«Што з некаторымі людзьмі не так?» У Яроміне салаўіны гай працягваюць ператвараць у сметнік

У аграгарадку Яроміна Гомельскага раёна зноў загаварылі пра салаўіны гай — адзін з самых вядомых прыродных куткоў раёна. Новы ўладальнік тэрыторыі хацеў пакінуць яго адкрытым для прагулак мясцовых жыхароў, аднак планы могуць змяніцца: нягледзячы на прыборку, сюды працягваюць звозіць смецце.

Чытайце таксама: «Сложно добираться на учебу через весь город». Газета Гомельского района признала проблемы с общественным транспортом

Першапачаткова ніхто не збіраўся абмяжоўваць доступ у гай

Цяпер участак, які раней належаў агракамбінату «Паўднёвы», перададзены фермерскай гаспадарцы «ЛэндВуд». Тут збіраюцца стварыць грыбную ферму. Адначасова ўладальнікі пачалі расчышчаць тэрыторыю, вывозіць смецце і прыбіраць зараснікі.

Паводле слоў кіраўніцы гаспадаркі Марыны Барысенка, першапачаткова ніхто не збіраўся абмяжоўваць доступ у гай. Планавалася, што жыхары і надалей змогуць гуляць тут і выгульваць сабак. Аднак пастаянныя сметнікі прымусілі фермераў задумацца, ці варта пакідаць тэрыторыю адкрытай.

Як распавядае Барысенка, у гаю рэгулярна знаходзяць старыя матрацы, аўтамабільныя дэталі, вёдры, выкарыстаныя сродкі гігіены і іншае бытавое смецце. Паводле аб’ёму відаць, што яго прывозяць транспартам.

Частку тэрыторыі ўжо абсталявалі відэаназіраннем, і там смяціць амаль перасталі. Але на астатніх участках праблема захоўваецца. «Да гэтага часу не разумею: што з некаторымі людзьмі не так? Бо сорамна гадзіць там, дзе самі жывяце», — кажа кіраўніца гаспадаркі.

Паколькі некалькім членам фермерскай сям’і цяжка справіцца з такім аб’ёмам працы, яны запрашаюць мясцовых жыхароў дапамагчы прывесці гай ў парадак.

Тэма добраўпарадкавання салаўінага гаю для Яроміна далёка не новая

Пры гэтым тэма добраўпарадкавання салаўінага гаю для Яроміна далёка не новая. Яшчэ некалькі гадоў таму жыхары прасілі ўлады звярнуць увагу на гэтае месца. У 2022 годзе мясцовая жыхарка распавядала, што школьнікі і педагогі ўжо два гады спрабуюць сваімі сіламі добраўпарадкоўваць гай, аднак без тэхнікі і дапамогі дарослых зрабіць гэта немагчыма.

Салаўіны гай лічыцца адной з галоўных прыродных славутасцяў аграгарадка. Тут растуць рэдкія дрэвы, занесеныя ў Чырвоную кнігу, знаходзіцца стары дуб, які мясцовыя называюць сімвалам вечнага кахання, а галоўнае — кожную вясну можна пачуць адразу некалькі відаў салаўёў.

Для арнітолагаў гэта незвычайная з’ява, паколькі звычайна розныя віды гэтых птушак не жывуць на адной тэрыторыі. Менавіта таму мясцовы гай не раз называлі ўнікальным месцам не толькі для жыхароў Яроміна, але і для ўсяго Гомельскага раёна.

Чытайце таксама: Один плюс один: на добровольный субботник в Гомельском районе пришло два человека