Цягнікі з Мінска да Адлера і Анапы зноў пусцяць у абыход Гомеля. Раней каля мяжы дроны атакавалі беларускія фуры

Расійская чыгунка зноў змяніла маршруты цягнікоў з Мінска ў Адлер і Анапу. Паводле паведамлення Беларускай чыгункі, змены ўводзяцца па інфармацыі РЖД і звязаныя з тэхнічнымі прычынамі.

Чытайце таксама: Браншчына становіцца ўсё больш небяспечным маршрутам для беларусаў: фуры рэгулярна трапляюць пад удары БПЛА

Цягнік № 302 Мінск — Адлер будзе ісці звычайным маршрутам да Гомеля, а затым — праз Магілёў, Шклоў, Оршу і Бранск. У зваротным кірунку цягнік № 301 Адлер — Мінск пасля Бранска паедзе праз Оршу замест Гомеля.

Зменены маршрут закране і цягнік Мінск — Анапа: ён будзе ісці паводле схемы руху цягнікоў Мінск — Адлер.

Змены пачынаюць дзейнічаць з 17 кастрычніка. Паводле апублікаванай інфармацыі, цягнікі будуць хадзіць па змененых маршрутах і раскладзе да канца лістапада. Пасажырам, якія набылі квіткі на ўчастак Гомель — Мінск, прызначаюць дадатковыя цягнікі.

Раней цягнік Адлер — Мінск ужо аб’язджаў Гомель

Гэта не першы выпадак, калі рух цягнікоў на гэтым кірунку змяняюць пасля інцыдэнтаў у Бранскай вобласці Расіі.

29 верасня цягнік Адлер — Мінск замест Гомеля прайшоў праз Оршу і спазніўся прыкладна на гадзіну. Беларуская чыгунка тады таксама спаслалася на «тэхнічныя прычыны», не ўдакладніўшы, што менавіта адбылося.

Змена маршруту супала па часе з паведамленнямі пра атаку беспілотнікаў на міжнародны аўтамабільны пункт пропуску «Красны Камень» на расійскім баку беларуска-расійскай мяжы.

У кастрычніку рух цягнікоў зноў змянялі. Паводле паведамлення Беларускай чыгункі, 13, 15 і 17 кастрычніка цягнік № 301 Адлер — Мінск ішоў праз Бранск, Смаленск і Оршу замест Гомеля. Цягнік № 302 Мінск — Адлер пасля Гомеля накіроўваўся праз Магілёў, Оршу, Смаленск і Бранск.

На гэты раз змены тлумачаць рамонтнымі працамі. Інфармацыі пра новую атаку на чыгуначную інфраструктуру, якая магла б стаць прычынай цяперашніх зменаў, не паведамлялася.

Чытайце таксама: Фестываль «Славянскае адзінства» ў Бранску, імаверна, адмянілі: на фоне вайны не адбылося амаль ніводнага мерапрыемства

На беларуска-расійскай мяжы атакавалі грузавікі і пункт пропуску

У канцы верасня пункт пропуску «Красны Камень» і дарогі каля яго некалькі разоў траплялі ў паведамленні пра атакі беспілотнікаў.

25–26 верасня былі пашкоджаныя дзве беларускія грузавыя фуры на тэрыторыі Бранскай вобласці. Паводле матэрыялаў, якія апублікавала выданне «Флагшток», адзін грузавік згарэў, а на другім засталіся сляды ўдару. Абодва кіроўцы выжылі.

У ноч на 29 верасня з’явіліся паведамленні пра атаку ўжо на сам пункт пропуску «Красны Камень». На апублікаваных кадрах былі бачныя пажар і пашкоджанні навеса. Пасля інцыдэнту паведамлялася пра спыненне працы пераходу і накіраванне транспарту ў аб’езд.

Чытайце таксама: Белчыгунка працягвае вазіць пасажыраў праз прыфрантавыя зоны. Чыгуначнікі адмаўляюцца ад рэйсаў

Бранская вобласць застаецца небяспечным транзітным кірункам

Праз Бранскую вобласць праходзіць адзін з наземных маршрутаў з Гомеля ў цэнтральную частку Расіі. У апошнія месяцы рэгіён неаднаразова згадваўся ў паведамленнях пра атакі беспілотнікаў і пашкоджанні транспартнай інфраструктуры.

У чэрвені ў Бранскай вобласці пацярпеў беларускі аўтобус, які перавозіў пасажыраў на міжнародным рэйсе. Адна жанчына загінула, некалькі чалавек атрымалі траўмы. BGmedia распавядала пра загінулую Вікторыю Гарошку, ураджэнку Луганска і жыхарку Беларусі. Пасля трагедыі намеснік старшыні Гомельскага аблвыканкама Дзмітрый Алейнікаў назваў Бранскую вобласць «практычна прыфрантавой зонай».

8 кастрычніка ў Бранскай вобласці беспілотнік атакаваў грузавы аўтамабіль з беларускімі нумарамі. Паводле інфармацыі, якую на брыфінгу агучыў прэс-сакратар Міністэрства замежных спраў Беларусі Руслан Варанкоў, цяжкія раненні атрымала грамадзянка Беларусі. Ёй зрабілі аперацыю з ампутацыяй канечнасцяў. На наступны дзень жанчына заставалася ў бальніцы ў крытычна цяжкім, але стабілізаваным стане і была падключаная да апарата штучнай вентыляцыі лёгкіх.

Чытайце таксама: У Брэсце мужчына спрабаваў заскочыць у цягнік на хаду і зваліўся паміж перонам і рэйкамі