«TikTok — сіла, больш нічога не дапамагае». Пасля скаргі ў сацсетках затоплены падвал у Бабруйску прыбралі

Гісторыя з затопленым падвалам дома №5 на вуліцы Маскоўскай у Бабруйску атрымала шчаслівы працяг. Пасля серыі відэа мясцовага жыхара камунальнікі прачысцілі каналізацыю і прыбралі памяшканне. Аднак тлумачэнне службаў выклікала новую хвалю крытыкі: бабруйчане лічаць, што праблему пачалі вырашаць толькі пасля агалоскі ў TikTok.

Чытайце таксама: «Магу і сам прапаўзці па гэтым г**не». Жыхар Бабруйска паказаў затоплены падвал пасля месяца безвыніковых скаргаў

Камунальнікі заклікалі жыхароў не выкідваць смецце ў каналізацыю

Раней мужчына паказваў падвал, заліты каналізацыйнымі сцёкамі, пашкоджаныя канструкцыі і разбітыя вокны. Паводле яго слоў, ён каля месяца звяртаўся да камунальнікаў, у службу 115 і да супрацоўнікаў інтэрната, але выніку не было. Пасля першых ролікаў уваход у падвал закрылі новым навясным замком, што аўтар відэа ўспрыняў як спробу схаваць праблему замест яе вырашэння.

@user18553235715151♬ оригинальный звук — Гена Вильчинский

@user18553235715151♬ оригинальный звук — Гена Вильчинский

@user18553235715151♬ оригинальный звук — Гена Вильчинский

Цяпер сітуацыю пракаментаваў тэлеканал «Бабруйск 360». У КУП «ЖРЭУ Ленінскага раёна Бабруйска» паведамілі, што каналізацыя ў інтэрнаце засмецілася некалькі дзён таму, з-за чаго сцёкавая вада трапіла ў падвал. Паводле афіцыйнай версіі, засор ужо ліквідавалі, інжынерныя сеткі прачысцілі, а цокальнае памяшканне прыбралі.

Камунальнікі таксама заклікалі жыхароў не выкідваць смецце ў каналізацыю, паколькі гэта прыводзіць да сур’ёзных засораў. Акрамя таго, яны паабяцалі, што ў 2027 годзе будынак чакае капітальны рамонт.

Без публікацыі ролікаў камунальнікі працягвалі б ігнараваць скаргі

Але жыхароў асабліва абурыла фармулёўка пра тое, што праблема ўзнікла толькі некалькі дзён таму. Яны нагадалі, што аўтар відэа сцвярджаў адваротнае і здымаў затоплены падвал у рэальным часе.

«Смешна слухаць, што са студзеня не паступала зваротаў. Мужчына ў сланцах узімку хадзіў па затопленым падвале. Прыгожа гаварыць яны ўмеюць», — напісала адна з каментатарак.

Многія ўпэўненыя, што без публікацыі ролікаў камунальнікі працягвалі б ігнараваць скаргі:

• «Толькі пасля таго, як дзядуля паскардзіўся, пачалі працаваць».
• «TikTok — сіла, больш нічога не дапамагае ў Бабруйску».

У каментарыях людзі зноў паскардзіліся на працу гарадскіх ЖЭУ. Адны сцвярджаюць, што для вырашэння нават невялікай праблемы даводзіцца шматкроць тэлефанаваць, звяртацца на гарачыя лініі і ў выканкам. Іншыя распавялі пра прамярзаючыя сцены, цвіль, слабы напор вады, нескошаную траву і забытыя ўскраіны горада.

Пры гэтым частка карыстальнікаў TikTok пагадзілася, што прычынай засораў нярэдка становяцца самі жыхары, якія выкідваюць у каналізацыю староннія прадметы. Аднак яны нагадалі, што праблемы могуць узнікаць і праз старыя трубы, перагружаныя сеткі або тэхнічныя няспраўнасці.

У выніку падвал усё ж прыбралі, а засор ліквідавалі. Але для многіх жыхароў Бабруйска гэтая гісторыя стала чарговым пацвярджэннем знаёмай схемы: пакуль чалавек проста звяртаецца ў камунальныя службы, яго скаргі могуць заставацца без адказу. Рэальная праца пачынаецца толькі пасля таго, як відэа набірае прагляды і праблема становіцца публічнай.

Чытайце таксама: «Кто-то целенаправленно уродует город». Новый цветочный арт-объект в Бобруйске вызвал волну критики