Заапарк у супермаркеце? Што пабачылі пакупнікі ў «Еўраопце» ў Гродне

У Гродне ў вядомай сеткавай краме «Еўраопт», якая знаходзіцца ў гандлёвым цэнтры «Old City», пакупнікі заўважылі «нечаканага госця». У гандлёвай зале прадуктовай крамы бегала мыш. Відэа з месца падзей апублікавалі ў TikTok.

Чытайце таксама: У мінскім «Еўраопце» ў аддзеле выпечкі паклалі пакеты для смецця

Раней беларусы ўжо неаднойчы скардзіліся на «Еўраопт» у сацсетках. Некаторыя звярталі ўвагу на магчымыя праблемы з выкананнем санітарных нормаў, у тым ліку пры куплі выпечкі ці кулінарыі. Напрыклад, у адным з мінскіх «Еўраоптаў» у аддзеле выпечкі замест харчовай плёнкі выкарыстоўвалі пакеты для смецця.

Як на сітуацыю адрэагавалі ў TikTok

Шматлікія карыстальнікі з іроніяй адрэагавалі на відэа. Вось якія каментары яны пакінулі пад ролікам:

• «Гэта з зоакрамы хамячок».
• «Гэта новы супрацоўнік!»
• «Гэта ж таемны пакупнік».
• «Гэта свой супрацоўнік, правярае тэрміны захоўвання тавараў».
• «Рататуй».
• «Кантрольна-рэвізійная служба вас вітае. Калі ласка, не перашкаджайце нам працаваць».

@pluch_kristi_ Гродно ТЦ ОлдСити Евроопт . К воробьям конечно мы уже привыкли , но вот к мышкам нет… кто ещё видел там мышек? #евроопт #мыши ♬ оригинальный звук — Кристина

Аднак частка людзей абурылася сітуацыяй, адзначыўшы, што падобнае можа сведчыць пра праблемы з санітарнымі нормамі.

• «Жахліва!»
• «Пастаянна мышэй бачу. Стабільна раз на месяц».
• «Бачыла, але даўно, у «Еўраопце» на Ціміразева ў аддзеле, дзе сыры».

Не першы падобны выпадак

Нагадаем, што на мінулым тыдні ў Мінску прымусова спынілі працу гіпермаркета «Грын» у ГЦ «Скала». Пасля таго як людзі паскардзіліся на мышэй і прусакоў у гандлёвай зале, у краму прыйшла праверка.

У ёй узялі ўдзел намеснік кіраўніка адміністрацыі Фрунзенскага раёна сталіцы і прадстаўнікі адпаведных службаў. Сярод іншага, на вагах у мясным аддзеле заўважылі жывую мыш.

«Вынікі інспекцыі аказаліся вельмі негатыўнымі», — паведамілі ў ведамстве. У краме зафіксавалі шматлікія парушэнні санітарна-эпідэміялагічных патрабаванняў, пасля чаго гіпермаркет часова закрылі для наведвальнікаў да іх ухілення.

Чытайце таксама: На гатовай катлеце ў «Санце» заўважылі нечаканага «госця»