Лукашэнка нечакана абурыўся рэкламай казіно. Раней МАРГ высветліў, што яна раздражняе 85,7% беларусаў

Аляксандр Лукашэнка даручыў дадаткова вывучыць працу і рэкламу азартнага бізнесу ў Беларусі. На нарадзе ў Мінску ён заявіў, што рэкламы казіно і букмекерскіх кампаній стала занадта шмат, а сама краіна, паводле яго слоў, «ператварылася ў казіно».

Чытайце таксама: На Нацыянальнай бібліятэцы рэклама казіно. Што кажуць людзі

Пра гэта паведамляе БЕЛТА.

Асобна Лукашэнка згадаў рэкламу аднаго з анлайн-казіно са слоганам «круці гуся» і букмекерскую кампанію Fonbet.

«Што творыцца ў краіне: у нас усе гэтага гуся круцяць», — сказаў ён, звяртаючыся да кіраўніка Адміністрацыі прэзідэнта Дзмітрыя Крутога.

Той адказаў, што сфера «зарэгуляваная».

«Ну яно зарэгулявана, але ў нас краіна ператварылася ў казіно», — запярэчыў Лукашэнка.

Ён таксама заявіў, што рэклама азартных гульняў «усюды развешаная», і запатрабаваў звярнуць увагу на букмекерскія кампаніі і казіно. Паводле Лукашэнкі, у краіне не павінна быць адступленняў ад інтарэсаў дзяржавы дзеля грошай.

Абмежаванні рэкламы ўжо рыхтуюцца

Размовы пра неабходнасць абмежаваць рэкламу азартных гульняў пачаліся не цяпер. У жніўні Міністэрства антыманапольнага рэгулявання і гандлю паведаміла пра падрыхтаваны законапраект, які накіравалі на ўзгадненне зацікаўленым дзяржаўным органам.

Прапанаваныя змены закранаюць інтэрнэт, транспарт, тэлебачанне і радыё. У прыватнасці, прапануецца забараніць рэкламу азартных і электронных інтэрактыўных гульняў у інтэрнэце, за асобнымі выключэннямі, а таксама ў транспарце.

Для тэлебачання і радыё хочуць увесці часовыя абмежаванні.

У рэкламе азартных гульняў і ігральных устаноў таксама прапануецца забараніць выкарыстанне выяў людзей і жывёл. Акрамя таго, у рэкламных матэрыялах не павінна быць інфармацыі пра бонусы, якія можна выкарыстаць для ставак.

Пакуль гэта толькі праект. Яго нормы яшчэ могуць змяніцца.

Такая рэклама раздражняе большасць апытаных

Пры гэтым рэклама азартных гульняў даўно стала прыкметнай часткай гарадской прасторы. Банеры і ролікі букмекерскіх кампаній і латарэй можна ўбачыць у метро, падземных пераходах, пад’ездах, на транспарце і нават на фасадзе Нацыянальнай бібліятэкі.

Паводле інфармацыі з афіцыйнага сайта Нацыянальнай бібліятэкі Беларусі, сярэдні кошт размяшчэння лагатыпа кампаніі ў рэкламным блоку складае 146 рублёў за хвіліну дэманстрацыі. Гэтай магчымасцю карысталіся, у прыватнасці, Belbet, Fonbet, Betera і іншыя кампаніі.

BGmedia ужо пісала пра рэкламу азартных гульняў на будынку Нацыянальнай бібліятэкі. У каментарах пад адпаведнымі відэа ў TikTok беларусы звярталі ўвагу, што ролікі паказваюць нават уначы.

Цікава, што раздражненне ад такой рэкламы адзначылі і ў самім МАРГ. У межах даследавання грамадскай думкі «Народны кантроль» міністэрства высвятляла, якая рэклама больш за ўсё не падабаецца беларусам.

Рэклама азартных гульняў і латарэй стала безумоўным лідарам: яна раздражняла 85,7% апытаных. Для параўнання, рэклама піва і моцнага алкаголю набрала каля 32%.

За што МАРГ ужо штрафаваў букмекера

МАРГ раней прыцягваў да адказнасці кампанію «Бізон Бет» за рэкламу з надпісам «Анлайн-казіно. Стаўкі на спорт. Лепшы букмекер Беларусі 2024».

Падставай для штрафу стала не сама рэклама азартных гульняў, а выкарыстанне фармулёўкі ў найвышэйшай ступені. У МАРГ палічылі, што словы пра «лепшага букмекера» ствараюць уражанне перавагі кампаніі над канкурэнтамі.

Суд падтрымаў пазіцыю ведамства. Кампанію аштрафавалі на 10 базавых велічынь — каля 400 рублёў.

Хто зарабляе на азартных гульнях

Асобнае пытанне — каму належыць частка гэтага рынку.

Большасць дзяржаўных латарэй у Беларусі звязаныя з дзвюма структурамі. «Беларускія латарэі» ўваходзяць у структуру Упраўлення справамі прэзідэнта, а «Нацыянальныя спартыўныя латарэі» заснаваныя Міністэрствам спорту і турызму.

Анлайн-платформа Belbet таксама была ў цэнтры расследавання Беларускага расследавальніцкага цэнтра. Журналісты звярталі ўвагу на асаблівасці яе працы і рэгулявання, у тым ліку на тое, што платформа фактычна прапануе шырокі набор азартных гульняў.

На гэтым фоне заява Лукашэнкі пра тое, што «не ўсюды трэба кідацца на гэтыя грошы», выглядае асабліва паказальна: дзяржава адначасова атрымлівае даходы ад азартнага рынку і цяпер кажа пра неабходнасць абмежаваць яго рэкламу.

Цяпер пытанне пераходзіць у практычную плоскасць: ці прывядуць словы Лукашэнкі да рэальных абмежаванняў для азартнага бізнесу і яго рэкламы, ці справа зноў абмяжуецца дадатковым кантролем ў выглядзе штрафаў і папярэджанняў.

Чытайце таксама: У Беларусі хочуць абмежаваць рэкламу казіно ў інтэрнэце. Беларусы ўжо абмяркоўваюць магчымыя забароны