Дрыбінскі раён могуць павялічыць за кошт суседзяў. За 30 гадоў насельніцтва тут скарацілася амаль утрая

Размовы пра магчымую змену межаў Дрыбінскага раёна выходзяць на практычны ўзровень. Чыноўнікі ўжо падрыхтавалі свае прапановы і накіравалі іх на разгляд. Мяркуецца, што тэрыторыя раёна можа павялічыцца за кошт часткі Шклоўскага і Горацкага раёнаў.

Чытайце таксама: Як «уваскрэслая» вёска зноў памірае: у Лёзненскім раёне плануюць «ліквідаваць» Бель

Ідэя змянення межаў прагучала яшчэ некалькі месяцаў таму пасля заявы Аляксандра Лукашэнкі. Тады гаворка ішла пра неабходнасць перагляду адміністрацыйнага ўладкавання раёна. Цяпер, судзячы па інфармацыі дзяржаўных СМІ, працэс атрымаў працяг.

Самы малады і самы маленькі раён Беларусі

Дрыбінскі раён лічыцца самым маладым у краіне. У сучасным выглядзе ён быў створаны ў 1989 годзе. Пасля аварыі на Чарнобыльскай АЭС сюды перасялялі жыхароў з пацярпелых тэрыторый, а сам Дрыбін і навакольныя вёскі пачалі расці. У выніку было вырашана стварыць асобную адміністрацыйна-тэрытарыяльную адзінку.

Пры гэтым раён адразу атрымаўся невялікім па плошчы і колькасці насельніцтва. А з цягам часу дэмаграфічныя праблемы сталі яшчэ больш прыкметнымі.

Сёння адзін клік ці падабайка могуць каштаваць занадта дорага. Гісторыя вашага браўзэра не павінна быць падставай для пераследу. BGlobal VPN. цалкам шыфруе ваш трафік. Заставайцеся ў бяспецы.

Спасылка на падключэнне BGlobal VPN – тут

За трыццаць гадоў колькасць жыхароў скарацілася амаль утрая

Паводле адкрытых статыстычных дадзеных, у 1996 годзе ў Дрыбінскім раёне пражывала каля 16,8 тысячы чалавек. Да 2001 года колькасць жыхароў знізілася да 15,5 тысячы, а ў 2010-м — да 12,1 тысячы. У 2019 годзе ў раёне заставалася ўжо менш за 9,4 тысячы чалавек.

У выніку за апошнія тры дзесяцігоддзі колькасць насельніцтва зменшылася амаль у два разы. Сам гарадскі пасёлак Дрыбін сёння застаецца самым маланаселеным райцэнтрам Беларусі. Паводле дадзеных на пачатак 2025 года, у ім пражывае менш за тры тысячы чалавек.

Межы могуць змяніцца за кошт двух суседніх раёнаў

На дадзены момант улады падрыхтавалі адпаведныя прапановы: плануецца пашырыць яго межы за кошт часткі тэрыторый Шклоўскага і Горацкага раёнаў.

Паводле інфармацыі БелТА, пасля далучэння новых зямель плошча Дрыбінскага раёна павялічыцца прыкладна на 10 тысяч гектараў, што зробіць яго большым за сярэдні раён Магілёўскай вобласці.

Разам з тэрыторыямі ў склад раёна павінны ўвайсці і сельскагаспадарчыя прадпрыемствы. Калі цяпер у раёне дзейнічаюць шэсць такіх гаспадарак, то пасля меркаванага ўзбуйнення іх колькасць можа вырасці амаль удвая.

Чытайце таксама: Яшчэ адна вёска знікла з мапы Беларусі. Што вядома пра Саладоўню на Кругляншчыне