«Больш за суткі ніхто не прыязджае». Пад Дзяржынскам жыхары паведамілі пра лісу з прыкметамі цяжкага стану

Жыхары адной з вёсак пад Дзяржынскам паведамілі пра лісу, якая некалькі дзён з’яўлялася каля дамоў і паводзіла сябе незвычайна. Пра гэта распавяла мясцовая жыхарка ў сваім TikTok-акаўнце.

Чытайце таксама: «Воўчая сцежка» на Піншчыне: жыхары занепакоеныя, але драпежнікаў пакуль не бачылі

Паводле яе словаў, раніцай людзі знайшлі жывёлу проста на тэрыторыі прыватнага двара. Ліса ляжала на зямлі, амаль не рэагавала на навакольнае, а таксама, як відаць на відэа, у яе дрыжалі лапы.

«Прачнуліся і знайшлі лісу са 100% шаленствам. Яна ўжо даўно на апошніх стадыях. Бегае па дварах у нас і ў суседзяў. Больш за суткі да нас ніхто не прыязджае, званілі ўсім, каму можна. Хто ведае, каму яшчэ можна патэлефанаваць, каб яе вылавілі і апрацавалі тэрыторыю?» — каментуе сітуацыю дзяўчына.

@darya.myworld #лиса #бешенство #беларусь #держинск ♬ оригинальный звук — darya

Пры гэтым варта адзначыць, што на дадзены момант шаленства ў жывёлы не пацверджана лабараторна. Паводле апублікаванага відэа немагчыма дакладна ўстанавіць прычыну такога стану жывёлы.

Праз суткі пасля публікацыі роліка да лісы прыехалі санітарныя службы. Што было з жывёлай пасля — пакуль невядома.

Якія прыкметы могуць сведчыць пра шаленства

Спецыялісты адзначаюць, што ў дзікіх жывёл шаленства можа праяўляцца па-рознаму. Да магчымых прыкмет вірусу адносяць:

• незвычайную адсутнасць страху перад чалавекам;
• агрэсіўнасць або, наадварот, незвычайную млявасць;
• парушэнне каардынацыі рухаў;
• страх вады;
• цяжкасці пры хадзе;
• сутаргі або дрыжыкі;
• выразны слінацёк;
• астатнія нехарактэрныя паводзіны для здаровай дзікай жывёлы.

Нагадаем, што канчаткова пацвердзіць або выключыць шаленства можна толькі пасля лабараторнага даследавання.

Чытайце таксама: У Паршына па вёсцы бегаюць шалёныя лісы. Улады не паабяцалі хуткага рашэння праблемы

Што рабіць, калі заўважылі дзікую жывёлу з падазронымі паводзінамі

Калі ліса або іншая дзікая жывёла паводзіць сябе незвычайна, не варта падыходзіць да яе, спрабаваць карміць, гладзіць або самастойна лавіць.

У Беларусі ў такіх выпадках рэкамендуецца прадпрыняць наступныя крокі:

• паведаміць у мясцовую дзяржаўную ветэрынарную службу;
• звярнуцца ў раённы або гарадскі выканаўчы камітэт, які арганізуе ўзаемадзеянне адпаведных службаў;
• пры пагрозе жыццю або калі жывёла знаходзіцца ў населеным пункце і можа напасці на людзей — патэлефанаваць па нумары 112, дзе паведамленне перанакіруюць неабходным службам.

Калі жывёла кагосьці ўкусіла або нават падрапала, неабходна як мага хутчэй прамыць рану вялікай колькасцю вады з мылам і неадкладна звярнуцца па медыцынскую дапамогу. Антырабічнае лячэнне найбольш эфектыўнае, калі яго пачынаюць без прамаруджання.

Пакуль афіцыйнай інфармацыі пра вынікі санітарнай праверкі або пра тое, ці была ліса адлоўлена, няма.

Чытайце таксама: Не вампиры и не вредители. Почему в Беларуси гибнут летучие мыши — и как их можно спасти