У Бераставіцы студэнтаў засялілі ў інтэрнат, дзе адначасова ішоў рамонт

З пачатку верасня 38 навучэнцаў каледжа ў Бераставіцы жылі на пятым паверсе інтэрната, дзе адначасова праводзіўся рамонт. Сярод іх былі і непаўналетнія. Стан пакояў афіцыйна прызналі непрыдатным для пражывання.

Чытайце таксама: «Дзе сацыяльныя службы?»: У Лагойскім раёне паказалі дом, дзе чалавек з інваліднасцю жыве ў занядбаных умовах

Парушэнні выявіла пракуратура Бераставіцкага раёна і ўзяла сітуацыю на кантроль.

Паводле праверкі, навучэнцы жылі на пятым паверсе з 7 верасня. У гэты ж час там ішлі рамонтныя работы. У саміх пакоях маладзёнаў былі пашкоджаныя сцены, падлога і сантэхніка.

Пракуратура звярнула ўвагу, што правядзенне рамонту ў памяшканнях, дзе ўжо жывуць навучэнцы, недапушчальнае, калі работы могуць ствараць пагрозу іх жыццю і здароўю.

Ведамства запатрабавала ліквідаваць выяўленыя парушэнні і прыцягнуць вінаватых да адказнасці. Кантроль за сітуацыяй застаўся за пракуратурай.

Пры гэтым у паведамленні не ўдакладняецца, ці перасялілі 38 навучэнцаў з пятага паверха і дзе яны цяпер жывуць.

Пра які інтэрнат ідзе гаворка

Назву навучальнай установы пракуратура не называе. У Бераставіцы працуе Бераставіцкі дзяржаўны каледж, таму, верагодна, гаворка ідзе пра яго інтэрнат, заўважае hrodna.life.

На сайце каледжа паведамляецца, што інтэрнат мае блочную сістэму. У кожным блоку ёсць два двухмесныя пакоі, санвузел і ванны пакой. На паверхах прадугледжаныя кухні, пакоі для самападрыхтоўкі і адпачынку.

Таксама каледж паведамляе пра сістэмы відэаназірання і пажарнай бяспекі. Пры самім засяленні навучэнцы праходзяць інструктаж па тэхніцы бяспекі.

Асобна на сайце ўстановы падкрэсліваецца, што кіраўніцтва надае вялікую ўвагу добраўпарадкаванню інтэрната.

Кошт пражывання, паводле інфармацыі каледжа, складае 8,40 рубля ў месяц.

Падобныя скаргі ўзнікалі і ў Брэсце

Праблемы з умовамі пражывання ў інтэрнатах для навучэнцаў і маладых работнікаў узнікалі і ў Брэсце.

Раней маці аднаго з выпускнікоў апублікавала відэа, на якім паказала стан пакояў інтэрната на вуліцы Маскоўскай, 36. Там жывуць студэнты, якія праходзяць адпрацоўку ў КУП «Брэстжылбуд». На кадрах былі бачныя абшарпаныя сцены і ванны пакой з іржавым пакрыццём. У адным з пакояў ложак быў без матраца. Відэа пазней выдалілі, але BGmedia захавала скрыншоты.

У афіцыйным Telegram-канале Брэсцкага аблвыканкама «#1рэгіён» заявілі, што інфармацыя жанчыны «не адпавядае рэчаіснасці». Улады паведамлялі, што ў 70% жылых памяшканняў інтэрната «Брэстжылбуду» быў зроблены капітальны або касметычны рамонт.

Пры гэтым у ведамстве прызналі, што рамонт астатніх блокаў працягваецца паэтапна. На час работ жыхароў, паводле афіцыйнай версіі, часова засялялі ў яшчэ не адрамантаваныя пакоі. Пасля заканчэння работ яны павінны былі вярнуцца ў абноўленыя памяшканні. Да публікацыі аблвыканкам дадаў фатаграфіі ўжо адрамантаваных пакояў.

Падобныя скаргі гучалі яшчэ ў 2024 годзе. Бацькі навучэнцаў з Кобрына тады распавядалі пра абшарпаныя сцены і неналежны, на іх думку, стан інтэрната. Маці аднаго з выпускнікоў казала, што звярталася да кіраўніка інтэрната з пытаннем пра ўмовы пражывання, але пачула ў адказ, што праблем з памяшканнямі ён не бачыць.

Чытайце таксама: У Гомелі жыхары інтэрната некалькі дзён не могуць дачакацца аварыйных службаў пасля патаплення