Чыноўнікі «зняпраўдзілі» гісторыю з каровамі, што мерзлі на прадпрыемстве Слуцкага раёна. Але ёсць нюанс

Жыхарка Слуцка Вераніка апублікавала відэаролік у Threads. На ім відаць, у якіх умовах знаходзіліся каровы на прадпрыемстве ААТ «Слуцкая Ніва» у вёсцы Клепчаны. Увесь кароўнік знаходзіўся ў снезе, пакуль жывёлы, па словах жанчыны, мерзлі.

Чытайце таксама: «У нас ферма очень старая». Животноводов сняли в «покаянном» видео из-за «обосранных коров»

Вось, як сама случчанка пракаментавала сітуацыю: «Вось так жывуць каровы ў калгасе «Слуцкая Ніва» ў вёсцы Клепчаны Слуцкага раёна. 30.01.2026, тэмпература паветра -19,5 градусаў». Жанчына размясціла відэа 30 студзеня. Яна не ўдакладняе, калі быў зняты ролік: у той жа дзень ці раней. Дата, пазначаная ў апісанні відэа, можа спасылацца на тэмпературу, якая была ў Слуцку ў дзень публікацыі.

 

View on Threads

 

За кароткі час ролік случчанкі набраў шмат каментароў і праглядаў. Нехта ў каментарах нават адзначыў акаўнт міліцыі Мінска, каб тыя патлумачылі, у якіх умовах знаходзяцца жывёлы на прадпрыемстве. Тыя хутка адказалі і адрапартавалі, што інфармацыя перададзеная па тэрытарыяльнасці.

Як на ролік адрэагавалі чыноўнікі і праўладныя медыя

Пасля таго, як ролік разляцеўся па сацсетках, на месца прыехала аператыўная група для праверкі сітуацыі, паведамляе праўладнае медыя «Мінская праўда». У складзе групы быў Сяргей Прымачэнка, старшыня камітэта па сельскай гаспадарцы і прамысловасці Мінскага абласнога выканаўчага камітэта.

Ён, у сваю чаргу, адзначыў, што будынак «Слуцкай нівы» знаходзіцца ў нармальным стане. А сама інфармацыя, апублікаваная случчанкай, не адпавядае рэчаіснасці. Таксама ён звярнуў увагу на тое, што на момант публікацыі роліка на прадпрыемстве снегу не было.

У самім праўладным медыя заявілі, што відэа апублікавалі з затрымкай, бо 30 студзеня ў Слуцку быў сонечны дзень. Пры гэтым у «Мінскай праўдзе» фактычна пацвердзілі, што на «Слуцкай ніве» сапраўды было шмат снегу, але пра гэта паведамілі «з затрымкай». У якасці прычынаў праблемы назвалі дзве магчымыя прычыны: «Або вароты не былі шчыльна зачыненыя перад пачаткам снегападу, або снег пракраўся ўнутр з-за недастатковай герметычнасці закрыцця». Але замест прамога прызнання праблемы, відэа з кароўніка назвалі «укідам» і «спробай выдаць старое за сенсацыю».

На новых здымках, якія апублікавалі ў медыя 31 чысла, снег адсутнічаў.

Не першы падобны выпадак на прадпрыемствах

Нагадаем, што падобныя праблемы заўважаюць у розных сельгаспрадпрыемствах Беларусі. Так, пракуратура выявіла шматлікія факты безгаспадарчасці на фермах ААТ «Чэрыкаў агра».

У памяшканнях, дзе ўтрымліваецца буйная рагатая жывёла, не былі прынятыя належныя меры па ўцяпленні і добраўпарадкаванні. Дахі і аконныя праёмы мелі пашкоджанні, а вада ў ёмістасцях для паення скаціны замярзала. У кармах для жывёлы пракуроры выявілі кавалкі лёду, а таксама палімерную плёнку.

Небяспеку для работнікаў стваралі і вялікія ледзяшы, якія звісалі са стрэхаў фермаў. Яшчэ адным сур’ёзным парушэннем стала няправільная эксплуатацыя водагаспадарчага збудавання: у воданапорную вежу бескантрольна падавалася вада, яна пералівалася цераз край, у выніку чаго тэрыторыя каля адной з фермаў пакрылася лёдам.

Па выніках праверкі пракурор раёна вынес прадпісанне кіраўніцтву ААТ «Чэрыкаў агра» з патрабаваннем ліквідаваць выяўленыя парушэнні.

Чытайце таксама: На адным з прадпрыемстваў Асіповіцкага раёна кароў кармілі бруднай саломай, змешанай з гноем