Беларуская мова ў дзіцячых садках Брэста: колькі дзяцей выхоўваюцца па-беларуску?

Праваабарончая ініцыятыва «Права на мову» паведаміла пра колькасць дзіцячых садкоў у Брэсце, у якіх дзяцей выхоўваюць на беларускай мове. Дадзеныя могуць здзівіць.

Чытайце таксама: У шклоўскай калоніі палітвязняў караюць за беларускую мову

Апошнімі дадзенымі падзяліўся юрыст і праваабаронца Ігар Случак у сваім Telegram-канале.

Паводле звестак, якія адправіў Брэсцкі гарадскі выканаўчы камітэт, усяго ў Брэсце налічваецца 69 дзіцячых садкоў. У іх выхоўваюцца 13 816 дзяцей.

У садках існуе 818 груп, 15 з якіх — беларускамоўныя. У іх навучаецца ўсяго 326 чалавек, то бок 2% ад усёй колькасці.

Але больш прыкметна тое, што ва ўсім горадзе не знайшлося месца для цалкам беларускамоўнага садку. Фактычна ўсе садкі ў горадзе — з расейскай мовай навучання, за выключэннем некаторых групаў з беларускай мовай.

Гэта ўсё адбываецца на фоне іншых падзей — мэтанакіраванага ўкаранення савецкай ідэалогіі дзецям. З пачатку траўня гэтага года ў гарадах, вёсках і райцэнтрах Брэстчыны праходзяць масавыя мерапрыемствы з удзелам дзяцей, прымеркаваныя да Дня Перамогі. Дзеці ва ўзросце ад трох да шасці гадоў маршыруюць, аддаюць воінскае прывітанне ў ваеннай форме, дэкламуюць вершы, робяць плакаты і лепяць з пластыліну сцэны баявых дзеянняў.

Так, у Ляхавічах на базе дзіцячага садка № 3 быў адкрыты клуб «Юны патрыёт». Яго выхаванцы, якія толькі пачынаюць гаварыць, ужо ўцягнутыя ў так званую «патрыятычную» актыўнасць.

У Камянецкім раёне адбылася выстава, прымеркаваная да гадавіны спалення вёскі Лескі ў часы Другой сусветнай вайны. Дзеці прадставілі свае малюнкі і вырабы на ваенную тэматыку.

Усе гэтыя дзеянні падаюцца як «выхаванне патрыятызму», аднак выклікаюць усё больш пытанняў як у бацькоў, так і ў спецыялістаў.

Чытайце таксама: Когда политика приходит в детский сад: как на Брестчине готовят детей ко Дню Победы и почему это вызывает тревогу