«Выглядае як карма». У Хойне знеслі будынак з цэглы Пінскага касцёла

Сёння ў вёсцы Хойна Пінскага раёна знеслі стары будынак, у якім раней размяшчаўся сельскі савет і клуб. Паводле інфармацыі, атрыманай ад мясцовых жыхароў, будынак быў узведзены ў сярэдзіне 1950-х гадоў.

Чытайце таксама: У Брэсце былую помпавую вежу не прызналі каштоўнасцю і выставілі на продаж з умовай зносу

Як успамінаюць пажылыя людзі, цэглу для яго будаўніцтва прывезлі з Пінска — з разбуранага касцёла Святога Станіслава, збудаванага яшчэ ў 1648 годзе. Храм лічыўся адным з самых прыгожых на Палессі, але ў 1953 годзе яго ўзарвалі па загаду савецкіх уладаў. Рэшткі цэглы, па словах сведкаў, перавезлі параходам па Прыпяці і выкарысталі ў розных будаўнічых патрэбах, у тым ліку і ў Хойне.

Падмурак і падвальнае памяшканне разбуранага на сёння будынка былі зроблены з бетонных блокаў, што засталіся ад нямецкіх дотаў часоў Першай сусветнай вайны.

Пасля зносу на месцы будынка засталіся толькі кучы цэглы. Як заўважылі мясцовыя, некаторыя жыхары вёскі ўжо пачалі разбіраць іх на будаўнічы матэрыял.

Навіна пра знос хутка разышлася па сацыяльных сетках. У каментарыях некаторыя пабачылі ў гэтай падзеі сімвалічны сэнс:

• «Это ответочка, что ли? Бумеранг из прошлого?»
• «Выглядае як карма».

Чытайце таксама: У цэнтры Слуцка прадаюць былы кансервавы завод — гістарычную каштоўнасць горада