Чарговая паказуха: у Слуцку здымалі свежы асфальт, каб раскласці яго па новых метках

У Слуцку у двары на вул. Сацыялістычнай камунальныя службы пачалі праводзіць рамонт дарогі. Але ён выклікаў шмат пытанняў у саміх случчанаў.

Чытайце таксама: «Нічыйны люк» ці нагода для фармальнай адпіскі? У Слуцку камунальшчыкі прапанавалі жыхару самастойна залатаць дарогу

На Сацыялістычнай працоўныя не так даўно паклалі свежы асфальт. У мясцовых каналах скаргаў на яго не было, і выглядае так, што ён задавальняў амаль усіх. Усіх, акрамя камунальшчыкаў. Цяпер новы асфальт пачалі здымаць. А ўсё для таго, каб перакласці яго па іншых метках.

Але не ўсе случчане ацанілі такі падыход. Многія адзначылі, што гэта выглядае «як паказуха», чым сапраўднае добраўпарадкаванне ў іх горадзе. І такога ў горадзе даволі шмат, што вынікае з гісторый саміх мясцовых жыхароў. Вось, што яны напісалі ў каментарах пад навіной:

• «Бурная дэманстрацыя актыўнай дзейнасці. Пакуль каэфіцыент карыснай дзейнасці імкнецца да нулю. І як казаў класік:“Хвіліначку, за чый кошт банкет?”».
• «Учора на запраўцы Лукойл касілі збочыны, на якіх не было травы. Я, канешне, паважаю, што горад хочуць трымаць у чысціні, але трэба неяк па-разумнаму падыходзіць да гэтага пытання. Няўжо ніхто не бачыць з наглядчыцкіх органаў, што асваенне бюджэтных грошаў ідзе па-варварску?».
• «Раз на рыбалцы гляджу, як дзве жанчыны фарбуюць у белы колер слупы ЛЭП 10кВ каля фермы. Бывае, што ізалятар можа прабіць і ідзе ўцечка на зямлю. Да слупоў ЛЭП наогул дакранацца нельга. Вось які дурань прыказаў гэта рабіць? А калі гэта заб’е кагосьці? Навошта бяліць слупы, калі яны нават не належаць калгасу?».

Варта адзначыць, што ў Слуцку хапае дамоў і вуліц, якія патрабуюць неадкладнага рамонту. Так, напрыклад, на вул. Серпухоўскай жыхары шматкватэрнага дома спрабавалі змагацца з абыякавасцю ўладаў, калі справа дайшла да гнілога даху і цэглы, што сыпалася са сценаў дома. Але ў іх выпадку камунальшчыкі спаслаліся на недахоп сродкаў. Часткова дапамаглі вырашыць праблему толькі звароты ў вышэйшыя за ЖКГ інстанцыі.

Нядаўна на вул. Рэвалюцыйнай пасля ўкладкі асфальта на свежай дарозе пачала збірацца вада і людзям давялося абыходзіць лужы. На гэта ў ЖКГ прыдумалі «арыгінальнае» вырашэнне праблемы: яны выкапалі ў асфальце ямкі для сцёку вады. Але ў выніку лужа перабралася далей, да крамы «Еўраопт».

Чытайце таксама: У Бокшыцах Слуцкага раёна невядомыя выкапалі туі з могілак