«А жыхары не скардзіліся?» Легендарны дом-«шпакоўня» ў Бабруйску замест рамонту атрымаў неонавую падсветку

Для бабруйчан легендарны дом-«шпакоўня» на вуліцы Мінскай даўно стаў адной з галоўных архітэктурных славутасцяў горада. Нядаўна незвычайны будынак атрымаў новае афармленне: па фасадзе змантавалі каля 330 метраў неонавай падсветкі, а дадаткова ўсталявалі 12 святлодыёдных пражэктараў. Чыноўнікі называюць праект складаным інжынерным рашэннем і новым упрыгажэннем горада. Аднак у каментарах жыхары спрачаюцца не столькі пра прыгажосць падсветкі, колькі пра тое, што менавіта варта было зрабіць са знакамітым домам у першую чаргу.

Чытайце таксама: «Другі тыдзень чакаем». СМІ Бабруйска і мясцовыя жыхары па-рознаму ацэньваюць поспехі ў пакосе травы

Легендарны дом-«шпакоўня» атрымаў новае афармленне

Пра з’яўленне новай ілюмінацыі паведаміў партал «Бабруйск Медыя». Там адзначылі, што для рэалізацыі праекта спатрэбіліся нестандартныя тэхнічныя рашэнні праз незвычайную архітэктуру будынка.

«Гэта, вядома, незвычайны праект. Мы рабілі яго каля месяца. Гэта вельмі доўгі праект. Адзін з самых няпростых у нас атрымаўся ў горадзе», — заявіў дырэктар КПУП «Гарсвят Бабруйска» Сяргей Валько.

Гаворка ідзе пра знакамітую бабруйскую «Шпакоўню» — дом на вуліцы Мінскай, 25, які пабудавалі ў 1985 годзе. Дзякуючы круглым вокнам і выступаючым блокам яго часта называюць таксама домам-«тэтрысам». Праект распрацаваў архітэктар Уладзімір Галушчанка, які натхняўся ідэямі японскага архітэктурнага метабалізму. З часам будынак стаў адным з самых пазнавальных сімвалаў Бабруйска, а ў 2013 годзе яго фатаграфія атрымала ўзнагароду на выставе савецкага мадэрнізму ў Вене.

Аднак навіна пра падсветку выклікала неадназначную рэакцыю ў гараджан. Частка каментатараў з іроніяй успрыняла заяву пра складанасць праекта:

• «Калі гэта самы цяжкі праект, на нешта лепшае спадзявацца не варта?)»
• «Яму не сорамна казаць, што гэта вельмі доўгі і самы цяжкі праект? 12 свяцільняў і 300 метраў неонавай падсветкі».

Чытайце таксама: Без ветэрынара і належнай падрыхтоўкі: пракуратура выявіла парушэнні пры адлове бяздомных жывёл у Бабруйску

Падсветка не вырашае асноўных праблем дома-«шпакоўнi»

Некаторыя жыхары лічаць, што камунальнікам варта было звярнуць увагу на іншыя гарадскія праблемы:

• «Ёсць праект лягчэйшы, ніжэйшы — люкі выраўняйце і навучыце рукажопаў іх ставіць роўна з дарогай, а не абы стаяў».
• «Ды гэта цяжкі праект… Гэта ж не бардзюры класці».

Іншыя бабруйчане звярнулі ўвагу на стан самога будынка і палічылі, што падсветка не вырашае яго асноўных праблем:

• «А адрамантаваць спачатку? Дом у жахлівым стане».
• «Спачатку б лепш касметычны рамонт хаця б зрабілі, стомлена ўжо выглядае дом».

Знайшліся і тыя, каго зацікавіла меркаванне саміх жыхароў незвычайнага дома:

• «А людзям, якія там жывуць, падабаецца вось гэта?»
• «Прыгожа выглядае… а жыхары не скардзіліся? Можа, у кватэры ідзе адсвет».

Зрэшты, былі і станоўчыя водгукі. Некаторыя жыхары лічаць, што любое добраўпарадкаванне ідзе гораду на карысць:

• «Наш горад прыгожы і дагледжаны! Дзякуй усім, хто працуе над добраўпарадкаваннем і падтрымлівае яго!»
• «Прыгожа, незвычайна! Радуемся любым навінам у горадзе!»

У выніку новая падсветка «Шпакоўні» стала павадай для старога спору. Адны бачаць у ёй спосаб падкрэсліць унікальную архітэктуру аднаго з сімвалаў Бабруйска. Іншыя лічаць, што падсвечваць варта ўжо адрамантаваны будынак, а не фасад, які, на думку гараджан, даўно патрабуе абнаўлення. Гледзячы па каментарах, неонавая стужка змагла зрабіць дом ярчэйшым вечарамі, але пытанні пра яго стан пры дзённым святле нікуды не зніклі.

Чытайце таксама: Пасля скаргі ў TikTok у Бабруйску пераставілі самакаты? Жанчына заявіла, што ў горадзе «навялі парадак»