«Выйшла пагуляць, а парку ўжо амаль няма»: у парку «Мядзвежына» заўважылі вырубку дрэваў

Беларуска Наталля апублікавала відэа ў TikTok, у якім звярнула ўвагу на вырубку дрэваў у лесапарку «Мядзвежына», што знаходзіцца ў Фрунзенскім раёне Мінск.

Чытайце таксама: На адной з вуліц у Пінску вырубілі дрэвы: гэта выклікала спрэчкі ў гараджанаў

Паводле яе словаў, яшчэ зусім нядаўна падчас шпацыру яна бачыла там зялёны масіў, але ў нейкі момант дрэвы проста зніклі — на іх месцы засталіся толькі пні. Менавіта гэта і выклікала абурэнне ў сацсетках.

@natalidominion Лесопарк Медвежино 😲🥺😞 #природа #жизнь #работа #2026 #рекомендации ♬ som original — AV music

Гэта адбываецца не ўпершыню

Падобная сітуацыя ўжо ўзнікала раней. Яшчэ ў 2023 годзе мінчане звярталі ўвагу, што зялёная зона ў раёне прыкметна скарацілася.

Тады гарадскія службы тлумачылі вырубку распаўсюджаннем шкодніка — караед-тыпограф, які пашкоджвае дрэвы. На месцы высечаных участкаў абяцалі высадзіць новыя яліны.

Аднак праз год, як адзначаюць жыхары, сітуацыя не толькі не палепшылася, але і пагоршылася: вырубкі працягнуліся і сталі яшчэ больш маштабнымі. Пры гэтым, па словах людзей, пад пілу траплялі і з выгляду здаровыя дрэвы.

Галоўны ляснічы Мінскай лесагаспадаркі Дзмітрый Касач раней заяўляў, што сітуацыя знаходзіцца пад кантролем і пагрозы для лесу няма.

Па яго словах, работы звязаныя з ліквідацыяй ачагоў шкодніка:

«У гэтым годзе мы працягваем знішчаць ачагі паражэння караеда-тыпографа. Яшчэ каля гектара тэрыторыі падпадзе пад суцэльныя санітарныя рубкі. На масіве больш за 30 гектараў, дзе ёсць невялікія групы высахлых дрэў, таксама будуць праводзіцца выбарачныя рубкі. Важна разумець: ялінка можа выглядаць зялёнай, але яе кара ўжо высыхае і адслаіцца — такое дрэва лічыцца загінулым».

Ён таксама сцвярджаў, што на месцы вырубак ужо з’явіліся новыя пасадкі:

«Там, дзе ў мінулым годзе праводзіліся вырубкі, мы высадзілі тры ўчасткі новых лясных культур — гэта каля гектара».

Акрамя таго, частка дрэваў, паводле афіцыйнай інфармацыі, была пашкоджана і высахла пасля моцнага ўрагану. Аднак гэтыя тлумачэнні пераконваюць не ўсіх.

Дадатковыя тлумачэнні ўладаў

У Telegram-канале адміністрацыі Фрунзенскага раёна паведамлялася, што ў лесапарку таксама праводзяцца работы па добраўпарадкаванні — у тым ліку замена пешаходных дарожак.

Як рэагуюць жыхары

Зыходзячы з каментароў у сацсетках, многія мінчане з жалем успрынялі сітуацыю. Людзі абураюцца маштабамі вырубкі, сумняваюцца ў яе абгрунтаванасці і баяцца, што на месцы зялёнай зоны могуць з’явіцца забудовы. Некаторыя таксама звяртаюць увагу, што нават калі новыя дрэвы высаджваюць, на аднаўленне лесу спатрэбяцца гады.

Вось што пішуць карыстальнікі пад відэа мінчанкі Наталлі:

• «Як такое дапусцілі? У Фрунзенскім раёне і так паркаў вельмі мала!».
• «Навошта? Здаровыя дрэвы высякаюць. Дзе адказныя службы і хто гэта дазваляе?».
• «Напэўна, гандлёвы цэнтр пабудуюць — іх жа “вельмі не хапае”», — з іроніяй адзначаюць у каментарах.
• «Гэта жах… наш прыгожы лес. Чула, што хочуць зрабіць нешта накшталт парку Уга Чавеса або забудуюць дамамі».
• «Мы таксама там былі — гэта проста кашмар, не парк, а адны пні».
• «Раней там было вельмі прыгожа, адна з нямногіх зялёных зон».
• «Спачатку выразалі дрэвы пад выглядам, што яны дрэнныя, а цяпер часткі парку проста няма».

Некаторыя карыстальнікі адзначаюць, што на месцы вырубак з’явіліся маладыя саджанцы. Але і гэта не супакойвае людзей: «Колькі гадоў трэба, каб яны выраслі?», — задаюцца пытаннем карыстальнікі.

Сітуацыя вакол парку «Мядзвежына» зноў падняла пытанне балансу паміж санітарнымі работамі і захаваннем гарадскіх зялёных зон. Пакуль улады гавораць пра неабходнасць вырубак, частка жыхароў бачыць у гэтым празмернае знішчэнне дрэваў і баіцца страты аднаго з нямногіх месцаў для адпачынку ў Фрунзенскім раёне Мінска.

Чытайце таксама: «Дрэвы пасадзілі, цяпер засталося траву пафарбаваць». У Мінску абурыліся пасадкай дрэваў у мёрзлую зямлю