні тыдзень надзялялася няшмат увагі ў параўнанні з іншымі тэмамі. Тым не менш часам пра іх узгадвалі: напрыклад, паведамленне пра рамонт моста праз Мухавец, які ўскладняе рух кіроўцам; пра аэрацыю возера Вычуркі для ратавання рыбы, дзе былі задзейнічаныя МНС, абласная інспекцыя аховы жывёльнага і расліннага свету і ЖКГ; а таксама пра планавую праверку сістэмы апавяшчэння насельніцтва праз уключэнне электрасірэн. Аднак у адных тэкстах не ўказваліся прычыны праблемаў, а ў іншых магчымыя тэрміны іх вырашэння.

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро