Зоаабаронцы паказалі забітага сабаку ў Мазыры і звярнуліся да Лукашэнкі. Справа выклікала новы рэзананс

Зоаабаронцы сцвярджаюць, што жорсткія метады адлову працягваюцца

У Гомельскай вобласці не сціхаюць размовы пра адлоў і забойствы бяздомных жывёлаў.

Чытайце таксама: Жыхары Гомеля масава звяртаюцца да кіраўніка горада і абвінавачваюць улады ў «крывавай бойні» сабак

Як паведамляе «Флагшток», валанцёры апублікавалі чарговыя відэа, якія, на іх думку, сведчаць пра выкарыстанне жорсткіх метадаў падчас працы службаў адлову.

Адна з валанцёрак з Мазыра, Дыяна, выклала відэа з мёртвым сабакам. Паводле яе слоў, жывёлу застрэлілі супрацоўнікі службы адлову проста ўдзень каля мясцовага рынку.

@dianaoo19♬ оригинальный звук — Диана

Жанчына сцвярджае, што сабака быў стэрылізаваны, прышчэплены, меў ашыйнік і ветэрынарны пашпарт. Яна таксама заявіла, што сама даглядала жывёлу і дапамагала ёй матэрыяльна.

На відэа са слязьмі яна звярнулася да Аляксандра Лукашэнкі: «Скажыце, колькі гэта будзе працягвацца? Колькі будуць здзекавацца з людзей? Няўжо вы не можаце прыняць меры?»

Яшчэ адна актывістка запісала відэазварот

На наступны дзень пасля публікацыі відэа яшчэ адна зоаабаронца — Таццяна Шаўчык — таксама апублікавала свой відэазварот.

Жанчына назвала сябе выбаршчыцай Лукашэнкі і заклікала спыніць, як яна лічыць, забойствы жывёл у Беларусі.

Паводле яе слоў, службы адлову выкарыстоўваюць «страшныя, бесчалавечныя і антыгуманныя спосабы», у тым ліку яд і спецыяльныя стрэльбы.

Таццяна таксама заявіла, што ахвярамі становяцца не толькі бяздомныя сабакі, але і стэрылізаваныя жывёлы, пра якіх клапоцяцца валанцёры і якія не праяўляюць агрэсіі.

Акрамя таго, яна звярнулася да міністра ўнутраных спраў Івана Кубракова з заклікам спыніць тое, што назвала «злачыннымі дзеяннямі» службаў адлову.

Чытайце таксама: Валанцёрка з Лельчыцаў ратавала шчанюкоў ад адлову камунальных службаў

Пасля нападу на школьніцу сітуацыя ў рэгіёне абвастрылася

Тэма бяздомных сабак у Гомельскай вобласці пачала актыўна ўздымацца пасля нападу жывёлы на школьніцу ў Гомелі.

Пасля гэтага ўлады паведамілі пра ўзмацненне рэйдаў і адлову. Аднак многія мясцовыя жыхары і валанцёры лічаць, што маштабы таго, што адбываецца цяпер, ужо выходзяць за рамкі звычайнай працы камунальных службаў.

У сацыяльных сетках валанцёры, так і простыя беларусы, часта паведамляюць пра масавыя знікненні сабак.

Людзі расказвалі пра жывёлаў, якія знікалі пасля сутыкнення са службамі адлову, а пазней іх знаходзілі мёртвымі. Паводле словаў валанцёраў, на некаторых целах нібыта былі бачныя сляды ад дроцікаў.

Сёння адзін клік ці падабайка могуць каштаваць занадта дорага. Гісторыя вашага браўзэра не павінна быць падставай для пераследу. BGlobal VPN. цалкам шыфруе ваш трафік. Заставайцеся ў бяспецы.

Спасылка на падключэнне BGlobal VPN – тут

Чытайце таксама: Пад Мядзелем застрэлілі хатняга сабаку. Яго гаспадар упэўнены, што «такога рабіць нельга»

Падобныя паведамленні паступаюць і з іншых гарадоў

Праблема закранула не толькі Гомель і Мазыр.

Раней BGmedia звяртала ўвагу на відэа жыхаркі Калінкавічаў, якая сцвярджала, што мясцовыя жыхары і нават дзеці спрабуюць хаваць бяздомных сабак.

@tatianayadevitch♬ Tranquil Orbits — Yurdanur Steck

Паводле яе словаў, людзі баяцца, што жывёл могуць забіваць проста на вуліцах, таму спрабуюць выратаваць іх ад службаў адлову.

У каментарах многія карыстальнікі прызнаваліся, што не могуць паверыць у тое, што падобныя выпадкі сапраўды адбываюцца. Людзі пісалі пра шок і абурэнне тым, як абыходзяцца з жывёламі, а таксама выказвалі спачуванне валанцёрам.

Частка каментатараў звяртала ўвагу, што замест узмоцненага адлову ўлады маглі б развіваць сетку прытулкаў і праграмы стэрылізацыі, якія дапамаглі б вырашаць праблему больш гуманнымі спосабамі. Іншыя нагадвалі, што бяздомныя сабакі таксама з’яўляюцца жывымі істотамі і заслугоўваюць на абарону.

Петыцыя супраць забойства жывёл праіснавала нядоўга

На фоне рэзанансу валанцёры і неабыякавыя жыхары спрабавалі арганізаваць петыцыю супраць масавага знішчэння жывёл у Гомельскай вобласці.

Аднак, як паведамляў «Штодзень», ініцыятыва вельмі хутка знікла.

Паводле словаў мясцовых жыхароў, многія нават не паспелі паставіць свой подпіс.

Таксама ў інтэрнэце з’яўлялася інфармацыя, што актывісты спрабавалі патрапіць на прыём да старшыні Савета Рэспублікі Наталлі Качанавай, каб звярнуць увагу на сітуацыю.

Чытайце таксама: У Жыткавічах заўважылі сабаку з дроцікам у ілбе. Мясцовыя жыхары мяркуюць, што ў ім мог быць яд

Узмоцнены адлоў замест прытулкаў

Валанцёры, так і іншыя неабыякавыя беларусы, звяртаюць увагу на тое, што праблема бяздомных жывёл у Беларусі існуе ўжо шмат гадоў.

На іх думку, краіне па-ранейшаму не хапае сістэмнай праграмы стэрылізацыі, сучасных прытулкаў і дзяржаўнай падтрымкі валанцёрскіх ініцыятыў. Таму асноўным інструментам барацьбы з колькасцю бяздомных сабак часта застаюцца рэйды і адлоў.

Раней паведамлялася, што пасля інцыдэнту ў Гомелі ў такіх мерапрыемствах удзельнічалі не толькі камунальныя службы, але і супрацоўнікі РАУС, МНС, а таксама дружыннікі.

Пасля гэтага колькасць паведамленняў пра знікненне сабак і меркаванае жорсткае абыходжанне з імі ў сацыяльных сетках стала яшчэ большай.

Чытайце таксама: Валанцёры паскардзіліся на стаўленне да жывёлаў у дзяржпрадпрыемстве «Фаўна горада»