У Варшаве адкрываецца выстава «Застацца / Zostać», прысвечаная да 60-годдзя Алеся Пушкіна. Чаму гэта важна?

6 жніўня 2025 года ў Музеі Вольнай Беларусі ў Варшаве адкрыецца выстава «Застацца / Zostać», прысвечаная 60-годдзю Алеся Пушкіна — мастака, для якога свабода была каштоўнасцю, а мастацтва — сродкам гаварыць пра боль, годнасць і супраціў.

У аснове выставы — сучаснае беларускае мастацтва і вобраз Пушкіна не як гістарычнай фігуры, а як сімвалу ўнутранай свабоды, адказнасці і мастацкай смеласці, якая працягвае гучаць сёння. Выстава будзе працаваць да 20 жніўня. Уваход вольны.

Чытайце таксама: «Мы редко ценим своих». Искусствовед — о том, почему смерть Алеся Пушкина так всколыхнула беларусов

Пра што выстава?

«Застацца / Zostać» — гэта даследаванне ідэнтычнасці, памяці, міграцыі і штодзённасці, якое аб’ядноўвае асабістае і супольнае, трагічнае і жыццёвае, боль і надзею.

Гэты праект не столькі пра самога Алеся Пушкіна, колькі пра тэмы і вобразы, якія былі цэнтральнымі ў яго творчасці і жыцці, і якія працягваюць жыць сёння праз іншых мастакоў і мастачак.

Свабода і адказнасць, супраціў і годнасць, памяць і супольнасць — гэтыя ідэі, якія Пушкін ператвараў у мастацкія жэсты, цяпер знаходзяць новыя формы і галасы, застаючыся важнымі для тых, хто стварае і шукае апору ў часе зменаў.

Выстава паказвае, як мастацтва можа працягваць гаварыць там, дзе слова замірае, і як праз асабістае перажыванне мастакі і мастачкі працягваюць рухаць наперад тое, што было каштоўна для Пушкіна: любоў да Беларусі, смеласць быць сабой і памяць пра тых, хто змагаўся і застаўся.

На выставе будуць прадстаўлены жывапіс, інсталяцыі і скульптуры беларускіх мастакоў і мастачак, якія праз мастацтва асэнсоўваюць досвед выгнання, рытуалаў, побыту, а таксама спробу знайсці ўнутраную апору ў часы, калі ўсё навокал змяняецца.

У экспазіцыі будуць прадстаўлены працы наступных мастакоў і мастачак: Ксіша Ангелава, Ніна Маргаева, Святлана Баева, Аляксей Врублеўскі, Юлія Мекес, Dead Boy, Ксенія Лагавая, @белы, Лера Лазук, Кася Варакса, Святаслаў Камароў, Яраслаў Гамолка, Міхаіл Гулін, Андрэй Духоўнікаў, Ілля Дудараў.

Чытайце таксама: «Мы, творцы, якія з’ехалі за мяжу, не павінны маўчаць»: выстава Надзі Букі адкрылася ў Варшаве

Чаму гэта важна?

«Застацца / Zostać» — гэта не толькі спосаб ушанаваць Алеся Пушкіна, але і магчымасць пачуць голас сучасных беларускіх мастакоў і мастачак, якія жывуць у новых краінах, але працягваюць гаварыць і ствараць, пераадольваючы траўму, мяжы і цішыню.

Гэта таксама магчымасць для гледачоў дакрануцца да сучаснага беларускага мастацтва — асабістага, жывога, праўдзівага.

Для рэалізацыі выставы каманда таксама запусціла краўдфандынг на платформе Gronka, каб сабраць мінімум 3 000 еўра на лагістыку, мантаж і святло, аплату працы каманды, друк афіш і матэрыялаў, прасоўванне. Зараз сабрана 1 534 еўра.

Чытайце таксама: Яраслаў, які малюе партрэты беларусаў: «Вельмі важную хацелку я ўжо зрабіў – намаляваў партрэт Святланы Ціханоўскай»

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро