«Адказнасць за сапраўдныя веды становіцца справай саміх бацькоў». Працягваецца месяц вяртання да сапраўднай гісторыі

Прадстаўніцтва па нацыянальным адраджэнні Аб’яднанага пераходнага кабінета Беларусі заклікае беларусак і беларусаў далучыцца да грамадзянскай ініцыятывы «Сапраўдная гісторыя», накіраванай на аднаўленне гістарычнай памяці, крытычнага мыслення і пачуцця нацыянальнай годнасці праз сямейную і грамадскую адукацыю.

Падставай для ініцыятывы стала чарговая хваля рэсаветызацыі ў адукацыі, у тым ліку з’яўленне новага падручніка па гісторыі Беларусі, які вяртае школьнікаў у савецкую інтэрпрэтацыю мінулага і супярэчыць прынцыпам аб’ектыўнай гістарычнай навукі.

Паводле прадстаўніка па нацыянальным адраджэнні Паўла Баркоўскага, такі падыход паглыбляе інфармацыйную ізаляцыю і вядзе да фарміравання ў маладых людзей скажонага ўяўлення пра ўласную краіну:

«Калі школа ператвараецца ў інструмент ідэалагічнай прапаганды, адказнасць за сапраўдныя веды пра гісторыю краіны становіцца справай саміх бацькоў і грамадства».

Чытайце таксама: «Беларусам опять придется учить урок». Из библиотек убирают книги Алексиевич, источники про Калиновского и не только

Як далучыцца да акцыі?

На працягу месяца прадстаўніцтва заклікае зрабіць некалькі простых, але важных крокаў:

• пагаварыць з дзецьмі школьнага ўзросту пра гісторыю Беларусі і яе месца ў Еўропе;
• паказаць ім надзейныя крыніцы інфармацыі пра беларускую гісторыю і культуру ў інтэрнэце;
• разам паглядзець гістарычны відэаблог або паслухаць падкаст;
• пачытаць кнігі беларускіх аўтараў, якія папулярызуюць нацыянальную гісторыю, — Уладзіміра Караткевіча, Уладзіміра Арлова, Леаніда Дайнекі і іншых;
• абмеркаваць убачанае і пачутае, сфарміраваць у сям’і традыцыю памятаць і разумець сваю гісторыю.

Тэлеграм-канал прадстаўніцтва далучаецца да акцыі. З 1 па 30 лістапада ў канале публікуюцца тэматычныя матэрыялы пра сапраўдную гісторыю Беларусі, карысныя як дарослым, так і дзецям.

Прадстаўніцтва прапануе дзяліцца сваімі гісторыямі ўдзелу ў акцыі ў сацыяльных сетках з хэштэгамі: #ВяртаемГісторыю #ViartajemHistoryju #СапраўднаяГісторыя #SapraŭdnajaHistoryja.

Мэта ініцыятывы — узмацніць гістарычную самасвядомасць і нацыянальную ідэнтычнасць беларусаў

Мэта ініцыятывы — узмацніць гістарычную самасвядомасць і нацыянальную ідэнтычнасць беларусаў, а таксама падкрэсліць, што праўдзівая гісторыя — гэта аснова для разумення сябе, сваёй культуры і будучыні краіны.

«Мы заклікаем бацькоў, настаўнікаў і ўсіх неабыякавых беларусаў вярнуць у штодзённае жыццё праўдзівую гісторыю — без міфаў і ідэалагічных скажэнняў. Менавіта яна вучыць нас быць свабоднымі, адказнымі і здольнымі думаць крытычна», — прапануе Павел Баркоўскі.

Чытайце таксама: Беларусы — о нашей культуре: «Очень много людей постепенно отрываются от того, что происходит внутри Беларуси»

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро