«Ні пенсіі, ні заробку, ніякай кампенсацыі». Беларуска распавяла пра пошук працы

Беларуская блогерка Яна размясціла відэа, у якім распавяла пра тое, што не можа знайсці працу ў родным горадзе. BGmedia паглядзела, што менавіта не спадабалася дзяўчыне ў мясцовым рынку працы.

«Прайшла тры сумоўі — і засталося столькі пытанняў»

«Упершыню з гэтым сутыкаюся, і відавочна, што з такім сутыкаюцца цяпер абсалютна ўсе.  Таму што ў Магілёве, у маім горадзе, з насельніцтвам 350 000 чалавек як быццам павінна быць нармальна развітая гэтая інфраструктура. Але не! Прабачце… Я прайшла тры сумоўі, і ў мяне з’явілася кіпа пытанняў да працадаўцаў», — распавядае Яна.

Чытайце таксама: «Цяпер і абдымацца нельга». Суд пакараў штрафам арганізатарку «кадл паці»

Першае, што здзівіла блогерку, гэта нізкі заробак: «Чаму вы (працадаўцы) вырашылі, што можаце вешаць на аднаго чалавека тры спецыяльнасці, пры гэтым плаціць яму так, нібыта ён у вас працуе на 0,5 стаўкі?».

Таксама дзяўчына звярнула ўвагу на праблему, калі прыватныя кампаніі добра эканомяць на ФСАН, і ўладкоўваюць сваіх супрацоўнікаў на 0,5 стаўкі, пры гэтым плоцяць ім вельмі мала: «І пенсіі ў цябе няма і зарплаты няма, абсалютна ніякай кампенсацыі».

Яна таксама закранула пытанне доўгага графіку, які не адпавядае заробку: «Графік з восьмай раніцы па дзясятую гадзіну вечара. Перапрацоўка да 50 гадзін зверху, а зарплата – 1000 рублёў… А начныя змены… Шэсць ці сем начных зменаў на месяц, па меркаванні працадаўцаў, гэта нармальна і добра, гадзінку можаце паспаць. Зарплата дагэтуль складае 1000 рублёў. А што мне рабіць на гэтую адну тысячу? Як мне на яе жыць?».

@_panixes‼️я не говорила что меня нигде не берут, меня не устраивают условия♬ W.A.Mozart Eine kleine Nachtmusik, Allegro — AllMusicGallery

Падчас саміх сумоўяў, па словах дзяўчыны, калі яна выглядала прэзентабельна, ёй казалі, што яна не падобная да чалавека, які можа працаваць у іх кампаніі. «А як я павінна выглядаць? Калі я прыходжу на сумоўе, у гэтага мужлана ўжо ёсць да мяне прадузятае стаўленне накшталт: яна занадта сімпатычная бландзінка. Напэўна, яна тупая, таму не зможа ў нас працаваць».

«Бывае, што спецыяліст кажа мне, што не бачыць мяне ў гэтай спецыяльнасці і што я не падыходжу. Я яму адказваю, што, як спецыяліст, я ні разу не паказала свой функцыянал. Чаму вы адразу робіце такія высновы?» — дзеліцца Яна.

«Ну вы разумееце, што сумоўе — гэта ўжо продаж сябе. А вы сябе ўжо не прадалі», — адзначылі працадаўцы. «Пры гэтым усё сумоўе я проста слухала інфармацыю, якая тычылася маёй працы, і ківала. Не зразумела, у які момант я павінна была выстраліць і здзівіць яго сваімі здольнасцямі», — сказала дзяўчына.

Блогерка прайшлася і па заробках у салонах прыгажосці: «Дзяўчынкі, якія працуюць там за 700–800 рублёў, па 30 рублёў на дзень, што вы там забылі? Я не разумею. Гэта трэба, каб цябе хтосьці паралельна ўтрымліваў, ці каб ты жыў з бацькамі, ці каб табе давалі грошы. Таму што пражыць на 800 рублёў трэба яшчэ пастарацца».

«Пры гэтым адкрыць штосьці сваё і рабіць штосьці сваё не дазваляе фінансавы бок пытання, дзе ты мусіш укласці грошы, якія ты нават не можаш адкласці, таму што табе плацяць 800 рублёў. І зноў жа, мы вяртаемся да таго, што вельмі маленькі заробак. Шчыра, не ведаю, што казаць. Напэўна, усё ж такі эскорт», — жартуе дзяўчына.

Чытайце таксама: Маці распавяла дачцы пра кошты на жытло ў Беларусі. Рэакцыя дзіцяці бескаштоўная

«Мне сказалі, што я занадта разумны»

Што на гэта сказалі людзі? Многія каментатары падтрымалі дзяўчыну і падзяліліся сваім няўдалым досведам працаўладкавання ў Беларусі.

«Фраза “мы не бачым вас на гэтай працы” — не пра здольнасці, а пра тое, што „вы не падобныя на чалавека, які пойдзе на цяжкую працу за капейкі“, і прыстойны знешні выгляд толькі пацвярджае гэта».

«Мяне папрасілі прайсці тэст на веданне расейскай мовы і тэст IQ. Вынікі адпаведна 97 са 100, IQ – 149. Сказалі, што не падыходжу».

«У Віцебску такая ж бяда: за нармальны заробак працы няма. Дзве вышэйшыя адукацыі ў тэхніцы і электроніцы, восем дадатковых «скарынак», больш за 15 год працавога стажа. Прапаноўваюць за 1200 марнаваць час на смерць. Давялося штосьці сваё арганізоўваць».

«Я таксама з Магілёва і таксама не магу знайсці працу. Юрыст, чырвоны дыплом. Ці заробак 800–1300, што мяне не задавальняе, бо я наеўся гэтай ЗП. На заводах ёсць ЗП па 2000+ руб., але мяне не бяруць. Таму што не вераць, што юрыст зможа працаваць на заводзе, хоць я моцнага целаскладу, працу люблю і г.д.».

Апошняму каментатару прапанавалі ўладкавацца юрыстам у Мінску за добры заробак, але ён нагадаў пра тое, што шматлікія грамадзяне занесеныя ў чорны спіс КДБ за лайкі і іншую драбязу, праз што многія прадпрыемствы не бяруць на працу, нават калі вас не прыцягвалі па адміністрацыйнай ці крымінальнай справе.

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро