Брэсцкага прадпрымальніка прыцягнулі да адказнасці: бізнес-схема спрацавала супраць яго

Следчы камітэт па Брэсцкай вобласці раскрыў схему ўхілення ад падаткаў праз так званае «драбленне бізнесу».

Як устанавілі следчыя, 37-гадовы індывідуальны прадпрымальнік з Брэста займаўся рознічным продажам тавараў для дома: ад інтэр’еру і посуду да дзіцячых рэчаў і тэкстылю. Каб схаваць рэальныя маштабы дзейнасці, мужчына зарэгістраваў у якасці ІП жонку і маці, працягваючы весці бізнес ад іх імя пад адзіным брэндам у Брэсце, Мінску, Баранавічах і Пінску.

Фактычна ўсе суб’екты былі ўзаемазвязаныя і кантраляваліся ім: карысталіся агульнымі памяшканнямі, праграмамі, штатам і адзіным стылем у рэкламе і сацсетках. Бухгалтэрыю, падатковы і кадравы ўлік вёў адзін чалавек.

Такім чынам прадпрымальнік карыстаўся перавагамі спрошчанай сістэмы падаткаабкладання, штучна дзяліў выручку і пазбягаў перавышэння ўстаноўленых межаў. З ліпеня 2023 па сакавік 2025 года дзяржава недаатрымала больш за 260 тысяч рублёў.

Мужчына прызнаў віну і ўжо кампенсаваў шкоду ў падвойным памеры. На яго маёмасць накладзены арышт на суму звыш 140 тысяч рублёў.

Як паведамілі ў Следчым камітэце, па выніках расследавання яму прад’яўлена абвінавачанне паводле ч. 2 арт. 243 Крымінальнага кодэкса Рэспублікі Беларусь.

Чытайце таксама: «Пасля крадзежу прадпрыняла спробы самазабойства». Суд вынес вырак жыхарцы Брэста