Смеццевы калапс у Магілёве: кантэйнеры перапоўненыя ўжо некалькі дзён

Навагоднія святы або новы цыклон, верагодна, вывелі з ладу звыклую сістэму вывазу адходаў у Магілёве. У шэрагу раёнаў горада кантэйнеры застаюцца перапоўненымі ўжо некалькі дзён, а смецце выходзіць за межы пляцовак. Асабліва вострая сітуацыя назіраецца ў раёнах «Тэхнапрыбора» і «Юбілейнага».

Чытайце таксама: Брестский горисполком не может договориться о вывозе мусора со своей территории. Тендеры чиновников удивляют

Жыхары паведамляюць пра прыезды розных камісій, якія фатаграфуюць перапоўненыя кантэйнеры. Аднак пакуль гэтыя праверкі не прывялі да бачных зменаў, заўважылі ў Магілёў.медыя.

Сярод магчымых прычын найбольш верагоднай выглядае версія пра тое, што кантэйнеры ўмерзлі ў лёд — іх цяжка выкаціць і выгрузіць. Афіцыйна заяўляецца, што праблему спрабуюць вырашыць, але на практыцы ўсё выглядае так, нібы з падобнай сітуацыяй улады сутыкнуліся ўпершыню.

Такое здараецца рэгулярна, калі памеры штомесячных заробкаў кіраўнікоў камунальных падраздзяленняў супастаўныя з коштам новага трактара. У выніку ўборка снегу абвяшчаецца ганаровым абавязкам кожнага жыхара, а праблему кантэйнера, што ўмерз у лёд, даводзіцца вырашаць амаль на ўзроўні навукова-даследчых інстытутаў.

Чытайце таксама: Хто ў Беларусі атрымлівае найбольш: сувязь, авіяцыя і нечаканыя рэгіянальныя лідары