У Магілёве знеслі апошні дарэвалюцыйны дом на гістарычнай вуліцы. Жыхары абураныя

У Магілёве знеслі апошні дарэвалюцыйны дом на гістарычнай Ледзькаўскай вуліцы, якая цяпер фактычна цалкам знікла з карты горада.

Чытайце таксама: У Гродне знішчылі стары будынак дзеля «рэканструкцыі», і гэта не адзінкавы выпадак

Пад бульдозер пайшоў драўляны будынак па вуліцы Сялянскай, 6. Для сучаснага Магілёва ён быў унікальны: гэта быў адзіны захаваны драўляны дом з вонкавым брандмаўэрам — мураванай супрацьпажарнай сцяной на тарцы будынка, адзначаюць у Telegram-канале беларускіх архітэктараў «Спадчына».

Дом у Магілёве быў пабудаваны ў пачатку XX стагоддзя і некалі належаў заможнаму гараджаніну. У 1981 годзе тут адкрыўся Музей этнаграфіі, які працаваў у гэтым будынку да канца 1990-х гадоў. У апошнія гады ў памяшканнях размяшчаліся рэстаўрацыйныя майстэрні абласнога краязнаўчага музея.

Гістарычная Ледзькаўская вуліца (пазней перайменаваная ў Сялянскую) амаль цалкам страціла сваю аўтэнтычную забудову і першапачатковую трасіроўку яшчэ ў 1930-я гады, калі яе перагарадзілі сталінскім домам на вуліцы Першамайскай. Дом № 6 заставаўся апошнім сведчаннем таго, як выглядаў гэты раён раней і які маштаб мела гістарычная забудова.

На месцы старога будынка плануюць пабудаваць чатырохпавярховы інтэрнат для навучэнцаў Магілёўскага дзяржаўнага абласнога ліцэя № 3. Пры гэтым, паводле інфармацыі мясцовых актывістаў, сам дом не трапляў непасрэдна ў пляму будучай забудовы. Яго знеслі для таго, каб арганізаваць дадатковую пляцоўку для суседняга дзіцячага садка, хоць, як адзначаюць мясцовыя жыхары, раней праблем з месцам там не было.

Разам з домам фактычна знікне і апошні фрагмент гістарычнай Ледзькаўскай вуліцы. Апошні кавалак асфальтаванай дарогі, які вёў да будынка, таксама плануюць прыбраць і цалкам перапланаваць тэрыторыю. Пра тое, каб хаця б сімвалічна абазначыць трасіроўку страчанай вуліцы — напрыклад, іншым брукам або інфармацыйнымі шыльдамі — гаворка нават не ідзе.

Што пра сітуацыю думаюць магілёўцы

Многія жыхары горада ўспрынялі знос дома з вялікім шкадаваннем. У каментарах пад навіной людзі пішуць, што Магілёў і так паступова губляе сваю гістарычную спадчыну, а ўлады замест захавання ўнікальнай забудовы аддаюць перавагу новаму будаўніцтву.

Некаторыя лічаць, што такія рашэнні паказваюць непаразуменне паміж уладамі і гараджанамі:

• «Мда… калі відавочна ўлада не разумее жыхароў горада».

Іншыя падкрэсліваюць, што менавіта гістарычная архітэктура робіць горад прывабным, а не новыя будынкі:

• «Балючая тэма. Шыкоўны дом быў. Пабудуюць інтэрнат для ліцэістаў. А потым пытаюцца, што трэба зрабіць, каб горад стаў прывабным? Адказ вельмі просты: не знішчаць унікальнае, берагчы. Чамусьці гарадскія ўлады думаюць, што навадзелам можна ўпрыгожыць горад. Не. Нікому гэта не цікава. Мне нядаўна напісалі меркаванне замежнага госця аб Магілёве: населены пункт. Вельмі дакладна».

Частка каментатараў адзначае, што захаванне гістарычных будынкаў патрабуе намаганняў і фінансавання, таму ўлады часцей выбіраюць больш просты шлях — знос:

• «Проста ўнікальныя рэчы трэба яшчэ здолець зберагчы, а гэта клапотна і цяжка і патрабуе грошай. Лепш знесці. Шкада. А Магілёў сапраўды не становіцца лепшым — шэрасць».

Некаторыя карыстальнікі не стрымалі эмоцый:

• «Якое ганебішча».
• «Такі будынак загубілі».

Іншыя бачаць у гэтым сімвалічную страту гісторыі горада:

• «Гэта так робіцца… каб ад гісторыі не засталося і следу. Няўжо няма іншага месца, каб паставіць чарговую скрынку? Вельмі сумна».

Чытайце таксама: «Дрэвы пасадзілі, цяпер засталося траву пафарбаваць». У Мінску абурыліся пасадкай дрэваў у мёрзлую зямлю