«Як вырашаць гэтае пытанне па-мірнаму?» Жыхар Барысава паказаў разбурэнні на могілках

Жыхар Барысава апублікаваў відэа з могілак у Дзямідаўцы, куды прыехаў наведаць магілы родных. Паводле яго слоў, невядомыя спілавалі дрэва і з’ехалі, пакінуўшы пасля сябе пашкоджаныя агароджы, помнік, кветнікі і лаўку. Хто менавіта праводзіў работы і чаму пасля іх нічога не прыбралі, пакуль застаецца невядомым.

Чытайце таксама: «Госпадзі, хто за гэта адкажа?» У Міёрскім раёне каровы вытапталі могілкі і пашкодзілі помнікі

На могілках спілавалі дрэва і не прыбралі

«Прыехалі да родных на могілкі, а тут нехта спіліў дрэва і знік. Паломаныя агароджы (5 штук), помнік, кветнікі, лаўка. Як вырашаць гэтае пытанне па-мірнаму?» — напісаў аўтар відэа.

Пад ролікам хутка з’явіліся дзясяткі каментарыяў. Некаторыя барысаўчане лічаць, што дрэва маглі прыбраць прафесійна і яно было аварыйным: «Хутчэй за ўсё дрэва было небяспечнае. Яго правільна спілавалі — ні помнікі, ні агародкі не пашкоджаны. Проста прыбярыце і ўсё, а не адразу відэа ў інтэрнэт выкладваць».

Іншыя звярнулі ўвагу, што на відэа відаць наступствы падзення дрэва: «Нават калі так, то ці не павінен прыбіраць той, хто спілаваў?»

У сетцы кожны ваш клік пакідае след, які могуць выкарыстоўваць супраць вас. Не дазваляйце ператвараць вашыя інтарэсы ў крымінальныя справы. Уключайце BGlobal VPN — будзьце нябачныя для старонніх вачэй.

Спасылка на падключэнне BGlobal VPN – тут

Знайшліся і тыя, хто ўжо сутыкаўся з падобнымі сітуацыямі:

• «Я калісьці звярталася ў сельсавет наконт аварыйнага дрэва над помнікам маіх бацькоў. Мне адказалі, што гэтым займаюцца па плане і калі да таго яно ўпадзе, то гэта будзе як няшчасны выпадак. Але калі наймеце самі людзей і пашкодзіце чужыя помнікі, то будзеце адказваць самі. Мы самі наймалі людзей. Яны ўсё зрабілі акуратна, але вельмі дорага».
• «Па якім плане і ці ёсць ён у іх? Гэта проста адгаворка. Каб людзі самі наймалі».

Адзін з каментатараў, які прадставіўся вальшчыкам лесу, адзначыў: «Як вальшчык 3-га разраду магу сказаць, што граматна паклалі дрэва!»

Іншыя рэагавалі куды больш эмацыйна:

• «Людзі страцілі ўсё чалавечае. Гэта жах».
• «Ну гэта п*здзец! Вядома, трэба шукаць, хто спілаваў дрэва, гэта іх касяк».
• «У нас таксама спілавалі дрэва і паламалі помнік. Не ведаем хто».

На момант апублікавання тэксту ні УП «Жыллё», ні раённая газета «Адзінства» сітуацыю не каментавалі.

Чытайце таксама: Брестские чиновники рассказали, что ждет Тришинское кладбище. Про повреждение памятников на субботнике промолчали

У 2022 годзе жыхары вёскі Мосцішча скардзіліся на пашкоджаныя помнікі пасля выдалення аварыйных дрэў

Між тым падобная гісторыя ўжо адбывалася ў Барысаўскім раёне. У 2022 годзе жыхары вёскі Мосцішча скардзіліся на пашкоджаныя помнікі пасля выдалення аварыйных дрэў на мясцовых могілках. Тады ў сельсавеце патлумачылі, што за станам пахаванняў і дрэў на сваіх участках у першую чаргу павінны сачыць самі родзічы памерлых. Улады арганізавалі цэнтралізаваную высечку пасля шматлікіх зваротаў жыхароў, а чыноўнікі меркавалі, што частка пашкоджанняў магла з’явіцца яшчэ падчас моцнага ветру.

Пры гэтым патрабаванні да ўладальнікаў пахаванняў у Беларусі з кожным годам становяцца ўсё больш жорсткімі. Вясной 2026 года Мінжылкамгас нагадаў, што родзічы абавязаны сачыць не толькі за помнікамі, але і за станам усяго ўчастка: прыбіраць смецце, касіць траву, рамантаваць перакошаныя надмагіллі і агароджы. Калі магіла будзе прызнана занядбанай і яе не прывядуць у парадак на працягу двух гадоў пасля паведамлення, надмагільнае збудаванне могуць знесці.

Атрымліваецца парадаксальная сітуацыя. З аднаго боку, улады патрабуюць ад людзей падтрымліваць пахаванні ў належным стане і своечасова выпраўляць любыя пашкоджанні. З другога — калі на могілках з’яўляюцца разбураныя помнікі і агароджы пасля спілу дрэў, родзічам нярэдка даводзіцца самастойна высвятляць, хто праводзіў работы і хто павінен адказваць за наступствы.

Чытайце таксама: «Лес у Плоски превратился в склад просрочки»: брестчанин нашел странную свалку под кладбищем