«Дзень ведаў ці дзень забойстваў?» У Магілёўскай школе перад вучнямі выступілі людзі з аўтаматамі

У магілёўскай школе №12 падчас лінейкі да Дня ведаў адбылося выступленне ваенна-патрыятычнага клуба «Брыгада». Перад вучнямі выступілі людзі ў ваеннай форме і балаклавах, якія дэманстравалі зброю.

Чытайце таксама: На Гомельшчыне з помпай адкрылі чарговую «парту героя»

Кадры з выступлення распаўсюдзіліся ў сацсетках. Яны выклікалі негатыўную рэакцыю ў часткі беларусаў, якія не зразумелі, навошта школьную лінейку вырашылі дапоўніць такой дэманстрацыяй.

Што трапіла на відэа

На роліку відаць вялікую групу школьнікаў, якія стаяць побач з будынкам школы і назіраюць за выступленнем. Перад імі на брукаванай пляцоўцы — некалькі маладых хлопцаў у камуфляжы і балаклавах.

Яны знаходзяцца ў становішчы лежачы і трымаюць у руках зброю, накіроўваючы яе наперад. На фоне за імі стаяць вучні, многія з якіх здымаюць тое, што адбываецца, на тэлефоны. Пасля яны праводзяць дэманстрацыю ваеннай падрыхтоўкі.

«Я думала, 1 верасня — гэта дзень ведаў»

Відэа беларусы актыўна абмеркавалі ў Threads. Ролік дайшоў нават да замежнай аўдыторыі — з Расеі і Украіны. Некаторыя карыстальнікі звярнулі ўвагу на тое, што школьная лінейка, прысвечаная пачатку навучальнага года, ператвараецца ў дэманстрацыю ваеннай атрыбутыкі.

• «Відавочны перабор, дырэктара на разбор палётаў — няхай растлумачыць сэнсавую нагрузку гэтага “выступлення”».

Іншая карыстальніца напісала:

• «Я думала, 1 верасня — гэта дзень ведаў, а не дзень забойстваў».

Яшчэ адзін каментатар прыгадаў базавыя правілы абыходжання са зброяй:

• «У арміі, калі служыў, на вучэннях з вагнераўцамі яны казалі пра 2 галоўныя правілы: 1. Ніколі не трымай палец на спускавым кручку. 2. Ніколі не наводзь зброю на чалавека, нават калі ты ўпэўнены, што яна разраджаная».

«На вайну рыхтуюць дзяцей»

Некаторыя рэакцыі былі яшчэ больш рэзкімі.

• «Канцлагер Паўночная Беларусь. Школа строгага рэжыму. Рыхтуюць рабоў і надсмотршчыкаў. Настаўнікі — тупы пакорлівы статак баранаў. Ганьба!».
• «Пасля такіх кадраў хочацца, каб гэтая памыйніца згарэла, як у фільме “Тэрмінатар-2”».
• «Школа: мы клапоцімся пра псіхалагічную бяспеку дзяцей. Таксама школа».
• «Гэта ўжо абсалютна прабітае дно».
• «На вайну рыхтуюць дзяцей».
• «Расейскі трэш крадзецца па Беларусі. Спачатку зрабілі расейскую школу, а цяпер культуру прасоўваюць».

Знайшліся і тыя каментатары, якія не стрымаліся ў жартах:

• «Не трэба панікі — усю зброю прадаставіў “Пінскдрэў”».

Іншыя людзі таксама не хавалі асуджэння:

• «Робяць яны, а сорамна мне».
• «Навошта гэты цырк?»

На дадзены момант з боку школы №12 або клуба «Брыгада» няма тлумачэння, чаму менавіта такі фармат выступлення быў абраны для школьнай лінейкі.

Чытайце таксама: Марш вместо песочницы: дошколят в Лельчицах посвятили в «патриоты»