У Гомелі пасля нападу сабак на дзяўчынку ўзмацняюць адлоў, але пра прытулкі гаворкі няма

Улады Гомеля пасля нападу бадзяжных сабак на дзяўчынку ў раёне Шведскай горкі зноў абмежаваліся экстраннымі мерамі замест доўгатэрміновага вырашэння праблемы.

Паводле афіцыйнай інфармацыі, дзіця атрымала траўмы і трапіла ў бальніцу. Яе жыццю нічога не пагражае, аднак, паводле слоў маці, раненні былі сур’ёзнымі, а дзяўчынка нават правяла некаторы час у рэанімацыі.

Чытайце таксама: У Жыткавічах заўважылі сабаку з дроцікам у ілбе. Мясцовыя жыхары мяркуюць, што ў ім мог быць яд

Замест сістэмы — чарговае «ўзмацненне»

Пасля інцыдэнту гарадскія службы атрымалі даручэнне актывізаваць адлоў бязнаглядных жывёл. Жыхароў таксама заклікалі паведамляць пра месцы знаходжання сабак і не карміць іх.

Аднак галоўнае пытанне, на якое звяртаюць увагу і журналісты «Флагштока», і гараджане, застаецца без адказу: што адбываецца з жывёламі пасля адлову, калі ў Гомелі дагэтуль няма паўнавартаснага прытулку?

Крытыкі цяперашняй сістэмы адзначаюць, што без стварэння прытулкаў, праграм стэрылізацыі, вакцынацыі і кантролю за размнажэннем гаворка фактычна ідзе не пра вырашэнне праблемы, а пра чарговую кампанію па фізічным скарачэнні колькасці жывёл.

Чытайце таксама: Валанцёрка з Лельчыцаў ратавала шчанюкоў ад адлову камунальных службаў

У сацыяльных сетках многія карыстальнікі адзначаюць, што праблема значна глыбейшая за простую прысутнасць зграяў на вуліцах.

«Хачу спытаць: адлоў будзе са стэрылізацыяй, прышчэпкамі, біркамі? А потым сабакі паедуць у прытулак? На што ідуць нашы падаткі — на дапамогу ці на забойства?» — задаюцца пытаннем у каментарыях.

Іншыя звяртаюць увагу, што караць трэба не толькі наступствы, але і прычыны:

«Можа, лепш нарэшце заняцца адказнасцю за выкідванне жывёл?» — пытаюцца гамельчукі.

Асобныя каментатары адзначаюць, што праблему часта ствараюць безадказныя гаспадары і нелегальныя заводчыкі, а не самі жывёлы.

Чытайце таксама: У Мазыры скардзяцца на зграі бяздомных сабак: улады абяцаюць адлоў

Параўнанні з Еўропай гучаць усё часцей

Частка беларусаў у каментарах звяртае ўвагу на досвед іншых краін, дзе праблему бадзяжных жывёл вырашаюць праз рэгістрацыю, вялікія штрафы, стэрылізацыю і працу прытулкаў.

«У Польшчы цяжка ўявіць зграі сабак каля дзіцячых пляцовак. Там праблему вырашалі сістэмна», — адзначаюць карыстальнікі.

Мясцовыя жыхары паведамляюць, што зграі каля двароў і дзіцячых устаноў могуць заставацца праблемай гадамі, а звароты ў службы не заўсёды даюць выніку.

У сетцы кожны ваш клік пакідае след, які могуць выкарыстаць супраць вас. Не дазваляйце нікому ператвараць вашыя інтарэсы ў крымінальныя справы. Уключайце BGlobal VPN — заставайцеся нябачнымі для старонніх вачэй.

Спасылка на падключэнне BGlobal VPN — тут

Пытанне бадзяжных жывёл ва ўсёй Беларусі, на думку часткі гамельчан, патрабуе не толькі тэрміновых рэйдаў пасля надзвычайных здарэнняў, але і комплекснай дзяржаўнай палітыкі.

Грамадскае абмеркаванне паказала, што ўсё больш беларусаў чакаюць ад уладаў не проста адлову, а цывілізаванага падыходу — з прытулкамі, кантролем за развядзеннем, адказнасцю гаспадароў і рэальнай прафілактыкай. Пакуль жа, на меркаванне гараджан, у Гомелі гаворка ідзе перадусім пра барацьбу з наступствамі, а не з прычынамі.

Чытайце таксама: У Гродзенскім раёне зграя бяздомных сабак напалохала жыхароў