Жыхар Магілёва дамогся прыборкі смецця ў новым мікрараёне праз TikTok: камунальнікі адрэагавалі ўжо на наступны дзень

Жыхар Магілёва апублікаваў у TikTok відэа, у якім паказаў засмечаныя двары ў новым мікрараёне «Спадарожнік-2». Паводле яго слоў, тэрыторыя каля дзіцячых пляцовак і лавак была завалена смеццем, а камунальныя службы нібыта амаль не займаліся яе прыборкай.

Чытайце таксама: «Што з некаторымі людзьмі не так?» У Яроміне салаўіны гай працягваюць ператвараць у сметнік

Ужо на наступны дзень пасля публікацыі роліка сітуацыя прыкметна змянілася — тэрыторыю часткова прыбралі.

Жылы комплекс «Спадарожнік-2» увялі ў эксплуатацыю ў 2024 годзе. Гэта адзін з найноўшых мікрараёнаў Магілёва, куды толькі нядаўна пачалі засяляцца жыхары.

«Невялікае гета Магілёва»

У першым роліку мужчына паказаў двары паміж шматпавярхоўкамі, дзіцячыя пляцоўкі і тэрыторыю каля лавак.

На кадрах можна было ўбачыць раскіданае смецце, перапоўненыя сметніцы, упаковачныя матэрыялы, рэшткі ежы і смецце проста на дзіцячых пляцоўках.

«Пакажу вам невялікае гета горада Магілёва. Гэта раён «Спадарожнік-2». Мне здаецца, што камунальныя службы тут увогуле не прыбіраюць. Вось дзіцячая пляцоўка, тут пастаянна гуляюць дзеці. Паўсюль смецце, пад лаўкамі таксама. Смеццевыя ўрны перапоўненыя», — кажа аўтар роліка.

@agroservismogilev Свалка во дворе. МОГИЛЕВ СПУТНИК-2! #свалка #срач #могилев #жэу #беларусь ♬ оригинальный звук — АгроСервис могилев

Ён таксама выказаў здагадку, што, магчыма, пасля публікацыі відэа на праблему ўсё ж звернуць увагу.

Праз дзень тэрыторыю ўжо пачалі прыбіраць

Ужо на наступны дзень магілёвец апублікаваў новае відэа з таго ж месца.

Паводле яго слоў, дзіцячыя пляцоўкі прыбралі, смеццевыя ўрны ачысцілі, а траву пачалі касіць.

«Думаю, відэа дало свой плён. Смецце яшчэ засталося, але калі параўнаць з папярэднім ролікам, розніца відавочная. Дзіцячыя пляцоўкі прыбралі, сметніцы ачысцілі, сёння людзі касілі траву», — адзначыў ён.

@agroservismogilev Спутник 2. Ул. Пысина 2-10. Стало лучше. #жэу #срач #свалка #могилев #спутник ♬ оригинальный звук — АгроСервис могилев

Разам з тым мужчына падкрэсліў, што працы яшчэ не завершаныя — каля аднаго з дамоў смецце ўсё яшчэ засталося.

У другім роліку аўтар таксама адрэагаваў на крытыку, якая з’явілася пасля першай публікацыі.

Ён адзначыў, што многія раілі яму прыбраць тэрыторыю самастойна, а таксама сцвярджалі, што мясцовыя жыхары рэгулярна праводзяць суботнікі.

Паводле яго слоў, асабіста ён гэтага не бачыў:

«Шмат было «канапавых экспертаў», якія пісалі: «Прыбярыце самі». Іншыя сцвярджалі, што жыхары самі ўсё прыбіраюць. Калі шчыра, я ні разу гэтага не бачыў. Калі трэба нешта зрабіць, усе чамусьці застаюцца дома на канапе», — сказаў магілёвец.

Праблему ўжо ўздымалі раней

BGmedia ужо звяртала ўвагу на стан мікрараёна «Спадарожнік-2» ў красавіку 2026 года, калі жыхары таксама скардзіліся на праблемы з добраўпарадкаваннем тэрыторыі.

Нягледзячы на тое, што гэтая праблема паўтарылася, на гэты раз пасля шырокага розгаласу ў TikTok камунальныя службы даволі хутка адрэагавалі і прыступілі да прыборкі часткі тэрыторыі.

Чытайце таксама: «Такое па ўсёй Беларусі». За Магілёвам заўважылі, як невядомыя выкінулі хлам проста ў полі