Грузія пацвердзіла, што не дэпартуе беларускага праваабаронцу Кісляка ў Беларусь

Грузія афіцыйна пацвердзіла беларускаму праваабаронцу і палітычнаму ўцекачу Раману Кісляку, што ў дачыненні да яго цяпер не праводзіцца працэдура дэпартацыі ў Беларусь.

Чытайце таксама: Берасцейскі праваабаронца Раман Кісляк застаецца без дакументаў у Грузіі. Улады будуць чакаць рашэння ААН

Дэпартамент міграцыі Міністэрства ўнутраных справаў Грузіі прызнаў часовую меру Камітэта ААН па правах чалавека, якая забараняе высылку Кісляка ў Беларусь на час разгляду яго скаргі. Пра гэта праваабаронца паведаміў «Позірку».

Грузія прызнала часовую меру Камітэта ААН

У афіцыйным адказе на запыт Кісляка гаворыцца, што ягоная скарга цяпер разглядаецца Камітэтам ААН па правах чалавека. У межах гэтай справы камітэт прыняў часовую меру для ўрада Грузіі — не высылаць заяўніка ў Беларусь да завяршэння разгляду.

Адказ падпісаў дырэктар Дэпартамента міграцыі Гурам Давіташвілі.

Кісляк звяртаўся ў ведамства, каб высветліць свой прававы статус і атрымаць неабходныя дакументы. Паводле яго, атрыманы адказ стаў першым афіцыйным пацвярджэннем таго, што грузінскія ўлады ўлічваюць рашэнне Камітэта ААН.

«Мне не пагражае дэпартацыя. Гэта паказвае, што працэдура часовых мер Камітэта ААН працуе. І гэта прызнаюць дзяржаўныя органы. Упершыню я атрымаў пацвярджэнне гэтага. Гэта значыць, што ўрад Грузіі прызнае свае міжнародныя абавязацельствы», — сказаў праваабаронца.

Выклікі ў міграцыйны дэпартамент пасля пратакола

Сітуацыя абвастрылася ў ліпені. 16 ліпеня супрацоўнікі Памежнай паліцыі Грузіі прыйшлі да Кісляка і склалі на яго пратакол за нелегальнае знаходжанне ў краіне. Пра гэты візіт ён расказваў раней.

Кісляк не пагадзіўся з такім рашэннем. Пасля гэтага яго папрасілі прыйсці ў Дэпартамент міграцыі.

21 ліпеня ён прыйшоў у ведамства. Праваабаронца меркаваў, што там павінна была пачацца працэдура яго дэпартацыі, у тым ліку інтэрв’ю. Аднак гэтага не адбылося.

Паводле Кісляка, грузінскія ўлады фактычна чакаюць рашэння Камітэта ААН і таму не пачынаюць працэдуру дэпартацыі. Пры гэтым асобнага прававога статусу, які б рэгуляваў такую сітуацыю ў грузінскім заканадаўстве, няма, таму неабходныя дакументы яму таксама не выдаюць.

Яшчэ 21 ліпеня супрацоўніца Дэпартамента міграцыі вусна паведаміла Кісляку, што ведае пра разгляд яго справы ў Камітэце ААН.

Чытайце таксама: Роман Кисляк: «Комитет ООН обязал Грузию не депортировать меня в Беларусь»

Без пашпарта і статусу

Праблемы з легальным знаходжаннем у Грузіі ў Кісляка ўзніклі пасля таго, як ён страціў магчымасць атрымаць новы беларускі пашпарт.

Тэрмін дзеяння ягонага беларускага пашпарта скончыўся ў лютым 2024 года. Аформіць новы дакумент праз амбасаду Беларусі ў Грузіі ён не можа праз абмежаванні, уведзеныя ўказам Аляксандра Лукашэнкі ад 4 верасня 2023 года. Дакумент істотна звузіў пералік консульскіх паслуг, якія беларускія дыпламатычныя прадстаўніцтвы могуць аказваць грамадзянам за мяжой.

У сакавіку гэтага года грузінскія ўлады паўторна дэ-факта адмовілі Кісляку ў прадастаўленні прытулку.

Пасля гэтага, паводле яго слоў, ён фактычна застаўся без прававога статусу ў краіне: не мае статусу заяўніка на прытулак, але пры гэтым у дачыненні да яго афіцыйна не распачата і працэдура дэпартацыі.

Цяпер сітуацыя фактычна звялася да чакання рашэння Камітэта ААН па правах чалавека.

Беларусы працягваюць атрымліваць адмовы ў міжнароднай абароне

Пасля 2020 года Грузія стала адной з краін, куды пераязджалі беларусы, якія пакідалі краіну праз палітычны пераслед. Аднак апошнім часам грузінскія ўлады працягваюць адмаўляць беларускім грамадзянам у міжнароднай абароне, пра што паведамляла BGmedia.

Паводле статыстыкі Дэпартамента міграцыі, часцей за ўсё ахоўны статус атрымліваюць грамадзяне Украіны. Ёсць таксама адзінкавыя выпадкі прадастаўлення такога статусу грамадзянам Расіі.

Пры гэтым, паводле прыведзеных дадзеных, аніводны грамадзянін Беларусі не атрымаў у Грузіі ні гуманітарнага статусу, ні статусу бежанца.

Справа Рамана Кісляка стала адным з найбольш прыкметных выпадкаў, калі беларус, які апынуўся без дзейнага пашпарта і без прававога статусу ў Грузіі, звярнуўся па міжнародную абарону і ў выніку дайшоў да Камітэта ААН па правах чалавека.

Чытайце таксама: Раман Кісляк: «Пакуль ніводны беларус не атрымаў ахоўнага статусу ў Грузіі»