У Касцюковічах «дыялогавая пляцоўка» ператварылася ў прапагандысцкую імпрэзу

21 лістапада ў цэнтральнай раённай бібліятэцы Касцюковічаў адбылася дыялогавая пляцоўка пад назвай «Гістарычны шлях усталявання савецкай улады на Касцюковіччыне». На ёй прысутнічалі ветэраны працы, моладзь і журналісты мясцовай газеты.

Чытайце таксама: У дзіцячым садку правялі мерапрыемства з пракурорам: дзяцей апранулі ў колеры дзяржаўнага сцяга

Аднак замест рэальнага абмеркавання мясцовай гісторыі мерапрыемства хутчэй нагадвала прапагандысцкую імпрэзу. Тэмы былі абмежаваныя: размаўлялі толькі пра ўсталяванне савецкай улады, «герояў» савецкай эпохі і ролю Леніна і апошняга расійскага імператара Мікалая ІІ. Пытанне пра мясцовых беларускіх дзеячоў, што аказвалі супраціў новай уладзе, нават не ўздымалася.

Асобная ўвага была нададзена мараку Жбанкову, шахцёру Фетысенку і першым членам сельскагаспадарчых камун.

Навучальны аспект падаецца праз тэматычную выставу «Старонкі гісторыі», дзе былі прадстаўлены кнігі і фотаздымкі таго часу. Але і тут — без крытычнага кантэксту: ствараецца ўражанне, што савецкая ўлада прыйшла без праблем і супраціву, а яе ўсталяванне паказана як «прыродны» працэс.

На самой справе такія дыялогавыя пляцоўкі часта служаць інструментам прапаганды: фарміруюць уражанне пра «адзіны гістарычны шлях», замоўчваюць супярэчнасці, беларускіх герояў і трагедыі, што адбываліся ў рэгіёне. Замест рэальнай дыскусіі, што мусіць адбыцца на падобных мерапрыемствах, грамадству прапануецца прасавецкая інтэрпрэтацыя гісторыі пад выглядам «дыялогу».

Чытайце таксама: «Пра які генацыд ідзе гаворка?»: беларусы задалі нязручныя пытанні адміністрацыі Карэліцкай школы