«Спадзяюся, праверка імі зацікавіцца». Беларуска вярнула пратэрмінаваны торт, а потым зноў убачыла яго на вітрыне

Жыхарка Лоева расказала ў Threads гісторыю, якая выклікала абмеркаванне ў каментарыях. Дзяўчына сцвярджае, што купіла ў краме «Капеечка» пратэрмінаваны торт, вярнула яго прадаўцам, а праз некалькі дзён зноў выявіла гэты ж дэсерт на вітрыне.

Чытайце таксама: Скарга на сардэлькі ў TikTok: што адказалі ў мясакамбінаце?

Тэрмін прыдатнасці скончыўся 12 чэрвеня, аднак дата размарозкі значылася 18 чэрвеня

Паводле слоў аўтаркі допісу, гаворка ідзе пра торт «Салодкі арэшак». Ужо дома яна звярнула ўвагу на дзіўнасць з маркіроўкай. На этыкетцы было пазначана, што тэрмін прыдатнасці скончыўся 12 чэрвеня, аднак дата размарозкі значылася 18 чэрвеня. У краме тавар прынялі без спрэчак і вярнулі грошы. Але на гэтым гісторыя не скончылася.

Праз некалькі дзён беларуска зноў зайшла ў тую ж «Капеечку» і заўважыла на вітрыне торт, які, на яе думку, быў тым самым дэсертам. Пры гэтым этыкетка з тэрмінам прыдатнасці аказалася сарванай. «Капеечка», ты што творыш?» — напісала дзяўчына пад фатаграфіяй.

Пацвердзіць, што на вітрыне сапраўды знаходзіўся менавіта той самы торт, які раней вярнулі ў краму, немагчыма. Але калі візуальна параўноўваць два фота, то напрошваецца выснова, што гэта адзін і той жа торт.

Тое, што вы чытаеце і гледзіце ў сетцы, тычыцца толькі вас. Ніхто не павінен падглядваць за вашым экранам і лічыць вашыя падабайкі. Уключайце BGlobal VPN — будзьце нябачныя для любых сістэм сачэння. Заставайцеся ў бяспецы.

Спасылка на падключэнне BGlobal VPN – тут

У каментарыях многія карыстальнікі Threads палічылі сітуацыю сур’ёзным парушэннем і параілі звяртацца ў кантралюючыя органы:

• «Спадзяюся, праверка імі зацікавіцца».
• «Наколькі я разумею, гэта сур’ёзнае парушэнне! Тэрмін прыдатнасці выстаўляе не гандлёвы аб’ект, а вытворца. Маркіроўка даты вытворчасці павінна быць менавіта надрукаваная на этыкетцы, а не наклееная, як тут. Адпраўце сігнал у гарвыканкам або МАРГ — гэта не жарты. Дарэчы, яны самі сябе высеклі: на этыкетцы прыдатны да 12.06, а «размарожана» наклеілі 18.06. Гэта значыць, яны распісаліся ў парушэнні тэрміну прыдатнасці».

Некаторыя каментатары ўбачылі ў гэтай гісторыі больш агульную праблему і заявілі, што скаргі пакупнікоў нярэдка застаюцца без увагі: «Затое па сто разоў правяраюць крамы, у якіх нічога не змаглі знайсці. І чапляюцца да кожнай дробязі. А як праверыць крамы, на якія людзі рэальна скардзяцца, дык гэтага не бачаць».

Чытайце таксама: У каўбасе знайшлі кліпсу? Беларуска паказала нечаканую знаходку ў прадукцыі Магілёўскага мясакамбіната

Пакупнікі балюча рэагуюць на любыя падазрэнні, звязаныя з тэрмінамі прыдатнасці прадуктаў

Іншыя пачалі дзяліцца ўласным негатыўным досведам пакупак: «Купіла салату аліўе ў «Капеечцы». Тэрмін быў у норме, але смак дзіўны. Наступны дзень увесь дзень праблявала. І сырок дзіцяці ўзяла, толькі дома заўважыла, што ён пратэрмінаваны ўжо на некалькі дзён. Зразумела, што пратэрміноўка ёсць усюды, але менавіта тое, што адбываецца ў «Капеечцы», — гэта трэш».

Не абышлося і без скептычных каментарыяў пра працу некаторых крамаў увогуле:

• «Вось так робяць усе крамы, на жаль. Пакуль цвіль не пойдзе, дык і пераклейваюць даты».
• «У «Капеечцы», «Дабраноме», «Грошыку», «Еўраопце Міні» браць сушы, салаты і піражкі — гэта нейкі мазахізм. Усё выглядае вельмі страшненька».

А адзін з карыстальнікаў узгадаў і зусім кур’ёзны выпадак: «Нічога, мы адзін раз заўтрашні торт купілі. Свяжэй не бывае».

Гісторыя з Лоева чарговы раз паказала, наколькі балюча пакупнікі рэагуюць на любыя падазрэнні, звязаныя з тэрмінамі прыдатнасці прадуктаў. Тым больш калі гаворка ідзе пра тавары, якія могуць уяўляць патэнцыйную небяспеку для здароўя.

Сама аўтарка допісу пакуль не паведамляла, ці звярталася яна пасля гэтай гісторыі ў кантралюючыя органы. Аднак, мяркуючы па рэакцыі карыстальнікаў, многія лічаць, што адной публікацыі ў сацсетках для такой сітуацыі недастаткова.

Нагадаем, рэалізацыя пратэрмінаванай прадукцыі ў Беларусі цягне за сабой адміністрацыйную адказнасць у выглядзе штрафу ў памеры да 100 базавых велічынь (да 4,5 тысячы рублёў) для індывідуальных прадпрымальнікаў і юрыдычных асобаў (па ч. 2 арт. 13.11 КаАП РБ). У выпадках грубых парушэнняў сумы штрафаў могуць дасягаць 500 базавых велічынь (22,5 тысячы рублёў).

Чытайце таксама: «Заплаціла за курыцу, а атрымала яшчэ і 127 грамаў тлушчу»: беларуска праверыла папулярны прадукт з крамы