У Касцюковічах «дармаедаў» прымусілі працаваць бясплатна пад дамамі сілавікоў

Прымусовая праца ў Беларусі паступова становіцца звыклай практыкай. Улады ўсё часцей прыцягваюць да бясплатных работ людзей, якіх адносяць да катэгорыі «не занятых у эканоміцы».

Чытайце таксама: «Ябацька» не дайшоў да сцяга праз снег і цяпер скардзіцца на камунальнікаў

Як паведамляе група праваабронцаў і журналістаў з Магілёва, Mayday.team, у Касцюковічах Магілёўскай вобласці міліцыя прымусіла беспрацоўных мясцовых жыхароў займацца ўборкай снегу. Гэта адбылося пасля чарговага пасяджэння пастаянна дзеючай камісіі па садзейнічанні занятасці насельніцтва, якое прайшло ў раённым аддзеле ўнутраных спраў.

На пасяджэнне выклікалі каля двух дзясяткаў чалавек, якіх улады адносяць да «дармаедаў». У сценах РАУС чыноўнікі расказалі ім пра наяўныя вакансіі ў раёне, а таксама папярэдзілі пра магчымую адказнасць за так званыя антыграмадскія паводзіны.

Пасля афіцыйнай часткі супрацоўнікі міліцыі вырашылі «ўцягнуць падуліковых грамадзян у грамадска карысную працу». Каля пяці мужчын, якія стаяць на ўліку ў міліцыі, накіравалі на ўборку снегу з тратуараў каля новых дамоў у мікрараёне арэнднага жылля.

Пры гэтым гаворка ішла пра дамы, у якіх пражываюць сілавікі, работнікі сістэмы аховы здароўя і маладыя спецыялісты. Пытанне аплаты працы або добраахвотнага характару такой «дапамогі» нават не абмяркоўвалася.

Падобныя выпадкі — не ўпершыню

Гэта не адзіны такі выпадак. У снежні 2025 года, як паведамлялася раней, у Магілёўскай вобласці беспрацоўных прымусілі прыбіраць тэрыторыю дзіцячага садка.

Аналагічная практыка фіксуецца і ў іншых рэгіёнах краіны. У раёнах Гомельскай вобласці «незанятых у эканоміцы» масава прыцягвалі да ўборкі снегу каля прыпынкаў грамадскага транспарту і сацыяльных аб’ектаў.

Як паведамлялася раней, Гомельскі райвыканкам праз органы ўнутраных спраў арганізаваў «сумесныя работы па прыцягненні да грамадска карыснай працы асоб, не занятых у эканоміцы». Да неаплочваемых работ накіроўвалі грамадзян, якіх лічаць тымі, хто вядзе «асацыяльны лад жыцця», а таксама асоб, што стаяць на прафілактычным уліку.

Акрамя таго, да ўборкі снегу прыцягвалі людзей, якія знаходзяцца на ўліку ў крымінальна-выканаўчай інспекцыі і аддзеле аховы правапарадку і прафілактыкі Гомельскага РАУС. Працы праводзіліся, у тым ліку, у выходныя дні.

BGmedia неаднаразова паведамляла, што прыцягненне так званых «дармаедаў» да грамадска-карысных работ у Беларусі даўно перастала быць разавай мерай. За апошнія гады людзей, уключаных у базу «незанятых у эканоміцы», рэгулярна накіроўваюць на ўборку снегу, лісця, смецця і работы па добраўпарадкаванні — як у гарадах, так і ў сельскай мясцовасці.

Чытайце таксама: «Беспрацоўных тэрарызуюць!» Беларуска распавяла пра новыя пагрозы ўладаў