«Я ў шоку ад ідэі напалохаць жывёл у заасадзе». Магілёўцы раскрытыкавалі салют у Буйнічах і новую лакацыю «свята»

Сёлета вячэрні канцэрт і салют на Дзень незалежнасці ў Магілёве ўпершыню правялі каля Музея Славы Магілёўшчыны на Буйніцкім полі. Улады загадзя называлі гэтую пляцоўку самай маштабнай святочнай зонай у гісторыі горада, абяцалі вялікую сцэну, больш за тысячу артыстаў, дадатковыя аўтобусы і феерверк а 23.00. Аднак пасля свята ў сацсетках пачалося абмеркаванне: многім не спадабаліся лагістыка, паркоўкі і сама ідэя запускаць салют побач з заасадам.

Чытайце таксама: «Рускі мір» у Магілёве? Горад за адзін дзень адкрыў адразу тры новыя расійскія аб’екты

З паркоўкамі і выездам пасля мерапрыемства былі праблемы

Адзін з карыстальнікаў Threads спытаў магілёўцаў, як ім арганізацыя канцэрта і салюту ў Буйнічах. Меркаванні падзяліліся. Частка жыхароў лічыць, што месца выбралі лагічна. Буйніцкае поле звязанае з ваеннай гісторыяй горада, а Дзень Незалежнасці, на іх думку, дарэчы адзначаць менавіта там: «Буйніцкае поле — гэта тое месца, дзе нашы дзяды і прадзеды абаранялі горад. Месца для салюту выбранае правільна, і гэта не толькі свята, гэта даніна павагі ўсім героям».

Некаторыя адзначылі, што тэрыторыя сапраўды вялікая, а арганізатары пусцілі аўтобусы. Але нават тыя, каму сама лакацыя спадабалася, прызнавалі: з паркоўкамі і выездам пасля мерапрыемства былі праблемы:

• «Арганізацыя і салют — выдатна! Шмат месца, вальней, чым на плошчы. Але далёка проста жах, коркі, парковак няма. Так, пусцілі транспарт, але з’ехаць усё роўна было велізарнай праблемай».
• «У цэнтр многія могуць прыйсці і сысці пешшу, а вось з Буйніч — такое сабе».
• «50 хвілін выязджалі адтуль. На гэтым усё».

Былі пытанні і да бытавой арганізацыі свята. Адна з жыхарак распавяла, што яе дачка ўдзельнічала ў канцэрце, але туалет апынуўся па-за межамі агароджы. Каб вярнуцца назад, трэба было зноў праходзіць надгляд, а ў туалет у будынку музея, паводле яе слоў, пускалі толькі VIP-гасцей.

У сетцы кожны ваш клік пакідае след, які могуць выкарыстоўваць супраць вас. Не дазваляйце ператвараць вашыя інтарэсы ў крымінальныя справы. Уключайце BGlobal VPN — будзьце нябачныя для старонніх вачэй.

Спасылка на падключэнне BGlobal VPN – тут

Чытайце таксама: «Куда смотрят власти?»: беларусы спорят о вечеринке в стиле техно-рейв в Беловежской пуще

Запускаць феерверк у такой блізкасці ад жывёл — сумнеўная ідэя

Галоўная крытыка датычылася не коркаў, а жывёл. Магілёўцы нагадалі, што побач знаходзіцца заасад, а запускаць феерверк у такой блізкасці ад жывёл — сумнеўная ідэя:

• «Салют побач з месцам, дзе знаходзяцца жывёлы».
• «Я ў шоку ад ідэі напалохаць жывёл у заасадзе».
• «Бедныя жывёлы! Вось нацярпеліся! Вельмі шкада іх! І не ў радасць быў гэты салют. Адна думка: як яны там у сваіх клетках?»

Некаторыя ўзгадалі гісторыю, якую ў Магілёве абмяркоўвалі яшчэ шмат гадоў таму. Паводле слоў каментатараў, у 2005 годзе ў Буйнічах пасля вясельнага салюту каля рэстарана памёр вярблюд, і пасля гэтага такія салюты там забаранілі: «Чуць яны чуюць, але гэта далёка. Успомніце, калі ў 2005 годзе памёр вярблюд праз вясельны салют у рэстаране. Пасля яго смерці ў Буйнічах у рэстаране салюты забаранілі».

Частка магілёўцаў лічыць, што для салюту лепш было пакінуць звыклыя гарадскія лакацыі: «Самая лепшая лакацыя — гэта Падніколле. Задняпроўе глядзіць са свайго берага, цэнтр — з плошчы. Галоўнае, усім відаць, многія пешшу ішлі без праблем. Новае не заўсёды зручнейшае за старое».

У Еўропе гарады ўжо адмаўляюцца ад такой традыцыі менавіта праз жывёл

Гісторыя з магілёўскім салютам добра паказвае, як змяняецца стаўленне да феерверкаў. Улады Беларусі па-ранейшаму ўспрымаюць іх як абавязковую частку вялікіх свят, але ў Еўропе гарады ўжо адмаўляюцца ад такой традыцыі менавіта праз жывёл.

Напрыклад, Варшава яшчэ ў 2018 годзе замяніла навагоднія феерверкі лазерным шоу і рэгулярна заклікае жыхароў не выкарыстоўваць піратэхніку, бо гучныя выбухі выклікаюць паніку ў хатніх жывёл, птушак і насельнікаў заапарка.

У Румыніі ад навагодніх салютаў дзеля жывёл і навакольнага асяроддзя адмовіліся Канстанца, Ясы, Клуж-Напока, Брашоў і іншыя гарады. У Нідэрландах забарона на феерверкі павінна ўступіць у сілу з 2027 года.

Чытайце таксама: Запрет на фейерверки в Беларуси вызвал бурную реакцию: одни радуются тишине, другие говорят, что у них отняли праздник