Мост без назвы? У Магілёве выявілася нечаканая юрыдычная праблема пасля рашэння чыноўнікаў

У Магілёве разгарэлася незвычайная дыскусія вакол аўтадарожнага моста праз Дняпро на праспекце Пушкіна. Мясцовая камісія па тапаніміцы нядаўна ўхваліла для яго назву «мост імя Героя Савецкага Саюза М.І. Яшына».

Чытайце таксама: У Магілёве мост праз Дняпро назвалі ў гонар савецкага героя. Архітэктары кажуць пра парушэнні

Пра гэтую сітуацыю паведаміў тэлеграм-канал «Спадчына», які звярнуў увагу на юрыдычныя нюансы рашэння. Пасля зацвярджэння назвы ў Дзяржаўны камітэт па маёмасці быў накіраваны зварот, у якім адзначалася, што прапанаванае найменне можа супярэчыць дзейным правілам фарміравання тапонімаў.

Аўтары звароту звярнулі ўвагу адразу на некалькі момантаў: выкарыстанне слова «імя», занадта доўгую назву з сямі слоў, а таксама прымяненне ініцыялаў замест поўнага імя.

Адказ Дзяржкаммаёмасці аказаўся нечаканым

Аднак галоўнае пытанне выявілася не ў правільнасці самой назвы.

У адказе Дзяржкаммаёмасці адзначаецца, што пытанні наймення геаграфічных аб’ектаў рэгулююцца Законам «Аб найменнях геаграфічных аб’ектаў» і Указам №160. Гэтыя дакументы ўтрымліваюць закрыты пералік аб’ектаў, якім могуць прысвойвацца афіцыйныя назвы.

Сярод іх ёсць вуліцы, завулкі, праспекты, плошчы, скверы, бульвары, паркі і іншыя элементы вулічна-дарожнай сеткі.

Але мастоў у гэтым пераліку няма.

Мост — гэта інжынернае збудаванне, а не тапанімічны аб’ект

Паводле дзейных будаўнічых норм СП 1.01.01-2024, мост разглядаецца як інжынернае збудаванне. Менавіта таму ён не адносіцца да элементаў вулічна-дарожнай сеткі, для якіх заканадаўства прадугледжвае працэдуру прысваення афіцыйных назваў.

Фактычна атрымліваецца, што ў Беларусі адсутнічае юрыдычны механізм, які дазваляе афіцыйна назваць мост.

Гэта азначае, што рашэнні мясцовых органаў улады аб прысваенні мастам імёнаў не могуць быць унесены ў дзяржаўныя рэестры ў тым жа парадку, як гэта робіцца з вуліцамі або плошчамі.

Сёння адзін клік ці падабайка могуць каштаваць занадта дорага. Гісторыя вашага браўзэра не павінна быць падставай для пераследу. BGlobal VPN. цалкам шыфруе ваш трафік. Заставайцеся ў бяспецы.

Спасылка на падключэнне BGlobal VPN – тут

Што гэта азначае на практыцы

На практыцы сітуацыя выглядае даволі парадаксальна. Мясцовыя ўлады могуць усталяваць на мосце памятную шыльду або выкарыстоўваць пэўную назву ў публічнай камунікацыі. Аднак такая назва не будзе мець статусу афіцыйнага тапоніма.

Гісторыя з магілёўскім мостам выявіла своеасаблівую юрыдычную прабеліну ў беларускім заканадаўстве. Нягледзячы на тое, што масты часта з’яўляюцца важнымі гарадскімі аб’ектамі і нярэдка атрымліваюць народныя або неафіцыйныя назвы, механізму для іх афіцыйнага наймення ў краіне фактычна не існуе.

Гістарычная неадпаведнасць

Нагадаем, мост прапанавалася назваць у гонар старшага лейтэнанта Мікалая Яшына. Аднак, як адзначаюць аўтары звароту, яго баявы подзвіг не быў непасрэдна звязаны з гэтай пераправай. Разведгрупа Яшына фарсіравала Дняпро значна вышэй па цячэнні — каля вёскі Палавінны Лог, а цэнтральны магілёўскі мост падчас вызвалення горада ў 1944 годзе ўжо быў разбураны.

Пры гэтым яшчэ ў 1964 годзе на пілоне моста з’явілася памятная шыльда ў гонар Яшына. На думку архітэктараў са «Спадчыны», гэта было хутчэй сімвалічнае рашэнне для аднаго з найбольш прыкметных месцаў горада, чым гістарычна дакладнае ўшанаванне месца подзвігу.

Цяпер жа, лічаць яны, гэтая сімвалічная сувязь фактычна атрымлівае афіцыйнае замацаванне. У той жа час гісторыя самога моста праз Дняпро мае значна больш глыбокія карані: першая пераправа на гэтым месцы з’явілася яшчэ ў 1860 годзе. На іх думку, прапанаваная назва адцягвае ўвагу ад уласнай гісторыі аднаго з найважнейшых інжынерных аб’ектаў Магілёва.

Чытайце таксама: Архитектор прокомментировал «реконструкцию» исторических зданий Бреста. К его словам возникли вопросы