«Прымусілі чысціць бульбу і слухаць беларускія песні. А я не супраць». Што казалі ўкраінцы ў Кіеве на Дзень Волі

25 сакавіка беларусы Кіева адзначылі Дзень Волі разам з украінцамі. У парку імя Шаўчэнкі яны зладзілі частаванне мінакоў дранікамі, а таксама раздавалі налепкі, улёткі з расповедам пра БНР. Усё гэта — пад беларускую музыку.

«Радыё Свабода» паразмаўляла з удзельнікамі і задало пытанні, што яны ведаюць пра Дзень Волі ды як ставяцца да беларусаў. 

— Беларусы Кіева вырашылі адсвяткаваць гэтае свята разам з Кіевам і прыгасціць усіх, хто захоча, дранікамі, — патлумачыла арганізатарка акцыі, беларуска Ірына. 

— Вельмі дзякую, мне спадабалася, — дзеліцца ўражаннямі па-беларуску ўкраінка Вольга. 

— Вы ведаеце, што сёння за дзень? 

— Канешне, сёння Дзень Волі.

— Адкуль вы так добра ведаеце беларускую мову?

— У мяне хлопец ваюе ў Палку Каліноўскага, ён гаворыць па-беларуску, таму крыху ведаю, — тлумачыць дзяўчына. 

— Беларускае нацыянальнае свята, Дзень Волі, — гэта, здаецца, гадавіна стварэння Беларускай Народнай Рэспублікі. 105 гадоў таму ці колькі? — выкладае факты ўкраінец Мікола. Хлопец распавядае, што ў яго шмат знаёмых беларусаў, і стаўленне да народу не змянілася. Іншая справа «бацька» Лукашэнка і ўсё астатняе. 

Читайте также: Евгений Магда: «Беларусы для украинцев не бело-красно-белые и не красно-зеленые, а черно-белые»

Украінскія валанцеры Яўген і Дмітро шчыруюць за патэльнямі з дранікамі.

— Хлопцы, што вы тут робіце? Гэта ж беларускае свята.

— Усё сталася вельмі спантанна. Пацямнела ў вачах, і я прачнуўся каля мяшкоў з бульбай, мяне прымусілі яе чысціць ды слухаць беларускія песні. Але я не вельмі супраць, — са смехам распавядае Дмітро.

— Вядома, гэта вы па-стэрэатыпнаму так вырышылі, — кажа пра дранікі ўкраінец Мікола. — Але гэта вельмі вясёлая акцыя. Я падтрымліваю. Паболей бы такіх. Да гэтага я не разумеў, што гэта за дзень, а зараз буду ведаць. Дзень вашай волі, незалежнасці Беларускай Народнай Рэспублікі. Калі шчыра, ніколі не падзяляў людзей па нацыях. Я стаўлюся да ўсіх аднолькава, да адэкватных. А да тых, хто падтрымлівае вайну я, канешне, стаўлюся негатыўна. Да беларусаў, якія нас падтрымліваюць, — з вялікай павагай, а якія заклікаюць да забойстваў, якія ўсё гэта падтрымліваюць, — з пагардай.

— У мяне там ёсць сям’я, — кажа пра Беларусь украінка Юлія. — Не сям’я, якая па крыві, але сям’я, якая ў душы, і яна для мяне вельмі важная. Гэта адзін чалавек, але я яго вельмі люблю і вельмі спадзяюся, што ў Беларусі ўсё будзе добра, і мы хутка зможам сустрэцца, не прыязджаючы кудысьці ў іншую краіну, Турцыю ці яшчэ штосьці. Жыць дзесьці далёка ад сям’і і не мець магчымасці ўбачыцца дужа балюча. 

«Гэта як Дзень незалежнасці Украіны, толькі Дзень Волі Беларусі. Я вельмі спадзяюся, што мы калісьці гэты дзень будзем святкаваць як рэальнае свята, і нарэшце не будзе гэтага сцяга з чырвоным верхам і зялёным нізам, а будзе сапраўдны сцяг Беларускай Народнай Рэспублікі — был-чырвона-белы».

— Украіна — гэта мой дом цяпер. Я люблю гэтую краіну, буду тут жыць і жыву, і буду змагацца за яе і за сваю родную Беларусь, — кажа арганізатарка Ірына. — Калі казаць пра людзей, то ў асноўным яны падтрымліваюць, і нават сёння, калі мы сюды прыйшлі, усе падтрымлівалі, усе казалі нам добрыя словы, і толькі адна жанчына сказала: «А чаму вы не там, не ў Беларусі?» Але потым і ўзяла налепкі, і пачаставалася дранікамі, і пачытала нашу ўлётку. 

Па словах беларускі, праблемы ў асноўным узнікаюць на ўзроўні адносін з дзяржавай, а людзі збольшага разумеюць, што адбываецца. 

Читайте также: Вспоминаем, как в Бресте пять лет назад отмечали День Воли и как власти поменяли отношение к БЧБ-флагу (много фото)

— Я не думаю, што адной акцыяй можна змяніць думку пра беларусаў, але можна зрабіць штуршок да таго, каб людзі хаця б пачалі цікавіцца, — кажа ўкраінка Алена. 

Як святкавалі Дзень Волі беларусы за мяжой: фота

На фота — акцыі, якія прайшлі ва Украіне, Польшчы, Літве, Грузіі, Бельгіі і ЗША.