Пасля скаргі на кіраўніцтва Слуцкай ЦРБ да жанчыны прыйшлі супрацоўнікі КДБ

Гісторыя Лены Платонавай са Слуцка, якая раней адкрыта абвінаваціла медыкаў у халатнасці пасля смерці свайго бацькі, нечакана атрымала новы паварот. Жанчына сцвярджае, што пасля яе скаргаў на кіраўніцтва Слуцкай ЦРБ і публічных заяў у TikTok да яе прыйшлі супрацоўнікі КДБ.

Чытайце таксама: Случчанка, якая абвінаваціла урачоў у смерці бацькі, зноў паскардзілася на лекара ў ЦРБ

У сваім відэазвароце жанчына падкрэслівае, што не разумее прычын такой увагі і не бачыць сувязі паміж праверкай і сваёй спробай дамагчыся разгляду сітуацыі вакол смерці бацькі. Паводле яе слоў, яна гатовая да размовы і не адмаўляецца адказваць на пытанні.

@lena_platonovaf #платонова #слуцк #здравоохранениебеларуси #белыехалаты #медицина ♬ оригинальный звук — Лена Платонова

У сваім відэа, запісаным пасля размоваў з КДБ, Платонава таксама згадвае падзеі 2020 года, адзначаючы, што тады падтрымлівала пратэсты, але пазней, як яна кажа, змяніла сваё стаўленне, калі пачала «бачыць іншы бок таго, што адбывалася» (жанчына згадвае, што асуджае пагрозы пратэстоўцаў да сем’яў сілавікоў). Пасля гэтага, паводле яе слоў, яна адышла ад публічнай актыўнасці, пакуль не сутыкнулася з асабістай трагедыяй.

Пра што жанчына распавяла ў новым звароце да міністраў

Пазней жанчына апублікавала асобны зварот, ужо адрасаваны міністру ўнутраных спраў і міністру аховы здароўя. Яна тлумачыць, што доўгі час спрабавала вырашыць пытанне без агалоскі, але была вымушана звярнуцца публічна, бо, на яе думку, іншыя шляхі не далі выніку.

Паводле яе слоў, амаль год яна дамагаецца адказаў наконт смерці бацькі ў слуцкай бальніцы, аднак замест поўнага і празрыстага разбору атрымлівае фармальныя адказы. Яна сцвярджае, што сутыкаецца з бюракратыяй, ціскам і нежаданнем улічваць прадстаўленыя ёю факты.

Чытайце таксама: Жительница Слуцка обвиняет врачей в смерти отца и просит Лукашенко вмешаться

Асобна яна звяртае ўвагу на дакументы, якія, на яе думку, могуць сведчыць пра службовы падлог. Жанчына кажа, што нават падавала заяву ў міліцыю з гэтай нагоды, пасля чаго была праведзена праверка, аднак вынікі яе не задаволілі і толькі выклікалі новыя пытанні.

@lena_platonovaf #мвдрб #слуцк #здравоохранениебеларуси #платонова #папаясмогу ♬ оригинальный звук — Лена Платонова

Нагадаем, што бацька Платонавай памёр у 2025 годзе ў бальніцы Слуцка. Афіцыйна прычынай смерці быў названы рак падстраўнікавай залозы, аднак дачка лічыць, што сітуацыя значна складанейшая. Паводле яе версіі, хваробу выявілі занадта позна, а да гэтага мужчыну лячылі ад іншых захворванняў.

Яна таксама сцвярджае, што перад смерцю яе бацьку адмянілі прызначанае лячэнне, а пасля зрабілі пераліванне крыві (на якое ён не мог даць згоды праз свой дрэнны фізічны стан), пасля якога ён памёр уначы. Гэтыя абставіны і сталі падставай для яе зваротаў і патрабаванняў правесці больш глыбокае расследаванне.

Цяпер гісторыя выходзіць на новы ўзровень: пасля візіту сілавікоў і публічных зваротаў да міністраў жанчына працягвае настойваць, што яе галоўная мэта — не канфлікт, а атрыманне адказаў і высвятленне ўсіх абставін смерці бацькі.

Чытайце таксама: «Калі ўрачоў не хапае, дык на што іх лаяць?»: беларусы паспрачаліся, ці варта скардзіцца на медыкаў