Месца працы стала турмой: настаўнік пра забарону тэлефонаў

Адзін з беларускіх настаўнікаў, Ян, распавёў BGmedia, як забарона на выкарыстанне тэлефонаў паўплывала на навучальны працэс і што цяпер адбываецца ў школе, дзе ён працуе.

— Пачну з таго, што месца, дзе я працую, ператварылася ў нейкую турму: камеры, прапускная сістэма, а зараз яшчэ і забарона на выкарыстанне тэлефонаў. З пункту гледжання маёй працы, вядома, непрыемна ўсведамляць, што раней я мог даваць заданні з выкарыстаннем інтэрнета, напрыклад на ўроках грамадазнаўства (у падручніку нават прадугледжана зайсці на сайт, нешта паглядзець і прааналізаваць). Цяпер гэта зрабіць немагчыма. Каб выкарыстоўваць тэлефоны на занятку, трэба выканаць мноства правіл, і ў выніку я зразумеў, што мне гэта не трэба.

Читайте также: Толкучка и телефонный апокалипсис: мама из Пинска пожаловалась на новые правила со смартфонами в школе

Учора я чытаў уступную лекцыю для 10-класнікаў па грамадазнаўстве, і там гаварылася аб неабходнасці развіцця IT-таварыства. У цэлым падручнікі па грамадазнаўстве накіраваны на выкарыстанне інтэрнет-рэсурсаў навучэнцамі. На занятках гэта было мэтазгодна: я тлумачыў матэрыял, а пасля вучні выконвалі заданні, замацоўваючы вывучанае праз практычную пошукавую дзейнасць. Цяпер гэта давядзецца пераносіць на хатнія заданні, і навучэнцы проста не будуць гэтага рабіць. На ўроку гэта хаця б абгрунтавана. Тут ужо не ідзе размова аб адукацыі. Гэта прымусовае выхаванне: абавязковае нашэнне сімволікі, герба, веданне гімна. На маю думку, гэта не вельмі добра.

Адказваючы на пытанне аб захоўванні тэлефонаў, Ян паведаміў, што тэлефоны вучняў захоўваюцца ў кабінеце класнага кіраўніка: у школы проста не знайшлося сродкаў на асобную шафу. Самім настаўнікам забаронена карыстацца тэлефонамі падчас навучальнага працэсу. Іх дазволена браць толькі на перапынку, а падчас заняткаў дазваляецца выкарыстоўваць для сувязі з адміністрацыяй (экстранай), у выпадку пагрозы здароўю навучэнцам.

Калі казаць пра спосабы абыходу правілаў, журналістка BGmedia ўзгадала метад, які выкарыстоўваецца ў турмах ці некаторых бальніцах Беларусі: нашэнне з сабой маленькага (часта кнопкавага) тэлефона, схаванага ў бялізне, альбо ва ўнутраных кішэнях. Мы паглядзелі, колькі каштуюць у Беларусі маленькія тэлефоны на дадзены момант.

Самыя танныя кнопкавыя тэлефоны ў каталогу Onliner. Таннейшыя мадэлі належаць расейскай фірме TeXet і каштуюць ад 39 да 65 рублёў. Найдаражэйшыя — фінскай фірмы Nokia, іх цана вар’іруецца ад 85 да 525 рублёў. Большым попытам карыстаюцца менавіта мадэлі Nokia, пра што сведчаць колькасць водгукаў. Класічныя мадэлі 2000-х гадоў (напрыклад, Nokia 6230i) ужо недаступныя для Інтэрнэт-замовы, бо іх раскупілі.

Калі казаць пра выбар тэлефонаў на Aliexpress, можна заўважыць вельмі маленькія мадэлі ад маркі SERVO (кнопкавыя і сэнсарныя), якія можна непрыкметна насіць з сабой. Кошты на іх вар’ююцца ад 11 да 105 бел. рублёў.

Цалкам верагодна, што ў цяперашняй сітуацыі попыт на маленькія тэлефоны можа рэзка павялічыцца. Сёняшнія школьныя рэформы могуць вярнуць адукацыйны працэс на дваццаць пяць гадоў назад, калі людзі карысталіся менавіта такімі прыладамі.