«Смецце, цэгла і арматура». Улады Мазыра нагадалі, дзе можна купацца, а жыхары раскрытыкавалі афіцыйны пляж

На фоне спякоты, якая накрыла Беларусь, улады Мазыра зноў нагадалі жыхарам, дзе ў горадзе дазволена купацца. Паводле афіцыйнай інфармацыі, бяспечнымі лічацца толькі чатыры месцы: пляжы на правым і левым берагах Прыпяці, пляж у раёне дома №9 на вуліцы Савецкай і пляж каля санаторыя «Сосны». Менавіта ў гэтых месцах абследавана дно, абсталяваныя месцы для адпачынку і дзяжураць ратавальнікі. Астатнія вадаёмы афіцыйна забароненыя для купання.

Чыноўнікі таксама нагадалі, што большасць няшчасных выпадкаў адбываецца менавіта ў неабсталяваных месцах. Паводле іх слоў, чалавек можа трапіць у яму, зачапіцца за корч або не справіцца з сутаргай, а дапамогі побач можа не аказацца. Бацькоў асобна заклікалі ні на хвіліну не пакідаць дзяцей без нагляду.

Чытайце таксама: «30 гадоў чакалі». Жыхары Мазыра гатовыя стаяць у чарзе да новых атракцыёнаў нават пад дажджом

Жыхары Мазыра раскрытыкавалі афіцыйны пляж

Аднак у каментарыях у сацсетках жыхары Мазыра замест абмеркавання забаронаў пачалі распавядаць пра стан аднаго з афіцыйных пляжаў — таго, што размешчаны за аўтамабільным мостам. Паводле слоў людзей, бяспечным яго назваць складана: «Гарадскі пляж каля моста — гэта ганьба. Каля буйкоў вада па грудзі, а дно жахлівае: будаўнічае смецце, цэгла і арматура. Бліжэй да моста ўвогуле можна напароцца на жалезабетонную калону».

Іншыя карыстальнікі пацвярджаюць, што самі наступалі на цэглу і яе аскепкі. Некаторыя пішуць, што частку смецця адпачывальнікі ўжо самастойна выкідваюць на бераг, аднак далей ад берага, паводле іх слоў, сітуацыя застаецца такой жа. Людзей здзіўляе, чаму дно афіцыйнага пляжа да гэтага часу не ачысцілі.

Не менш прэтэнзій выклікала і інфраструктура. Мазырчукі скардзяцца, што ў спёку да пляжа даводзіцца доўга ісці пешшу па сонцы, побач няма ні кіёска з пітной вадой, ні калонкі, каб змыць пясок з ног. Многія адзначаюць, што ляжакі ўжо паламаныя, а аўтамабілісты распавядаюць, што ДАІ штрафуе іх за праезд да пляжа, хоць афіцыйнай паркоўкі побач няма. На думку некаторых каментатараў, лагічней было б арганізаваць нармальны пад’езд, чым караць адпачывальнікаў.

Знайшліся і тыя, хто прапанаваў звярнуць увагу на іншыя месцы для купання. У каментарыях узгадвалі катлаван, аднак іншыя карыстальнікі адказвалі, што там ужо ўсталяваны знак, які забараняе купанне.

Асабліва іранічна цяперашнія скаргі выглядаюць на фоне публікацый мясцовых СМІ пачатку траўня. Тады тэлеканал «Мазыр» распавядаў, што ўсе гарадскія пляжы цалкам гатовыя да купальнага сезона: камунальныя службы правялі неабходныя работы, а самі пляжы называлі чыстымі, зручнымі і камфортнымі для адпачынку. Праз некалькі месяцаў жыхары абмяркоўваюць ужо зусім іншае — цэглу, будаўнічае смецце і аскепкі пад вадой на адным з афіцыйных пляжаў, які самі ўлады рэкамендуюць як бяспечнае месца для купання.

Чытайце таксама: У Мазыры ўрачыста адкрылі дзіцячыя арэлі. На праект спатрэбіліся дэпутаты, партыя і некалькі арганізацый