Гамяльчанка пасля пералому рукі каля «Еўраопта» сустрэлася з кіраўніцтвам крамы і адмовілася ад «маральнай кампенсацыі»

Жыхарка Гомеля, якая сцвярджае, што зламала руку каля ўваходу ў краму Еўраопт, працягвае дамагацца адказнасці гандлёвай сеткі. У новым відэа ў TikTok яна расказала пра сустрэчу з кіраўніцтвам пасля пададзенай пісьмовай прэтэнзіі.

Чытайце таксама: Гамельчанка зламала руку каля ўваходу ў «Еўраопт» і збіраецца падаваць скаргу ў суд. Што адбылося?

Паводле словаў жанчыны, пасля афіцыйнага звароту яна атрымала адказ і запрашэнне на гутарку непасрэдна ў краму. На сустрэчу жанчына прыйшла разам з мужам, бо з-за траўмы цяпер не можа выходзіць адна. Іх сустрэла загадчыца крамы.

Як сцвярджае гамельчанка, калі яны адкрылі дзверы тамбура, убачылі тую ж плітку, на якой яна ўпала. Паводле яе слоў, на яе так і не паклалі антыслізгаючыя дыванкі дзеля паляпшэння сітуацыі.

У кабінеце, кажа жанчына, яе чакала намесніца дырэктара «Еўраопта» або «Еўраторга» па горадзе Гомелі. Размова ішла пра магчымую маральную кампенсацыю. Паводле гамяльчанкі, прадстаўніца сеткі патлумачыла, што прадпрыемства з’яўляецца сацыяльна накіраваным і прапанавала невялікую выплату для «маральнай кампенсацыі».

@feniks_scorp @Сеть магазинов «Евроопт» ♬ оригинальный звук — FENIKS

«Мне прапанавалі літаральна 3 капейкі», — адзначае жанчына ў сваім відэа. Яна падкрэслівае, што атрымала не проста пералом, а сур’ёзную траўму, і рэабілітацыя, па прагнозах, можа заняць да года. Канкрэтную суму выдаткаў на лячэнне яна пакуль не называе, бо яшчэ не ведае, колькі гэта ў выніку абыдзецца. Ад прапанаванай сумы яна адмовілася.

Што паказалі камеры відэаназірання

Акрамя таго, паводле яе слоў, падчас сустрэчы прадстаўніца крамы пацвердзіла, што на відэазапісе з камер назірання відаць, як яна заходзіць у краму і падае ў тамбуры. Таксама на кадрах, нібыта, зафіксавана, што за ёй заходзіў мужчына-пакупнік, які спрабаваў дапамагчы ёй падняцца. Жанчына падкрэслівае, што ў руках у яе нічога не было і ніякіх адцягваючых фактараў не назіралася.

Яна таксама звярнула ўвагу на яшчэ адзін нюанс: каб відэазапіс быў захаваны і мог быць выкарыстаны ў судзе, неабходна звярнуцца ў міліцыю. Менавіта такім шляхам яна і плануе пайсці.

Цяпер гамяльчанка рыхтуе іск у суд. Паводле яе слоў, гэта патрабуе аплаты дзяржаўнай пошліны і дапамогі адваката. Яна спадзяецца, што судовы разгляд дапаможа вызначыць, ці былі забяспечаныя бяспечныя ўмовы на ўваходзе ў краму і хто павінен несці адказнасць за наступствы здарэння.

Чытайце таксама: Пасля відэа ў TikTok «каток» у падземным пераходзе Магілёва прыкрылі дыванкамі