«Машыны праносяцца міма». Жыхары новага мікрараёна Барысава паскардзіліся на небяспечную дарогу да прыпынку

Новы мікрараён Лядзішча-2 у Барысаве працягвае забудоўвацца, але разам з новымі дамамі з’яўляюцца і старыя для беларускіх новабудоўляў праблемы. Жыхары паскардзіліся, што па дарозе да найбліжэйшага прыпынку грамадскага транспарту ім даводзіцца ісці проста па праезнай частцы, бо тратуара тут дагэтуль няма. Чыноўнікі прызнаюць праблему, аднак тэрмінаў яе вырашэння пакуль не называюць.

Чытайце таксама: «Чаму я павінна перажываць». Жыхары Барысава скардзяца на высокую траву у дварах і кляшчоў, якія пагражаюць дзецям

Самым небяспечным участкам называюць дарогу ўздоўж прыватнага сектара мікрараёна Дымкі

Самым небяспечным участкам жыхары называюць дарогу ўздоўж прыватнага сектара мікрараёна Дымкі. Менавіта па ёй штодня ідуць дарослыя і дзеці да аўтобуснага прыпынку.

«Прыпынак проста за паваротам, але, каб да яго дайсці, трэба ісці па дарозе. Машыны праносяцца міма», — расказаў адзін з жыхароў мікрараёна Уладзімір.

У сетцы кожны ваш клік пакідае след, які могуць выкарыстоўваць супраць вас. Не дазваляйце ператвараць вашыя інтарэсы ў крымінальныя справы. Уключайце BGlobal VPN — будзьце нябачныя для старонніх вачэй.

Спасылка на падключэнне BGlobal VPN – тут

Паводле слоў мясцовых жыхароў, узімку сітуацыя становіцца яшчэ больш небяспечнай. З-за снегу і галалёду праезная частка звужаецца, а школьнікам даводзіцца літаральна дзяліць дарогу з аўтамабілямі.

У раённай Службе заказчыка жыллёва-камунальных паслуг пацвердзілі, што ведаюць пра праблему. «Пытанне на слыху, мы пра праблему ведаем і будзем вырашаць», — заявіў «Мінскай праўдзе» дырэктар службы Леанід Вараўко.

Калі менавіта з’явіцца тратуар, чыноўнік не ўдакладніў.

Спачатку з’яўляюцца шматпавярховікі, а сацыяльная і транспартная інфраструктура пачынае даганяць іх значна пазней

Пры гэтым сітуацыя выглядае паказальнай на фоне публікацый раённай газеты апошніх гадоў. Яшчэ ў сакавіку «Адзінства» падрабязна расказвала, як актыўна развіваецца Лядзішча-2. Тады паведамлялася, што за пяць гадоў тут пабудавалі 15 шматкватэрных дамоў больш чым на 1,5 тысячы кватэр, выканалі добраўпарадкаванне тэрыторыі, абсталявалі паркоўкі, веладарожкі, дзіцячыя пляцоўкі і ўнутрыдваровыя прасторы.

У тым жа месяцы газета расказвала ўжо пра перспектывы з’яўлення інфраструктуры. Высветлілася, што дзіцячы сад, школа і паліклініка пакуль толькі прадугледжаныя праектам, прычым праектаванне паліклінікі толькі пачалося. Таксама ўлады рыхтуюць участкі пад будаўніцтва гандлёвых аб’ектаў і шматфункцыянальнага цэнтра.

Фактычна самі чыноўнікі пацвердзілі тое, на што жыхары новых мікрараёнаў у Беларусі скардзяцца ўжо шмат гадоў: спачатку з’яўляюцца шматпавярховікі, а сацыяльная і транспартная інфраструктура пачынае даганяць іх значна пазней.

Цяпер да адсутнасці школы, дзіцячага садка і паліклінікі дадалася яшчэ адна базавая праблема — бяспечны шлях да грамадскага транспарту. І хоць улады запэўніваюць, што пытанне знаходзіцца «на слыху», калі жыхары Лядзішча-2 нарэшце змогуць ісці да прыпынку па тратуары, а не па праезнай частцы, пакуль застаецца невядомым.

Чытайце таксама: «Камеры на кожным кроку, а знайсці не могуць». Жыхары Барысава зноў паведамляюць пра небяспечную знаходку для жывёл