Вялікі брат сочыць за табой: у Гомельскай вобласці ўжо 8 тысяч камер і іх стане яшчэ больш

Амаль 600 злачынстваў раскрыта дзякуючы сістэме відэаназірання ў Гомельскай вобласці — пра гэта справаздачацца сілавікі. У той жа час жыхары вобласці скардзяцца на парушэнні іх прыватнасці, а праваабаронцы звяртаюць увагу на рызыку палітычнага пераследу беларусаў.

Чытайце таксама: «Рускі мір будзе захопліваць усё больш прасторы»: Вадзім Мажэйка — пра новыя консульствы РФ у рэгіёнах Беларусі

Паводле звестак абласнога УУС, у рэгіёне ўсталявана каля 8 тысяч камер, частка з іх абсталяваная функцыяй распазнання твараў. Як сцвярджаюць сілавікі, з іх дапамогай раскрыта 64 цяжкія і асабліва цяжкія злачынствы, затрымана больш за 700 асобаў, якія знаходзіліся ў росшуку, а таксама зафіксавана 4,5 тысячы адміністрацыйных парушэнняў, у тым ліку звязаных з парушэннямі правілаў дарожнага руху.

Сярод прыкладаў — раскрыццё падпалу аўтамабіля, смяротнага ДТЗ і забойства ў Гомельскім раёне.

Разам з тым колькасць камер будзе павялічвацца. У гэтым годзе ў вобласці плануюць усталяваць яшчэ больш за 1,5 тысячы відэакамер.

Скарга жыхаркі Ельска

На фоне гэтай статыстыкі гучаць і іншыя галасы. Жыхарка Ельска Наталля Пятроўна на прыёме ў старшыні Гомельскага аблвыканкама Івана Крупко заявіла, што камеры відэаназірання каля яе дома ўмешваюцца ў яе прыватнае жыццё.

Як паведамляе праўладная газета «Гомельская праўда», жанчына сцвярджае, што камеры могуць сачыць за яе дзеяннямі, і іх наяўнасць стварае адчуванне пастаяннага парушэння асабістай прасторы.

Прадстаўнікі мясцовага РАУС патлумачылі, што відэаназіранне ўсталявана «для забеспячэння правапарадку» і нібыта не ахоплівае яе ўчастак. У ведамстве таксама адзначылі, што камеры фіксуюць выкананне правілаў дарожнага руху і не праводзяць відэаздымку прыватных тэрыторый грамадзян.

Як працуе рэспубліканская сістэма маніторынгу

У Беларусі з 2017 года дзейнічае Рэспубліканская сістэма маніторынгу грамадскай бяспекі. Яна аб’ядноўвае вялікую сетку «разумных» камер, здольных распазнаваць твары, счытваць аўтамабільныя нумары і запісваць падзеі ў грамадскіх месцах.

Да сакавіка 2025 года да сістэмы было падключана каля 60 тысяч камер па ўсёй краіне, пра што паведамляў міністр унутраных спраў Іван Кубракоў. Паводле афіцыйнай інфармацыі, яны працуюць у рэжыме рэальнага часу і выкарыстоўваюцца для забеспячэння грамадскага парадку, раскрыцця правапарушэнняў і фіксацыі парушэнняў ПДР.

Улады заяўляюць, што анлайн-маніторынг дазваляе раскрываць злачынствы «па гарачых слядах» і падтрымліваць кантроль над сітуацыяй.

Аднак маштабнае разгортванне сеткі відэаназірання выклікае пытанні пра межы прыватнасці і ступень дзяржаўнага кантролю. Нават калі камеры афіцыйна «не накіраваны» на прыватныя тэрыторыі, наяўнасць тысяч сістэм з распазнаваннем твараў можа ствараць адчуванне пастаяннага назірання.

Пасля выбараў 2020 года распрацоўшчыкаў сістэм відэаназірання — Synesis і Kipod — абвінавачвалі ў сачэнні за пратэстоўцамі і перадачы дадзеных сілавікам. У першай кампаніі гэта адмаўлялі. Пазней Synesis трапіла пад санкцыі ЕС і ЗША.

Чытайце таксама: У гомельскай жаночай ПК-4 скарачаюць колькасць званкоў: у калоніях фактычна знікае тэлефонная сувязь