«Для простых людзей штрафы, а тут чакаюць»: пасля роліка ў TikTok лесгас паабяцаў скасіць сумнік

Сумнік падступае да прыватнага ўчастка

Жыхарка вёскі Заброддзе Смалявіцкага раёна апублікавала ў TikTok відэа, у якім распавяла пра праблему з сумнікам на суседняй тэрыторыі. Паводле яе слоў, вялікі ўчастак, які належыць Смалявіцкаму лясгасу, амаль цалкам зарос гэтым інвазійным пустазеллем.

Чытайце таксама: «Штрафы физикам, а сельсоветы — «это другое»». Чаму дзяржпрадпрыемствы не штрафуюць за пустазелле?

Жанчына баіцца, што пасля цвіцення насенне пачне масава распаўсюджвацца і трапіць на яе зямлю. На ўчастку яна вырошчвае грэчку і сідэраты, таму з’яўленне сумніку можа стварыць дадатковыя цяжкасці.

Як сцвярджае аўтарка роліка, яна неаднаразова спрабавала вырашыць пытанне праз афіцыйныя каналы — звярталася ў лясгас і пакідала заяўку праз службу 115. Аднак да апошняга часу ніякіх практычных дзеянняў не было.

Асабліва жанчыну абурыла тое, што за сумнік на прыватных участках грамадзян могуць штрафаваць, а калі праблема ўзнікае на землях дзяржаўнай арганізацыі, яе вырашэнне зацягваецца.

Сёння адзін клік ці падабайка могуць каштаваць занадта дорага. Гісторыя вашага браўзэра не павінна быць падставай для пераследу. BGlobal VPN. цалкам шыфруе ваш трафік. Заставайцеся ў бяспецы.

Спасылка на падключэнне BGlobal VPN – тут

У каментарах загаварылі пра двайныя стандарты

Відэа хутка набрала папулярнасць і выклікала шырокае абмеркаванне. Многія карыстальнікі пісалі, што падобная сітуацыя назіраецца і ў іншых рэгіёнах Беларусі.

Людзі адзначалі, што патрабаванні па барацьбе з інвазійнымі раслінамі часта больш строга прымяняюцца да звычайных грамадзян, чым да арганізацый. Некаторыя каментатары называлі гэта прыкладам двайных стандартаў.

Таксама беларусы звярталі ўвагу на тое, што сумнік ужо даўно стаў агульнанацыянальнай праблемай і працягвае захопліваць новыя тэрыторыі.

Што адказалі ў лясгасе

На гісторыю звярнула ўвагу раённая газета. Як паведамляе мясцовае выданне, дырэктар Смалявіцкага лясгаса Андрэй Пышны пацвердзіў, што пра праблему ведаюць.

Паводле яго слоў, участак каля Заброддзя ўжо ўключаны ў план работ на гэты сезон. Пры гэтым кіраўнік запэўніў, што пакос сумніку будзе праведзены да пачатку цвіцення.

Ён растлумачыў, што ў кіраванні лясгаса знаходзяцца тысячы гектараў зямлі, таму работы выконваюцца паводле чарговасці. Пры планаванні ўлічваюцца ступень зарастання тэрыторый, блізкасць населеных пунктаў, сельскагаспадарчых угоддзяў, дарог і лясных масіваў, а таксама наяўнасць тэхнікі і рабочых брыгад.

У лясгасе адзначылі, што цяпер завяршаюць работы на іншых участках, дзе рызыка распаўсюджвання сумніку лічыцца больш высокай.

Гісторыя ў Заброддзі паказала, што часам адзін ролік у TikTok дапамагае прыцягнуць увагу да праблемы хутчэй, чым некалькі афіцыйных зваротаў.

Чаму сумнік лічаць небяспечным

Сумнік канадскі і сумнік гіганцкі ўваходзяць у лік самых агрэсіўных інвазійных раслін у Беларусі. Яны хутка захопліваюць новыя тэрыторыі, утвараюць густыя зараснікі і выцясняюць мясцовыя віды раслін.

Спецыялісты адзначаюць, што найбольш эфектыўна змагацца з сумснікам да пачатку цвіцення, пакуль расліна не пачала распаўсюджваць насенне.

Чытайце таксама: Штраф за незнание? Власти хотят наказывать беларусов за «неправильные» растения и мусор