Камедыі і фільм Азаронка пакінулі, а гуканне вясны — адмянілі. Што адбывалася на сцэне ў Ветцы ў «дзень жалобы»

У Ветцы ўлады скасавалі правядзенне традыцыйнага гукання вясны, якое арганізоўвае Веткаўскі музей. Прычынай назвалі тое, што імпрэза прыпала на гадавіну трагедыі ў Хатыні 22 сакавіка. Здавалася б, у такі дзень культурная афіша павінна выглядаць стрыманай і жалобнай. Але калі паглядзець на мерапрыемствы ў рэгіёне, карціна атрымліваецца зусім іншай.

Чытайце таксама: «Іх наогул хтосьці ведае?»: Жыхарка Гомеля абурылася канцэртнай афішай з расейскімі артыстамі

Каб зразумець, што адбываецца ў канцэртнай сферы ў рэгіёне, дастаткова адкрыць афішу падзей у Гомелі на гэты дзень. «Штодзень» праверыў інфармацыю, і заўважыў, што ў рэгіёне не назіралася агульнага жалобнага настрою. Наадварот — было запланавана нямала забаўляльных мерапрыемстваў.

У Гомельскім драматычным тэатры, напрыклад, адбылася прэм’ера камедыі «Тры жонкі дасканаласці». У апісанні спектакля гаворыцца пра сямейныя сакрэты, блытаніну і нечаканыя павароты, якія прымусяць герояў перагледзець сваё жыццё. Сярод іншых пастановак у афішы — зусім не жалобныя спектаклі «Малыш і Карлсан» і «Вечары на хутары бліз Дзіканькі», а таксама лірычная камедыя «Не спяшайся развітвацца».

Лялечны тэатр у гэты дзень паказаў павучальны спектакль «Добры дзень!», а ў цырку адбудзецца прадстаўленне «Жар-птушка» з малпамі на поні, папугаямі пад купалам і мядзведзямі-акрабатамі.

Не выглядае стрыманай і кінаафіша. У кінатэатрах зладзілі прэм’еру вясёлага мультфільма «Скакуны», камедыю «Доктар Гаф», трылер «На ланцугу», жахі «Крык-7». Побач з імі — прапагандысцкія стужкі «Канстытуцыя» і «Душа абаронцы» Рыгора Азаронка.

Чытайце таксама: Беларусы не ацанілі прэм’еру фільма прапагандыста Азаронка

Дапаўняе спіс падзей танцавальны вечар у парку Луначарскага «Для тых, каму за…», а таксама гарадскія выставы і сустрэчы, у тым ліку «Вясенні ля мур» — выстава котак у гарадскім цэнтры культуры.

Пры гэтым у горадзе не анансавана ніводнага вялікага жалобнага мерапрыемства, прысвечанага гадавіне спалення Хатыні.

Калі ж паглядзець афішу самой Веткі, сітуацыя выглядае яшчэ больш дзіўна. У папярэднія гады ў гэты дзень там не было асобных памятных імпрэз. А цяпер нечакана запланавалі ўскладанне кветак у «Веткаўскім аграсервісе». Яно павінна адбыцца прыкладна за дзве гадзіны да анансаванага раней гукання вясны і больш чым за кіламетр ад музея.

У выніку атрымліваецца, што менавіта Веткаўскі музей, традыцыйны абрад і людзі, якія хацелі прыйсці на гукання вясны, сталі фактычна адзінымі, каго закранула нечаканае рашэнне ўладаў.

Такія супярэчнасці ў культурнай афішы выклікалі пытанні: чаму менавіта народны абрад аказаўся «непадыходным» у гэты дзень, калі іншыя забаўляльныя мерапрыемствы, камедыі і кінапаказы засталіся без зменаў.

Яшчэ адна навіна: арганізатары адмянілі Lidbeer-2026

На фоне апошніх падзеяў у культурнай сферы з’явілася яшчэ адна гучная навіна: арганізатары паведамілі, што фестываль Lidbeer у 2026 годзе не адбудзецца. Пра гэта каманда паведаміла ў сваім Telegram-канале, але канкрэтную прычыну адмены не назвала.

Навіна выклікала моцную рэакцыю ў сацсетках. Людзі пішуць пра расчараванне і мяркуюць, што справа можа быць не толькі ў фінансах ці арганізацыі, але і ў больш шырокіх зменах у культурнай сферы.

Фестываль у Лідзе прайшоў упершыню ў 2015 годзе і хутка стаў адным з найбуйнейшых опен-эйраў краіны, куды прыязджалі дзясяткі тысяч людзей. На сцэне выступалі папулярныя гурты, у тым ліку «Бі-2», «Чайф» і «Акіян Эльзы».

Аднак з часам фармат пачаў змяняцца. Пасля пандэміі і вяртання ў 2023 годзе фестываль выглядаў больш сціпла, а ў 2024–2025 гадах яго паступова перафарматавалі ў гарадское свята пад назвай «ХарчФэст». Хедлайнерамі сталі расійскія артысты: у 2024 годзе Вольга Бузава, а ў 2025-м Юлія Чычэрына.

Цяпер адмена Lidbeer-2026 для многіх выглядае як працяг гэтай тэндэнцыі, і пакуль застаецца адкрытым пытанне, ці вернецца фестываль у ранейшым выглядзе.

Чытайце таксама: Lidbeer отменен: как главный фестиваль Лиды тихо сошел на нет