Быхаў на Дняпры, але без пляжа: куды знікла гарадское месца для купання

Быхаўская раённая газета апублікавала спіс афіцыйна дазволеных месцаў для купання ў новым сезоне. Сітуацыя, з аднаго боку, выглядае добрай: вадаёмы падрыхтаваныя, дно абследаванае, адпачываць можна. Але ёсць нюанс, які для жыхароў райцэнтра даўно не новы — у самім Быхаве паўнавартаснага гарадскога пляжа на Дняпры няма.

Чытайце таксама: Четвероногим вход воспрещен: в Бресте напомнили о запрете отдыхать с животными на городских пляжах

У пераліку дазволеных месцаў адзначана пяць лакацый: «Возера №86», Дубкі, сажалка на вуліцы Меліяратараў, Чыгірынскае вадасховішча і ўчастак Дняпра каля Новага Быхава. Фармальна рака ў спісе прысутнічае. Фактычна — не ў горадзе.

Для Быхава, які стаіць на Дняпры, гэта выглядае як мінімум нязвыкла, заўважае «Магілёў.медыя».

Пляж быў, але знік

Стары гарадскі пляж у Быхаве існаваў. Ён знаходзіўся прыкладна за кіламетр ад горада, там быў пясок і базавая інфраструктура. Гэта было зразумелае месца, куды можна было дайсці, а не ехаць. Потым пляж перанеслі ў Дубкі.

Для ўладальнікаў аўтамабіляў дабрацца туды нескладана. Але для бацькоў з малымі дзецьмі, пенсіянераў або тых, хто проста хоча пасля працы дайсці да вады пешшу, розніца вельмі адчувальная. Пляж перастаў быць гарадскім у нармальным сэнсе гэтага слова.

Затое ў горадзе хапае іншага «добраўпарадкавання»

Пры гэтым прыкметна, што ў Быхаве ахвотна знаходзяцца рэсурсы на помнікі, памятныя знакі і іншыя паказальныя аб’екты.

Асобная гісторыя — памятны знак памежнікам усіх пакаленняў, які ўрачыста адкрылі ў Быхаве ў 2022 годзе, хоць сам горад ніколі не быў памежным. Тлумачэнне тут, відаць, больш пра паказальнасць, чым пра практычнасць: Кастрычніцкая плошча знаходзіцца фактычна пры ўездзе ў горад, таму менавіта тое, што бачыць начальства найперш, добраўпарадкоўваецца асабліва старанна.

У сетцы кожны ваш клік пакідае след, які могуць выкарыстаць супраць вас. Не дазваляйце нікому ператвараць вашыя інтарэсы ў крымінальныя справы. Уключайце BGlobal VPN — заставайцеся нябачнымі для старонніх вачэй.

Спасылка на падключэнне BGlobal VPN — тут

Калі ў людзей няма нармальнага, зручнага і бяспечнага месца для купання, яны ўсё адно будуць шукаць доступ да ракі самастойна. Гэта азначае стыхійныя спускі, неправеранае дно, адсутнасць ратавальнікаў і большыя рызыкі. Таму пляж — гэта не раскоша і не капрыз, а звычайная гарадская патрэба.

Калі ранейшае гарадское месца для купання было закрытае праз санітарныя, экалагічныя або іншыя прычыны, жыхарам было б карысна атрымаць афіцыйныя тлумачэнні. Пакуль жа для многіх быхаўчан застаецца актуальным пытанне доступу да зручнага гарадскога пляжа на Дняпры.

Чытайце таксама: Пляж з абяцанняў: чаму ў Оршы так і не з’явілася абяцанае добраўпарадкаванне