У Рагачове адкрылі новы вайсковы помнік, але пастамент пачаў разбурацца ўжо падчас цырымоніі

У Рагачове каля Замкавай гары адбылося адкрыццё памятнага знака, прысвечанага 63-му стралковаму корпусу, які ўдзельнічаў у баях на Дняпроўскім рубяжы ў 1941 годзе. Аднак урачыстая падзея хутка прыцягнула ўвагу не толькі з-за самога помніка.

Чытайце таксама: Чаму ў Гомелі на пешаходнай алеі правалілася плітка? Жыхарка звязала гэта са зменай мэра

Як заўважылі відавочцы, пастамент, выкладзены з бардзюрных камянёў, аказаўся не замацаваны належным чынам і пачаў разбурацца проста падчас адкрыцця. Сам памятны знак уяўляе сабой валун з усталяванай на ім пластыкавай інфармацыйнай шыльдай.

@rogachev_mylife #13июля1941 #ГенералПетровский #героическаяоборона #днепровскийрубеж #85контрудар ♬ оригинальный звук — рогачев life

Што паведамілі арганізатары

Пра адкрыццё паведаміла праўладная арганізацыя «Патрыёты Беларусі», райвыканкам, а таксама TikTok-акаўнт раённага медыя @rogachev_mylife.

Як вынікае з апублікаванай інфармацыі, у Рагачове прайшоў шэраг мерапрыемстваў, прысвечаных падзеям лета 1941 года. У праграму ўвайшлі мітынг каля штаба корпуса савецкага генерал-лейтэнанта Леаніда Пятроўскага, адкрыццё памятнага знака 63-му стралковаму корпусу і яшчэ аднаго знака самому Пятроўскаму.

Акрамя таго, актывісты арганізавалі аўтапрабег «Дарогамі камкора: З 1941-га ў будучыню», маршрут якога прайшоў праз Рагачоў, Лучын, Лебядзёўку, Жлобін, Старую Рудню і зноў вярнуўся ў Рагачоў.

Беларусы звярнулі ўвагу на якасць работ

У TikTok многія карыстальнікі замест абмеркавання самога адкрыцця звярнулі ўвагу на тое, што канструкцыя пачала развальвацца практычна адразу.

• «Яшчэ не паспелі адкрыць, а агароджа ўжо развальваецца. І чамусьці я нават не здзіўлены. Лепш бы замест гэтых камянёў купілі добрыя лекі ветэранам і былым вязням, дапамаглі з рамонтам жылля або прывезлі дровы тым, каму яны патрэбныя».

Іншыя пачалі цікавіцца, колькі каштаваў праект.

• «Колькі грошай было патрачана?»
• «Адно пытанне: колькі бюджэтных мільёнаў пайшло на гэты помнік?»

На момант публікацыі ні мясцовыя ўлады, ні раённая газета не паведамілі, колькі бюджэтных сродкаў было выдаткавана на стварэнне памятнага знака.

Таксама ў афіцыйных паведамленнях няма тлумачэнняў, чаму пастамент пачаў разбурацца ўжо падчас цырымоніі адкрыцця і ці будуць выяўленыя недахопы выпраўляць.

Нагадаем, што падобны выпадак нядаўна адбыўся і ў Віцебску. Там праз моцны ўраган абваліўся савецкі манумент Уладзіміру Леніну. Сітуацыя выклікала шмат жартаў сярод беларусаў.

Чытайце таксама: «Ждут трагедии?» Водители бьют тревогу из-за разваливающегося моста на трассе М-10 между Микашевичами и Житковичами