«Гэта што за вірус?»: мінскай «ябацьке» не спадабаліся надпісы на дзіцячай пляцоўцы

Прыхільніца Лукашэнкі не задаволеная сітуацыяй на дзіцячай пляцоўцы ў раёне «Мінск-Свет». Па яе словах, там пастаянна працягваюць з’яўляцца надпісы з народнымі воклічамі, як «Верым можам, пераможам», а таксама белыя палоскі на чырвоным пакрыцці, што ўтвараюць бел-чырвона-белы сцяг.

Чытайце таксама: «Ябацька» здзівілася коштам на партрэты Лукашэнкі — ёй жорстка адказалі людзі

Жанчына пад нікам lana.holl апублікавала ў TikTok відэа, у якім паказала дзіцячую пляцоўку, дзе, паводле яе слоў, «людзі ўсё ніяк не супакояцца».

Пляцоўку рэгулярна размалёўваюць, і аўтарка не разумее, што рухае тымі, хто гэта робіць.

«Напэўна гэта нейкі вірус іх моцна трымае, што ім нічога не дапамагае. Усё пераможам, верым… Я не магу. Іх напэўна неяк пакусалі? Вось гэтыя малюнкі тут з’яўляюцца кожны раз! Іх зачышчаюць, але яны нанова з’яўляюцца. Вось што людзям трэба? У каго мозг проста ўжо згніў… Вось гэта яўна малююць падлеткі хутчэй за ўсё. Ім год па дзесяць, максімум дванаццаць. Размовы іх таксама можна паслухаць, там вушы ўжо скручваюцца», — адзначае аўтарка відэа.

Жанчына абураецца тым, што надпісы знікаюць толькі на кароткі час, бо людзі вяртаюцца і малююць іх нанова.

@lana.holl #беларусь🇧🇾 #бчб #минск #город ♬ Oh No — Kreepa

Што адказалі жанчыне

У каментарах сустрэліся прыхільнікі Лукашэнкі, якія пагадзіліся з аўтаркай відэа. Некаторыя з іх адзначылі, што гэтыя надпісы вельмі страшныя, і за іх людзей трэба саджаць у турмы ці прыцягваць да грамадскіх работ.

Аднак сустрэліся і тыя каментатары, якія падтрымалі «невядомых» мастакоў.

• «Малайцы рабяты. Стаяць за свабоду».
• «Значыць народ не задаволены рэжымам Лукашэнкі».
• «Жыве Беларусь!».
• «Дзеці вераць у лепшае. Мы ў дзяцінстве таксама малявалі сваю будучыню».
• «Ха-ха! Мінчане ведаюць, куды пераехала вёска!», — жартуюць людзі пра аўтарку відэа.
• «Дзеці малююць крэйдай, так было заўсёды. Не бачу праблемаў. Беларускую мову практыкуюць».

Сама сітуацыя наглядна паказвае, што нягледзячы на суцэльныя рэпрэсіі, якія працягваюцца ў краіне, людзі ўсё адно знаходзяць спосабы праяўляць народную салідарнасць — нават праз простыя надпісы на асфальце.

Чытайце таксама: На Гродзенскім шклозаводзе супрацоўнікаў прымусілі запісваць праўладны TikTok. Пад «баладу аб дыктатары»