Былы палітвязень Аляксей Коршун, які адбываў тэрмін у Шклове, мог паехаць ваяваць за Расею

Былы беларускі палітвязень Аляксей Коршун, які пасля ўцёкаў з «хіміі» ў Расею быў экстрадаваны ў Беларусь і адбываў рэшту тэрміну ў шклоўскай калоніі №17, мог паехаць ваяваць за Расею супраць Украіны.

Чытайце таксама: Аршанка патрабуе ад Расіі выплаты за забітага на вайне бацьку, які не плаціў аліменты

Пра гэта паведаміла Mogilev.media. Выданне спасылаецца на свае крыніцы і піша, што Коршун заключыў кантракт з Міністэрствам абароны Расеі. Рэдакцыя таксама атрымала скрыншоты яго перапіскі з жанчынай, якая, верагодна, з’яўляецца яго жонкай Анжэлай. Паводле паведамлення, з перапіскі вынікае, што беларус знаходзіцца ў зоне ваенных дзеянняў.

Дадатковага пацвярджэння гэтай інфармацыі на дадзены момант няма.

За каментар ва «УКантакце» атрымаў 2,5 года

Аляксей Коршун — ураджэнец Оршы, 1996 года нараджэння. Яго затрымалі 31 сакавіка 2021 года. Праваабарончы цэнтр «Вясна» паведамляе, што мужчыну прыцягнулі да адказнасці паводле артыкула 130 Крымінальнага кодэкса — «Распальванне варожасці ці варажнечы». Падставай сталі каментары, якія ён пакідаў у сацыяльнай сетцы «УКантакце».

Суд прызначыў Коршуну два гады і шэсць месяцаў пазбаўлення волі ў калоніі агульнага рэжыму. Беларускія праваабаронцы палічылі яго пераслед палітычна матываваным і прызналі Коршуна палітвязнем. Беларускі ПЭН адзначаў, што каментар, за які яго пакаралі, не ўтрымліваў прамога закліку да гвалтоўных дзеянняў.

У верасні 2021 года Коршуна памілавалі. Замест калоніі яму замянілі пакаранне на абмежаванне волі з накіраваннем у папраўчую ўстанову адкрытага тыпу — так званую «хімію». Ён адбываў пакаранне ў ПУАТ №3 у Бярозе.

Чытайце таксама: «Красный Камень» зноў пад ударамі: што адбываецца на беларуска-расійскай мяжы

Уцёк з «хіміі» і апынуўся ў Расеі

У лістападзе 2021 года стала вядома, што Коршун пакінуў папраўчую ўстанову і з’ехаў з Беларусі.

Паводле праваабаронцаў, спачатку ён апынуўся ў Смаленску ў сваякоў, пасля перабраўся ў Белгарад. Пасля пачатку поўнамаштабнай вайны Расеі супраць Украіны Коршун пераехаў у Варонеж. Там яго затрымала расійская паліцыя 21 чэрвеня 2022 года.

Як паведамлялі расейскія праваабронцы, Коршун знаходзіўся ў цэнтры часовага ўтрымання замежных грамадзян, бо ў яго не было дакументаў. На той момант ён яшчэ знаходзіўся ў працэдуры атрымання часовага прытулку ў Расеі. Паводле ацэнкі праваабаронцаў, у выпадку беларуса экстрадыцыя адбылася незаконна.

26 кастрычніка 2022 года Коршуна вывезлі з Расеі ў Беларусь. Пасля гэтага яго змясцілі спачатку ў ізалятар часовага ўтрымання на Акрэсціна, а затым перавезлі ў СІЗА-6 у Баранавічах.

Пасля вяртання ў Беларусь Коршуну давялося адказваць не толькі за першапачатковы прысуд. У лістападзе 2022 года суд замяніў яму абмежаванне волі на пазбаўленне волі, і з снежня ён адбываў пакаранне ў папраўчай калоніі №17 у Шклове.

У канцы жніўня 2023 года Коршун выйшаў на волю, цалкам адбыўшы прызначаны тэрмін. У базе «Вясны» дата вызвалення пазначаная як 20 жніўня 2023 года.

Цяпер, паводле інфармацыі Mogilev.media, Коршун мог зноў апынуцца ў Расеі — на гэты раз ужо ў складзе расійскіх вайскоўцаў.

Чытайце таксама: Сем’і ўдзельнікаў вайны супраць Украіны прывезлі ў Брэсцкую крэпасць