Беларусы абурыліся паляваннем на рэдкага чорнага ваўка ў Гродзенскай вобласці

У Гродзенскай вобласці паляўнічыя здабылі ваўка з незвычайнай для Беларусі чорнай афарбоўкай. Выпадак адбыўся на тэрыторыі Іўеўскай паляўнічай гаспадаркі. Пра гэта паведаміла Беларускае таварыства паляўнічых і рыбаловаў (БТПР).

Чытайце таксама: У Лідскім раёне забілі рэдкага воўка з чорнай афарбоўкай. Што пра гэта кажуць эколагі

Поўсць жывёлы мае амаль вугальна-чорны колер. Для беларускіх ваўкоў такая афарбоўка з’яўляецца вялікай рэдкасцю: звычайна гэтыя драпежнікі маюць шэрую поўсць з рыжаватымі або бурымі адценнямі.

Рэдкая афарбоўка, але той жа від

Чорны воўк не з’яўляецца асобным відам. Гэта звычайны шэры воўк (Canis lupus), у якога праяўляецца меланізм — генетычная асаблівасць, пры якой у поўсці ўтвараецца больш цёмнага пігменту.

Такія жывёлы сустракаюцца ў розных рэгіёнах свету, але ў Еўропе чорныя ваўкі значна радзейшыя, чым у Паўночнай Амерыцы.

У Беларусі выпадкі здабычы ваўкоў з незвычайнай афарбоўкай ужо былі. У снежні 2025 года рэдкага чорнага ваўка здабылі ў Лідскай паляўнічай гаспадарцы. А ў студзені 2026 года падчас палявання ў Салігорскім раёне таксама былі здабытыя два буйныя драпежнікі, адзін з якіх меў чорную поўсць.

Пры гэтым паляванне на ваўка ў Беларусі дазволена на працягу ўсяго года — незалежна ад афарбоўкі жывёлы.

Чым чорныя ваўкі могуць адрознівацца

Незвычайная афарбоўка цікавіць не толькі паляўнічых. Навукоўцы вывучаюць, ці можа генетычная мутацыя, якая адказвае за чорную поўсць, уплываць і на іншыя асаблівасці арганізма.

Экспертка па біяразнастайнасці Інэса Балоціна раней распавядала, што ў жывёл з незвычайнай афарбоўкай могуць назірацца адрозненні ў паводзінах. Паводле яе слоў, у некаторых выпадках асобіны з нетыповымі вонкавымі прыкметамі могуць паводзіць сябе спакайней.

Даследаванні ваўкоў у Паўночнай Амерыцы таксама паказвалі сувязь паміж чорнай афарбоўкай і ўстойлівасцю да сабачай чумы. Чорныя ваўкі часцей мелі антыцелы да віруса і падчас успышак захворвання маглі мець больш высокія шанцы на выжыванне.

Аднак гэтыя даследаванні праводзіліся на паўночнаамерыканскіх папуляцыях, таму непасрэдна пераносіць іх вынікі на беларускіх ваўкоў нельга.

Чаму воўк важны для экасістэмы

Нягледзячы на тое, што ў Беларусі воўк лічыцца аб’ектам палявання, гэты драпежнік мае важную ролю ў прыродзе.

Ваўкі рэгулююць колькасць капытных жывёл, якія з’яўляюцца іх асноўнай здабычай. Гэта асабліва актуальна на фоне росту папуляцый некаторых відаў капытных у Беларусі.

У апошнія гады павялічваецца і колькасць дарожна-транспартных здарэнняў з удзелам дзікіх жывёл. Алені і іншыя капытныя ўсё часцей выходзяць на дарогі, а ў некаторых раёнах наносяць шкоду сельскагаспадарчым культурам.

Сам адстрэл ваўкоў тычыцца можа сур’ёзна закрануць баланс паміж рознымі відамі ў экасістэме.

Як беларусы адрэагавалі на навіну

У каментарах пад навіной беларусы адкрыта асуджаюць паляўнічых і сам прынцып забойства дзікіх жывёл дзеля трафея.

Адзін з каментатараў напісаў, што не разумее, навошта было забіваць жывёлу, якая не ўяўляла небяспекі для чалавека, і задаў пытанне, ці будуць паляўнічыя ўвогуле выкарыстоўваць здабытае мяса:

«Паляўнічыя — гэта, у прынцыпе, нездаровыя людзі. Забіваць жывёлу дзеля забавы могуць толькі вельмі ўбогія, неадэкватныя асобы. Так, былі часы, калі здабыў — тое і з’еў. А цяпер каму есці няма чаго? Ведаю, што не ўсе нават ядуць тое, што забілі. Ім падабаецца сам працэс. Ці можна такіх называць чалавекам, ці можна лічыць іх нармальнымі? Гэты воўк — яны яго будуць есці? Ім галодна жывецца? Затое ў сваім вузкалобым коле яны цяпер з гонарам змогуць расказваць, што і такі звер ёсць у іх трафеях. Як такія мярзотнікі па зямлі ходзяць».

Іншы беларус параўнаў сітуацыю з гісторыяй знішчэння рэдкіх жывёл у мінулым і назваў чорнага ваўка фактычна рэдкім прадстаўніком беларускай фаўны:

«Як апошняга еўрапейскага зубра ў свой час застрэлілі тыя, каго паставілі яго ахоўваць, так і фактычна чырванакніжнага ваўка забілі. Камусьці, відаць, у падарунак — у Драздоўскую калекцыю рэдкасцяў, ці знаёмы шэйх заехаў пацешыцца? Калі ўжо гэтых прыбліжаных нарэшце пачнуць здымаць з іх наседжаных цёпленькіх крэслаў?»

У каментарах таксама гучала думка, што рэдкая афарбоўка павінна была стаць падставай для большай цікавасці да жывой жывёлы, а не прычынай зрабіць з яе паляўнічы трафей.

• «Ну і няхай бы жыў сабе чорны воўк, тым больш рэдкі…»
• «Мярзотнікі, такога прыгажуна забілі!»
• «Навошта? Ён жа рэдкасць!»

Чытайце таксама: Другі выпадак адстрэлу чорнага ваўка: эколаг тлумачыць, што не так з паляўнічай палітыкай у Беларусі